ខេត្តកំពង់ចាម ៖ ក្នុងសកម្មភាពបើកយុទ្ធនាការចុះបាញ់ថ្នាំសម្លាប់មេរោគនៅតាមតំបន់ជាច្រើនកន្លែងរបស់មន្ត្រីជំនាញ ដើម្បីទប់ស្កាត់ជំងឺប៉េសជ្រូកអាហ្វ្រិកក្នុងនោះមាន ក្រុងកំពង់ចាម ស្រុកកំពង់សៀម បាធាយ ជើងព្រៃ រួមនឹងស្រុកមួយចំនួនទៀត ដោយបានធ្វើឡើងយ៉ាងផុលផុស រហូតមកដល់ព្រឹកថ្ងៃទី១៦ កក្កដានេះ នៅមិនទាន់មានជំងឺនេះបានផ្ទុះឡើងនោះទេ ដោយអាជ្ញាធរគ្រប់លំដាប់ថ្នាក់ស្ថាប័នជំនាញ និងអ្នកចិញ្ចឹមជ្រូកមួយផ្នែកធំ មានការយល់ដឹងច្រើនចេះការពារមិនឲ្យឆ្លងជំងឺ ។
លោកស៊ីម ហួន វ័យ៤៧ឆ្នាំ នៅភូមិត្រពាំងឫស្សី ឃុំក្រឡា ស្រុកកំពង់សៀម ប្រាប់ថា គាត់បានចាប់ផ្តើមចិញ្ចឹមជ្រូកមានរយៈពេលជាង១០ឆ្នាំមកហើយ ដោយនៅក្រោមផ្ទះមានម៉ាស៊ីនកិនស្រូវ១គ្រឿង គឺកិនលក់ឲ្យអ្នកភូមិសល់កន្ទួក ឆ្លៀតដាក់ជ្រូកនៅក្រោយផ្ទះលាយជាមួយនឹងចំណីសត្វចេះតែទទួលបានផលជោគជ័យបន្តបន្ទាប់ និងបានសល់លុយសម្រាប់ផ្គត់ផ្គង់ជីវភាពគ្រួសារ មួយផ្នែកទៀតឲ្យកូនៗបានរៀនសូត្រនឹងគេ គ្រាន់មានចំណេះដឹងខ្ពស់ ។
លោកស៊ីម ហួន ប្រាប់បន្តថា ក្នុងអំឡុងពេលចិញ្ចឹមបានរយៈពេលចំនួន៥ឆ្នាំ គ្រានោះជ្រូកកើតជំងឺត្រចៀកខៀវ បណ្តាលឲ្យងាប់ច្រើនក្បាលរហូតដល់ទៅជិត២០ក្បាល មានតូចធំត្រូវខាតបង់ថវិកាប្រមាណ៣០០០ដុល្លារ គាត់ស្ទើរនឹងលែងចិញ្ចឹមជ្រូកបន្តទៀត ទោះជាបែបនេះក្តីក៏នូវតែមានការតស៊ូមិនរាថយនោះទេ ។ រាល់ថ្ងៃចិញ្ចឹមជ្រូកមេចំនួន៣ក្បាល និងកូនចំនួន២ក្បាល ហើយក៏មានការភិតភ័យខ្លាចមានជំងឺប៉េស្តជ្រូកអាហ្វ្រិកបានផ្ទុះឡើង សំណាងល្អនៅព្រឹកថ្ងៃទី១៦ កក្កដានេះ បានក្រុមមន្ត្រីបសុព្យាបាលខេត្តបានសហការជាមួយនឹងអាជ្ញាធរមូលដ្ឋាន ដោយបានចុះមកបាញ់ថ្នាំសម្លាប់មេរោគដល់ទ្រុងរបស់គាត់ និងបានផ្តល់ទឹកថ្នាំ សម្រាប់ទុកបាញ់សម្លាប់មេរោគដោយខ្លួនឯង ។ មានជ្រូករបស់អ្នកភូមិរបស់គាត់ នៅមិនឆ្ងាយពីផ្ទះប៉ុន្មានបានឈឺងាប់២ទៅ៣ក្បាល ត្រូវម្ចាស់ជីកដីកប់ផងដែរ ។
អ្នកចិញ្ចឹមជ្រូកឈ្មោះ សែម អាត អាយុ៣៨ឆ្នាំ នៅភូមិត្រពាំងឫស្សីប្រាប់ថា គាត់បានចិញ្ចឹមជ្រូកមានរយៈពេលចំនួន៥ឆ្នាំមកហើយ មិនដែលជួបនឹងបញ្ហាណាមួយកើតឡើងនោះទេ ចេះតែទទួលបានជោគជ័យមកដល់ក្នុងឆ្នាំ២០១៩ ក៏បានពង្រីកទ្រុងបន្ថែមដាក់ចិញ្ចឹមទាំងតូច និងធំកើនដល់៤៣ក្បាល តែជ្រូករបស់គាត់មិនទាន់មានឈឺ១ក្បាលណានោះទេ ។ ស្របពេលដែលមានក្តីកង្វល់ត្រូវបានពេទ្យសត្វចុះមកបាញ់ថ្នាំដល់ទ្រុងរបស់គាត់ និងបានចែកថ្នាំឲ្យចំនួន២ដប ទុកបាញ់ខ្លួនឯង គឺគាត់មានការប្រុង
ប្រយ័ត្នមិនឲ្យអ្នកណាចូលមកទ្រុងផ្តេសផ្តាសឡើយ ។ អ្នកចិញ្ចឹមជ្រូកនៅតាមគ្រួសារ និងចិញ្ចឹមបែបទ្រង់ទ្រាយធំ ពិតជាមានក្តីសប្បាយរីករាយ ដោយបានឃើញការយកចិត្តទុកដាក់របស់អាជ្ញាធរមូលដ្ឋានរួមនឹងពេទ្យសត្វចុះមកអន្តរាគមនបាញ់ថ្នាំទាន់ពេលវេលា ។
លោក នង ម៉េងហ៊ាង ប្រធានការិយាល័យផលិតកម្ម និងបសុព្យាបាលខេត្តប្រាប់ថា ចាប់តាំងពេលដែលមានការផ្ទុះឡើងជំងឺប៉េស្តជ្រូកអាហ្វ្រិកនៅប្រទេសវៀតណាម ប្រធានមន្ទីរកសិកម្មរុក្ខាប្រមាញ់ និងនេសាទខេត្តក៏ដូចជា លោកអភិបាលខេត្តបានជម្រុញឲ្យស្ថាប័នជំនាញប្រញាប់ចុះផ្សព្វផ្សាយនៅតាមបណ្តាស្រុក-ក្រុង ក្នុងខេត្ត ឲ្យមានការយល់ដឹងពីវិធានការទប់ស្កាត់ជំងឺនេះឲ្យមានការផុលផុស ។ ហើយស្របតាមការអំពាវនាវរបស់រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ កម្លាំងជំនាញបានតាមឃ្លាំមើលនៅតាមច្រកស្ពានគីហ្ស៊ុណា និងតាមកំពង់ដរមួយចំនួន ដោយចាប់បានម៉ូតូ និងរថយន្តដឹកជ្រូកនាំចូលមកពីប្រទេសវៀតណាមបានហូរហែរ ក្នុងគោលបំណងទប់ស្កាត់ជំងឺប៉េស្តជ្រូកអាហ្វ្រិក ។
ហើយហូតមកដល់ព្រឹកថ្ងៃទី១៦ កក្កដានេះ ខេត្តកំពង់ចាមមិនទាន់មានជំងឺនេះកើតឡើងទេ រូបលោកក៏សូមឲ្យប្រជាជនមានការប្រុងប្រយ័ត្ន ប្រសិនបើចង់ទិញសាច់ជ្រូកលក់នៅតាមផ្សារនានាត្រូវពិនិត្យមើលសាច់ជ្រូកណាមានត្រាអូសចាំទិញ ព្រោះមានការបញ្ជាក់ពីសុខភាពរបស់ពេទ្យសត្វ ហើយនៅតាមភូមិឋានក៏ដូច្នោះដែរ ប្រសិនបើមានជនមកពីឆ្ងាយដឹកសាច់ជ្រូក ដើរលក់ក្នុងតម្លៃថោកក៏មិនត្រូវទិញមកចំអិនធ្វើម្ហូបនោះទេ អាចនឹងរាយការណ៍មកពេទ្យសត្វប្រចាំភូមិ ឫអាជ្ញាធរនៅមូលដ្ឋាន ដើម្បីមានវិធានការលើជនខិលខូចនោះ ៕ កែសម្រួលដោយ ៖ សុឃាក់
ចែករំលែកព័តមាននេះ