រថយន្ត Arteon នឹងក្លាយជារថយន្តប្រណីតបំផុតដែលលក់ដោយក្រុមហ៊ុនផលិតរថយន្តអាល្លឺម៉ង់ Volkswagen នៅសហរដ្ឋអាមេរិក។ រថយន្ត Arteon ត្រូវបានបំពាក់ដោយម៉ាស៊ីនស៊ីឡាំង៤ ទំហំ ២.០លីត្រ 2.0 Turbocharge ដែលមានកម្លាំងដល់ទៅ ២៦៨សេះ ជាមួយនឹងជម្រើសប៉ុងមុខនិងប៉ុងមុខ-ក្រោយ ហើយមានប្រអប់លេខអូតូ៨លេខ។
ក្រុមហ៊ុន VW បានដាក់លក់រថយន្ដ Arteon ក្នុងតម្លៃចន្លោះពី ៣៥៨៤៥ដុល្លារ ទៅដល់ ៤៤៩៤៥ដុល្លារ ដែលជាតម្លៃក្រៅស្រុក។ តម្លៃនេះ គឺស្ថិតនៅចន្លោះរវាងតម្លៃរថយន្តធម្មតា និង រថយន្តប្រណិតរបស់ Audi។ នេះមកពីក្រុមហ៊ុននេះចង់ប្រកួតប្រជែងជាមួយនឹងរថយន្តប្រណិតផ្សេងៗទៀត។
ក្នុងនោះ គេបានធ្វើរឿងដ៏អស្ចារ្យមួយ ដែលបាននាំមកនូវគម្របយ៉ាន់កង់ Dynamic Volkswagen Hub Caps។ វាមានសមត្ថភាពិសេសត្រង់ថា អាចនៅបញ្ឈរដដែល បើទោះបីជាកង់រថយន្តវិលទៅទិសដៅណាក៏ដោយ។ និយាយឱ្យស្រួលយល់ទៅគឺថា វាស្រដៀងទៅនឹងអ្វីដែលគម្របយ៉ាន់កង់របស់ Rolls-Royce អាចធ្វើបានដែរ។ គម្របនីមួយៗមានលក្ខណៈរង្វង់មុខក្នុងទីតាំងត្រឹមត្រូវមិនថាល្បឿនកង់មានល្បឿនលឿនប៉ុណ្ណានោះទេ។
វាអាចជាអ្វីដែលគ្រប់គ្នាបានឃើញយ៉ាងស៊ាំភ្នែកបាត់ទៅហើយ ដោយសារតែក្រុមហ៊ុន Rolls-Royce មានវាមិនតិចឆ្នាំនោះទេ។ គេអាចហៅវាថាជាការចម្លងម៉ូដ តែវាមិនមែនជាគំនិតមិនល្អនោះឡើយ។ វាបានបន្ថែមប្រណិតភាពដល់រថយន្តនេះមួយកម្រិតទៀត។
ក្រុមហ៊ុន VW បានដាក់លក់គម្របយ៉ាន់កង់នេះក្នុងតម្លៃ ១៩៤.៥៨ដុល្លារអាមេរិក ក្នុងមួយឈុតមានបួនគ្រាប់។ ក្រុមហ៊ុនថា វាអាចដាក់បាននៅលើគ្រប់យ៉ាន់រថយន្ត ដែលអាចប្រើប្រាស់គម្របប្រភេទ 5G0601171XQI ៕
ប្រភព ៖ carbuzz , កែសម្រួលដោយ ៖ សំណាង
ចែករំលែកព័តមាននេះ