រាជធានីភ្នំពេញ ៖ តាមប្រភពព័ត៌មានបឋមបានឱ្យដឹងថា ស្ត្រីរកស៊ីផ្លូវភេទ និងក្រុមហៅម៉ូយដែលបង្កភាពអនាធិបតេយ្យជុំវិញរមណីយដ្ឋានវត្តភ្នំនិងតាមសួនច្បារមុខស្ថានទូតអាមេរិក ស្ថិតក្នុងសង្កាត់វត្តភ្នំ ខណ្ឌដូនពេញត្រូវកម្លាំងចម្រុះសាលាខណ្ឌដូនសហការជាមួយនគរបាលប៉ុស្តិ៍រដ្ឋបាលវត្តភ្នំបើកយុទ្ធនាការចុះបង្ក្រាបជាបន្តបន្ទាប់អស់រយៈពេលជិត២សប្តាហ៍ និងឃាត់ខ្លួនស្ត្រីរកស៊ីផ្លូវភេទ និងក្រុមអ្នកទាក់ម៉ូយចំនួន៤៩នាក់ ។
លោកគឹម វុត្ថា ប្រធានក្រុមប្រជាការពារខណ្ឌដូនពេញបានឲ្យដឹងថា ដោយអនុវត្តន៍តាមបទបញ្ជាដ៏ម៉ឺងម៉ាត់របស់លោក សុខ ពេញវុធ អភិបាលខណ្ឌដូនពេញ កម្លាំងគណៈបញ្ជាការឯកភាពរដ្ឋបាលខណ្ឌដូនពេញ សហការជាមួយកម្លាំងគណៈបញ្ជាការឯកភាពសង្កាត់វត្តភ្នំ បានបើកប្រតិបត្តិការចុះប្រមូលស្ត្រីរកស៊ីផ្លូវភេទ រួមទាំងអ្នកហៅម៉ូយនៅជុំវិញរមណីយដ្ឋានវប្បធម៌ប្រវត្តិសាស្ត្រវត្តភ្នំ តាមបណ្តោយផ្លូវលេខ៩០, ៩២, ៩៤ និង៩៦ ដែលបានបង្កភាពអនាធិបតេយ្យ បណ្តាលឲ្យបាត់បង់សណ្តាប់ធ្នាប់ និងតម្លៃស្ត្រីខ្មែរ។
ជាលទ្ធផលរយៈពេល១សប្តាហ៍នៃប្រតិបត្តិការចុះបង្ក្រាបខាងលើនេះ គណៈបញ្ជាការឯកភាពរដ្ឋបាលខណ្ឌ បានធ្វើការប្រមូលស្ត្រីរកស៊ីផ្លូវភេទ រួមទាំងអ្នកហៅម៉ូយសរុបចំនួន៤៩នាក់ ក្នុងនោះមានស្ត្រីចំនួន៣៧នាក់ និងបុរសចំនួន១២នាក់ បញ្ជូនមកនៅសាលាខណ្ឌដូនពេញ ដើម្បីកសាងសំណុំរឿងបញ្ជូនបន្តទៅមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ។
ដោយឡែករយៈពេលមួយខែគិតពីថ្ងៃ១៥ ខែមិថុនា ដល់ថ្ងៃទី១៥ ខែកក្កដា គណៈបញ្ជាការឯកភាពខណ្ឌសហការជាមួយសង្កាត់និងនគរបាលប៉ុស្តិ៍ចុះប្រមូលជនអនាថា អ្នកសុំទាន និងអ្នកញៀនថ្នាំសរុបចំនួន៦៧នាក់ ហើយក៏បានប្រគល់ទៅឲ្យមន្ទីរសង្គមកិច្ចផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ