អុញ…ម្ចាស់សហគ្រាសលឹម ភ័ណ្ឌ ថាបង្ក្រាបបំពានច្បាប់ ត្រៀមប្តឹងមន្ត្រីវិញ
- កំពង់ធំ
ខេត្តកំពង់ធំ ៖ យោងតាមប្រភពព័ត៌មានដែលទទួលបានឲ្យដឹងថា លោក លឹម ភ័ណ្ឌ ម្ចាស់សហគ្រាស លឹម ភ័ណ្ឌ ផលិតទឹកបរិសុទ្ធ…
ខេត្តកំពង់ធំ ៖ យោងតាមប្រភពព័ត៌មានដែលទទួលបានឲ្យដឹងថា លោក លឹម ភ័ណ្ឌ ម្ចាស់សហគ្រាស លឹម ភ័ណ្ឌ ផលិតទឹកបរិសុទ្ធ…
ខេត្តកំពង់ធំ ៖ យោងតាមប្រភពព័ត៌មានដែលទទួលបានឲ្យដឹងថា លោក លឹម ភ័ណ្ឌ ម្ចាស់សហគ្រាស លឹម ភ័ណ្ឌ ផលិតទឹកបរិសុទ្ធ និងទឹកក្រូច មានទីតាំងស្ថិតនៅក្នុងភូមិព្រៃបន្លិចសង្កាត់អាចារ្យលាក់ ក្រុងស្ទឹងសែន បានអះអាងថា សហគ្រាសរបស់ខ្លួនមានច្បាប់អនុញ្ញាតត្រឹមត្រូវ ។ ជាមួយនេះបានចាត់ទុកថា ការចុះបង្ក្រាបរបស់មន្ត្រីនគរបាលដែលដឹកនាំដោយលោកឧត្តមសេនីយ៍ត្រី កាន់ វឌ្ឍនា ប្រធានក្រុមការងារ
គណៈកម្មាធិការប្រយុទ្ធប្រឆាំងផលិតផលក្លែងក្លាយ កាលពីថ្ងៃទី១០ ខែកក្កដាកន្លងទៅ គឺធ្វើឡើង
ដោយបំពានច្បាប់ ។
លោក លឹម ភ័ណ្ឌ និយាយថា ទង្វើទាំងនេះ ខាងលោកមិនអាចទទួលយកបានឡើយ ហើយលោកសម្រេចចិត្តដាក់ពាក្យប្តឹងមន្ត្រី ដែលចុះបង្ក្រាបទាំងបំពានច្បាប់ទៅតុលាការ និងស្ថាប័នមួយចំនួនទៀតដើម្បីរកយុត្តិធម៌ និងទាមទារសំណងនៃការខូចខាតសហគ្រាសរបស់លោកដែលមានច្បាប់ត្រឹមត្រូវ ចេញដោយក្រសួងឧស្សាហកម្ម មានការទទួលស្គាល់ពីស្ថាប័នមាត្រដ្ឋានចំណីអាហារ ហើយក៏មានមន្ត្រីសមត្ថកិច្ចចុះធ្វើការពិនិត្យរៀងរាល់៣ខែម្ដងដែរ បែរជាមន្ត្រីនគរបាលខាងលើចុះទៅបង្ក្រាបដោយចោទថាលួចផលិតទឹកក្រូច ទឹកសុទ្ធក្លែងក្លាយទៅវិញ ។
មិនតែប៉ុណ្ណោះ មន្ត្រីនគរបាលដែលមកពីភ្នំពេញ ចុះបង្ក្រាបមានភាពមិនប្រក្រតី ក្នុងចេតនាទុច្ចរិត ដូចជាចុះទៅមិនបានសហការជាមួយមន្ត្រីអាជ្ញាធរពាក់ព័ន្ធនៅក្នុងខេត្តឡើយ ទាល់តែម្ចាស់ទីតាំងបញ្ចេញប្រតិកម្មទើបហៅនគរបាលមូលដ្ឋានមកចូលរួម ហើយហៅព្រះរាជអាជ្ញាមកចូលរួមដឹកនាំ ។
ម្ចាស់សិប្បកម្មបន្តថា ខណៈចុះទៅនោះ ពួកគេបានសម្រុកចូលទៅក្នុងឃ្លាំង ហាមមិនឱ្យកម្មករនៅយាមឃ្លាំងថតរូប បញ្ជាឱ្យបិទកាម៉េរាសុវត្ថិភាពដែលថតពីសកម្មភាពនៅក្នុងឃ្លាំង បញ្ជាឱ្យកម្មករ៤នាក់ទៅយកគ្រឿងផ្សំមកផលិតទឹកក្រូច ដើម្បីពួកគេថតយកជាភ័ស្តុតាង ខណៈសង្វាក់ផលិតកម្មទឹកក្រូចទឹកបរិសុទ្ធខាងលើនេះ ត្រូវបានលោកបិទជិត១ខែមកហើយ ព្រោះតែផលិតលក់មិនចំណេញ ។
ការប្រកាសបិទនេះ លោកក៏បានជម្រាបទៅខាងមន្ទីរឧស្សាហកម្មនិងសិប្បកម្មឱ្យដឹងឮដែរ ហើយបើសង្វាក់ផលិតកម្មនៅដំណើរការ គឺសហគ្រាសនេះ មានកម្មករដល់ទៅជាង៥០នាក់ តែដោយសារបិទការផលិតទើបលោករំសាយបុគ្គលិកអស់ដោយទុកតែ៤នាក់ គ្រាន់បម្រើការផ្នែកដេប៉ូលក់ភេសជ្ជៈ ដែលលោកទទួលទិញទឹកក្រូច ទឹកបរិសុទ្ធពីក្រុមហ៊ុនផ្សេងៗ យកមកស្តុកទុកដើម្បីចែកចាយនៅក្នុងខេត្ត ។
សូមបញ្ជាក់ថា សកម្មភាពចុះបង្ក្រាបសិប្បម្មខាងលើ បានធ្វើឡើងកាលពីថ្ងៃទី១០ ខែកក្កដាកន្លងទៅ ដោយមន្ត្រីនគរបាលមួយក្រុមមកពីក្រុមបង្ក្រាបផលិតផលក្លែងក្លាយ នៃអគ្គស្នងការដ្ឋាននគរបាលជាតិ ដឹកនាំដោយលោកឧត្តមសេនីយ៍ត្រី កាន់ វឌ្ឍនា និងមានការចូលរួមពីលោកព្រះរាជអាជ្ញាអមសាលាដំបូងខេត្ត ។
ពាក់ព័ន្ធនឹងបញ្ហានេះ នារសៀលថ្ងៃទី១២ ខែកក្កដា ឆ្នាំ២០១៩ កោះសន្តិភាពបានព្យាយាមសុំការបំភ្លឺពីលោក ប្លោក ចាន់រដ្ឋា ប្រធានមន្ទីរឧស្សាហកម្មនិងសិប្បកម្មខេត្ត តាមទូរស័ព្ទ តែលោកប្រាប់ថា ឲ្យសួរនាំទៅលោក នួន ស៊ីណាល់ជាអនុប្រធានរបស់លោកទទួលខាងហ្នឹងវិញច្បាស់ជាង រួចលោកក៏ឲ្យលេខអនុប្រធានមន្ទីររបស់លោកមក តែលេខទូរស័ព្ទនោះហៅមិនចូល មិនអាចទាក់ទងទេ ។
ចំណែកលោក អុិត សុធា ព្រះរាជអាជ្ញាអមសាលាដំបូងខេត្ត ដែលលោកបានចូលរួមសហការដឹកនាំកងកម្លាំងចុះផ្អាកដំណើរការរបស់សហគ្រាស លឹម ភ័ណ្ឌ មានប្រសាសន៍ប្រាប់ឲ្យដឹងនៅរសៀលថ្ងៃដដែលនោះថា ករណីខាងលើនេះ ខាងសមត្ថកិច្ចក្រសួងដែលចុះមកនោះ កំពុងតែកសាងសំណុំរឿងបញ្ជូនមកសាលាដំបូងខេត្តដើម្បីចាត់ការទៅតាមនីតិវិធីច្បាប់ហើយ ។
ចំណែកលោក នួន ស៊ីណាល់ អនុប្រធានមន្ទីរឧស្សាហកម្មនិងសិប្បកម្មខេត្ត ដែលទទួលបន្ទុកខាងហ្នឹង ក៏បានចេញមុខសរសេរលិខិតសុំទោសចំពោះកំហុសឆ្គងរបស់លោក ដែលមានការធ្វេសប្រហែសនៅក្នុងការចុះត្រួតពិនិត្យលក្ខណៈបច្ចេកទេសនៃការផលិតទឹកក្រូច និងទឹកបរិសុទ្ធក្នុងសហគ្រាសខាងលើឲ្យត្រូវតាមស្តង់ដារដែរ ។ រីឯម្ចាស់សិប្បកម្មដែលគេមិនសុខចិត្ត ហើយដាក់ពាក្យបណ្តឹងនោះ គឺជាសិទ្ធិរបស់គាត់ ៕ (សម្រួលដោយ៖ ស្រីណា)
ចែករំលែកព័តមាននេះ