ខេត្តព្រះសីហនុ ៖ តាមសេចក្តីរាយការណ៍បឋមបានឱ្យដឹងថា មានករណីគ្រោះថ្នាក់ចរាចរណ៍រវាងម៉ូតូ២គ្រឿងបុកជាមួយរថយន្តកុងតឺនរ័មួយគ្រឿង បណ្តាលឱ្យស្លាប់ម្នាក់ និងរបួសធ្ងន់ម្នាក់ ។
ហេតុការណ៍ខាងលើបានកើតឡើងកាលពីវេលាម៉ោង៣និង៣០នាទីរសៀលថ្ងៃទី១៤ កក្កដា ឆ្នាំ២០១៩ នៅផ្លូវជាតិលេខ៤ ឃុំបិតត្រាំង ស្រុកព្រៃនប់ ។
យោងតាមរបាយការណ៍ពីសមត្ថកិច្ចបានឱ្យដឹងថា ភាគីម៉ូតូទាំង២គ្រឿងខាងលើ ក្នុងនោះម៉ូតូមួយគ្រឿង ម៉ាក EXCITER ពណ៌ខ្មៅ គ្មានស្លាកលេខ បើកបរដោយឈ្មោះ សែន ប៊ុនថន ភេទប្រុស មានទីលំនៅភូមិទួលទទឹង ឃុំទួលទទឹង ស្រុកព្រៃនប់ ខេត្តព្រះសីហនុ បានរងរបួសធ្ងន់ ចំណែកម៉ូតូមួយគ្រឿងទៀតម៉ាកហុងដាឌ្រីម ពណ៌ខ្មៅ ពាក់ផ្លាកលេខ កំពត ១L-៥៦៧៨ បើកបរដោយឈ្មោះ សែម សាមេន ភេទប្រុស អាយុ២៣ឆ្នាំ មានទីលំនៅភូមិស្រូវក្រោម ឃុំដងទង់ ស្រុកដងទង់ ខេត្តកំពត បានស្លាប់នៅនឹងកន្លែង ។
រីឯភាគីខាងរថយន្តកុងតឺន័រមួយគ្រឿងម៉ាក STERLING ពណ៌ត្រួយចេក ពាក់ផ្លាកលេខភ្នំពេញ ៣C-៣២៩៤ បើកបរដោយបុរសម្នាក់មិនស្គាល់អត្តសញ្ញាណ។
យោងតាមរបាយការណ៍ពីសមត្ថកិច្ចបានឱ្យដឹងបន្តថា មុនពេលកើតហេតុ គេឃើញម៉ូតូមួយគ្រឿងម៉ាក EXCITER ពណ៌ខ្មៅ ធ្វើដំណើរក្នុងទិសដៅពីខេត្តព្រះសីហនុទៅភ្នំពេញ លុះមកដល់ចំណុចកើតហេតុខាងលើ ម៉ូតូម៉ាក EXCITER បានវ៉ាជែង ហើយទាក់ដៃចង្កូតជាមួយម៉ូតូមួយគ្រឿងទៀតម៉ាកហុងដាឌ្រីម ពណ៌ខ្មៅ ដែលមានទិសដៅស្របគ្នា បណ្តាលអោយអ្នកបើកបរម៉ូតូហុងដាឌ្រីម ដួលធ្លាក់មកលើផ្លូវ ស្របពេលនោះក៏មានរថយន្តកុងតឺន័រមួយគ្រឿង ដែលបើកបរក្នុងទិសដៅស្របគ្នាមកពីក្រោយ បានបុកនិងកិនពីលើអ្នកបើកបរម៉ូតូហុងដា រួចរថយន្តកុងតឺន័រជ្រុលល្បឿនទៅកិនពីលើម៉ូតូម៉ាក EXCITER ជាបន្តទៀត បណ្ដាលអោយអ្នកបើកបរម៉ូតូម៉ាកហុងដាឌ្រីម ស្លាប់នៅនឹងកន្លែងកើតហេតុ ចំណែកអ្នកបើកបរម៉ូតូម៉ាក EXCITER បានរងរបួសធ្ងន់ ។
ក្រោយពេលកើតហេតុ អ្នករងរបួសធ្ងន់ត្រូវបានបញ្ជូនសង្គ្រោះនៅមន្ទីរពេទ្យ ចំណែកសពជនរងគ្រោះម្នាក់ត្រូវបានប្រគល់ជូនក្រុមគ្រួសារដើម្បីរៀបចំធ្វើបុណ្យតាមប្រពៃណី ។ រីឯម៉ូតូទាំង២គ្រឿង ព្រមទាំងរថយន្តកុងតឺន័រ ត្រូវបានសមត្ថកិច្ចយកទៅរក្សាទុកដើម្បីរង់ចាំដោះស្រាយនៅពេលក្រោយ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ