ខេត្តកំពង់ធំ ៖ រថយន្តឃ្លុប១គ្រឿងមានស្លាកក្រុមហ៊ុន CP ដឹកប្រវឹកជាង១.០០០ក្បាលបានត្រូវលោកព្រះរាជអាជ្ញាអមសាលាដំបូង ខេត្ត និងផ្នែករដ្ឋបាលព្រៃឈើស្ទោង ស្ទាក់ចាប់បានកាលពីរសៀលថ្ងៃទី១៣ ខែកក្កដា ។…
ខេត្តកំពង់ធំ ៖ រថយន្តឃ្លុប១គ្រឿងមានស្លាកក្រុមហ៊ុន CP ដឹកប្រវឹកជាង១.០០០ក្បាលបានត្រូវលោកព្រះរាជអាជ្ញាអមសាលាដំបូង ខេត្ត និងផ្នែករដ្ឋបាលព្រៃឈើស្ទោង ស្ទាក់ចាប់បានកាលពីរសៀលថ្ងៃទី១៣ ខែកក្កដា ។ លោក ឈឿង គុណ នាយផ្នែករដ្ឋបាលព្រៃឈើស្ទោងបានឲ្យដឹងថា មុនពេលឈានដល់ការបង្ក្រាបរថយន្តដឹកសត្វព្រៃនេះ លោកបានទទួលព័ត៌មានពីបណ្តាញសម្ងាត់មកថា មានរថយន្តកូរ៉េមួយគ្រឿងចំណុះ១,៥តោន ពាក់ផ្លាកលេខ ភ្នំពេញ ២AJ-៨៣២៩ ប្រើប្រាស់ស្លាកសញ្ញារបស់ក្រុមហ៊ុនCP ធ្វើដំណើរតាមផ្លូវជាតិលេខ៦ លួចដឹកសត្វព្រៃចេញពីខេត្តសៀមរាបឆ្ពោះទៅរាជធានីភ្នំពេញ ឆ្លងកាត់ខេត្តកំពង់ធំ ។
នៅពេលទទួលបានព័ត៌មាននេះ លោកក៏សុំបទបញ្ជាពីលោក អុិត សុធា ព្រះរាជអាជ្ញាអមសាលាដំបូងខេត្ត ដើម្បីស្ទាក់ចាប់រថយន្តនោះត្រួតពិនិត្យនិងឃើញមានកេសជ័រចំនួន៧៦ ។ លុះ ពេលពិនិត្យនៅក្នុងកេសទាំងអស់ គឺដាក់សុទ្ធតែប្រវឹកព្រៃ ក៏នាំទាំងរថយន្តនិងមនុស្ស៣នាក់មកកាន់ផ្នែករដ្ឋបាលព្រៃឈើស្ទោង ។មនុស្សទាំង៣នាក់នេះមាន ១-ឈ្មោះ ងួនសុភា អាយុ៣៨ឆ្នាំ រស់នៅក្នុងសង្កាត់ព្រៃស ខណ្ឌដង្កោ រាជធានីភ្នំពេញ និង២នាក់ទៀតជាកម្មករឈ្មោះព្រេននិងនី ។ ជនឈ្មោះ ងួន សុភី សារភាពថា រូបគេដឹកប្រវឹកនេះចេញពីខេត្តសៀមរាប ឆ្ពោះទៅរាជធានីភ្នំពេញ ។
ក្រោយពីចាប់ឃាត់ វត្ថុតាងទាំងអស់ត្រូវបាននាំយកទៅកាន់ផ្នែករដ្ឋបាលព្រៃឈើស្ទោង ដើម្បីធ្វើកំណត់ហេតុ និងរាប់សត្វប្រវឹកទាំងអស់ មានចំនួន១.០៦៨ក្បាល ។ បន្ទាប់ពីសាកសួររួច ជនទាក់ទិននឹងការលួចដឹកសត្វព្រៃនេះ ត្រូវបានកសាងសំណុំរឿងបញ្ជូនទៅសាលាដំបូង ។ ចំណែកប្រវឹកទាំងអស់ ត្រូវបានលោកព្រះរាជអាជ្ញា អិុត សុធា រួមទាំងមន្ត្រីផ្នែករដ្ឋបាលព្រៃឈើស្ទោង នាំយកទៅលែងនៅបឹងធម្មជាតិរមណីយដ្ឋានព្រៃប្រស់ នារសៀលថ្ងៃដដែលនោះ ។
លោកព្រះរាជអាជ្ញាថ្លែងថា លោកមានការសង្ស័យថា រថយន្តនេះអាចលួចប្រើប្រាស់ស្លាកសញ្ញារបស់ក្រុមហ៊ុន CP ក្លែងបន្លំដឹកបទល្មើសក៏មិនដឹង ហើយលោកនឹងឲ្យមន្ត្រីជំនាញធ្វើការស៊ើបអង្កេតឲ្យបានច្បាស់រកម្ចាស់ពិត ដើម្បីចាត់វិធានការតាមច្បាប់ ។
ជាមួយនេះ លោកក៏ថ្លែងអំណរគុណដល់ផ្នែករដ្ឋបាលព្រៃឈើស្ទោង ដែលបានសហការគ្នាទប់ស្កាត់ការបំផ្លិចបំផ្លាញធនធានធម្មជាតិទាំងនេះ ។ ការលួចដឹកសត្វព្រៃមានទោសមួយទៅហើយ និងបើករកឃើញប្រើឈ្មោះក្រុមហ៊ុនដើម្បីក្លែងបន្លំនឹងមានទោសបន្ថែមទៀត ហើយក្រុមហ៊ុនក៏អាចប្តឹងជុំវិញករណីនេះដែរ៕
ចែករំលែកព័តមាននេះ