រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រីបានស្នើឲ្យគណៈអភិបាលខេត្តរាជធានីខេត្តទាំងអស់គ្រប់គ្រង និងត្រួតពិនិត្យសំណង់ឲ្យមានប្រសិទ្ធិភាពខ្ពស់ ។ យោងតាមលិខិតរបស់សម្តេច ស…
រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រីបានស្នើឲ្យគណៈអភិបាលខេត្តរាជធានីខេត្តទាំងអស់គ្រប់គ្រង និងត្រួតពិនិត្យសំណង់ឲ្យមានប្រសិទ្ធិភាពខ្ពស់ ។ យោងតាមលិខិតរបស់សម្តេច ស ខេង ប្រាប់អភិបាលនៃគណៈអភិបាលរាជធានីខេត្តទាំងអស់ នៅថ្ងៃទី១៥ កក្កដា យ៉ាងដូច្នេះថា ជម្រាបលោក លោកស្រី អភិបាលនៃគណៈអភិបាលរាជធានី ខេត្ត ដោយកម្មវត្ថុស្តីពីការជំរុញ និងពង្រឹងប្រសិទ្ធភាពក្នុងការគ្រប់គ្រង និងត្រួតពិនិត្យសំណង់នៅតាមរាជធានីខេត្ត ។
សម្តេចបានបន្តថា ក្នុងរយៈពេលប៉ុន្មានឆ្នាំចុងក្រោយនេះ ទន្ទឹមនឹងការអភិវឌ្ឍរីកចម្រើនរបស់ប្រទេសជាតិ វិស័យសំណង់ក៏មានការរីកលូតលាស់យ៉ាងឆាប់រហ័សគួរឲ្យកត់សម្គាល់ ជាពិសេសនៅតាមទីក្រុង និងទីប្រជុំជន ។ ក្នុងនោះក្រសួងមហាផ្ទៃក៏បានកត់សម្គាល់ឃើញថាការសាងសង់សំណង់មួយចំនួនមានលិខិតអនុញ្ញាតពីក្រសួងស្ថាប័នមានសមត្ថកិច្ច ឬពីរដ្ឋបាលរាជធានីខេត្ត ក្រុង ស្រុក ខណ្ឌ ព្រមទាំងគោរពបានត្រឹមត្រូវតាមបទដ្ឋានបច្ចេកទេសសំណង់ ។ ប៉ុន្តែទន្ទឹមនេះក៏មានសំណង់មួយចំនួនទៀតត្រូវបានដំណើរការសាងសង់ជួសជុល និងកែប្រែទ្រង់ទ្រាយសំណង់ដោយគ្មានលិខិតអនុញ្ញាត ឬខុសពីលិខិតអនុញ្ញាត និងពុំមានការត្រួតពិនិត្យលក្ខណៈបច្ចេកទេសសំណង់ឲ្យបានត្រឹមត្រូវ ដែលករណីទាំងនេះអាចបណ្តាលឲ្យ ប៉ះពាល់ដល់សោភ័ណភាព ស្ថាបត្យកម្ម គុណភាព សុវត្ថិភាពសំណង់ សណ្តាប់ធ្នាប់ និងរបៀបរៀបរយសាធារណ រហូតបង្កឲ្យមានគ្រោះមហន្តរាយ និងហានិភ័យផ្សេងៗ ។
សម្តេចបានបញ្ជាក់ក្នុងលិខិតថា«ដើម្បីរួមចំណែកជំរុញ និងពង្រឹងប្រសិទ្ធភាពក្នុងការគ្រប់គ្រងសំណង់ក្រសួងមហាផ្ទៃសូមធ្វើការណែនាំដល់លោក លោកជំទាវអភិបាលនៃគណៈអភិបាលរាជធានីខេត្ត ដូចខាងក្រោម ៖ ត្រូវណែនាំដល់មន្ទីរ អង្គភាពជំនាញពាក់ព័ន្ធ និងរដ្ឋបាលក្រុង ស្រុក ខណ្ឌ ឃុំ សង្កាត់ ឲ្យទទួលខុសត្រូវពង្រឹងការងារគ្រប់គ្រង និងត្រួតពិនិត្យសំណង់ ព្រមទាំងធានាថា មិនមានការសាងសង់សំណង់ដោយគ្មានលិខិតអនុញ្ញាត ឬខុសពីលិខិតអនុញ្ញាតក្នុងដែនសមត្ថកិច្ចរបស់ខ្លួន ។ ត្រូវពនឿននីតិវិធីក្នុងការផ្តល់លិខិតអនុញ្ញាតសាងសង់ជូនដល់ម្ចាស់សំណង់ឲ្យបានឆាប់ស្របតាមគោលការណ៍បែបបទ និងនីតិវិធីកំណត់ជាធរមាន ។ ត្រូវបន្តលើកកម្ពស់ការផ្តល់សេវាលើវិស័យសំណង់នៅតាមរដ្ឋបាលរាជធានីខេត្ត ក្រុងស្រុក ខណ្ឌ ដែលមានយន្តការច្រកចេញចូលតែមួយ ត្រូវអប់រំ ផ្សព្វផ្សាយដល់ម្ចាស់សំណង់ឲ្យយល់ដឹង និងគោរពតាមច្បាប់ និងលិខិតបទដ្ឋានគតិយុត្តិពាក់ព័ន្ធនឹងវិស័យសំណង់ សុវត្ថិភាព ក្នុងការសាងសង់សំណង់ និងផលវិបាកនៃការសាងសង់ដែលមិនគោរពតាមច្បាប់ និងបទដ្ឋានបច្ចេកទេសសំណង់ ។
សូមជម្រាបថាការចេញលិខិតរបស់ក្រសួងមហាផ្ទៃបន្ទាប់មានហេតុការណ៍បាក់រលំអគារនៅខេត្តព្រះសីហនុ បណ្តាលឲ្យមនុស្សស្លាប់ និងរបស់ជាច្រើននាក់កាលពីពេលកន្លងមកនេះ ៕ កែសម្រួលដោយ ៖ សុឃាក់
ចែករំលែកព័តមាននេះ