ខេត្តកំពង់ឆ្នាំង ៖ ប្រជាកសិករភូមិអណ្ដូង ឃុំត្រងិល ស្រុកកំពង់លែង ប្រមាណជាង៩០ភាគរយ ប្រកបមុខរបរត្បាញកន្ទេលក្រហម ក្រៅពីការងារស្រែចម្ការដើម្បីទ្រទ្រង់ជីវភាពប្រចាំថ្ងៃ ។ ជាមធ្យមក្នុង១គ្រួសារ អាចរកចំណូលបានពី៦ទៅ៨លានរៀលក្នុងមួយឆ្នាំ ដោយមិនសូវចំណាយទុនប៉ុន្មានឡើយ ។
អ្នកត្បាញកន្ទេលជាច្រើនឲ្យដឹងស្រដៀងគ្នា កាលពីពេល ថ្មីៗកន្លងមកថា ក្រៅពីការងារស្រែចម្ការ ផ្ទះណាក៏ដូចជាផ្ទះណាដែរ សុទ្ធតែចាប់មុខរបរត្បាញកន្ទេលក្រហម ។ ការត្បាញកន្ទេលក្រហមនេះ គឺចំណាយតែលើថ្លៃទិញល័ក្តតែមួយមុខប៉ុណ្ណោះ ។ ចំណែកឯវត្ថុធាតុដើមមានកក់ និងក្រចៅ ដាំដុះដោយខ្លួនឯង រួមទាំងអុសសម្រាប់ស្ងោទឹកល័ក្ត ក៏ត្រូវទៅរកទុកដុតដោយខ្លួនឯងដែរ ។
តម្បាញកន្ទេលក្រហម គឺចាប់ផ្ដើមពីខែកក្កដា រហូតដល់ចុងខែកញ្ញា និងខ្លះដល់ដើមខែតុលា ទើបអស់កក់ មានរយៈពេល២ខែកន្លះទៅ៣ខែ ។ រយៈពេលនេះខ្លះត្បាញបាន១០០កន្ទេល និងខ្លះច្រើនជាងនេះ តាមកក់បានតិច ឬច្រើន ។ បើតាមការប្រមាណក្នុងមួយគ្រួសារ អាចរកចំណូលបានពី៦ទៅ៨លានរៀលក្នុង១ឆ្នាំ ។
សម្រាប់ថ្លៃល័ក្តដែលទិញយកមកជ្រលក់កក់ឱ្យក្លាយជាពណ៌ខៀវ ក្រហម ឬលឿង តាមតម្រូវការក្នុងមួយរដូវចំណាយអស់ប្រមាណជាង១៥ទៅ២០ម៉ឺនរៀលប៉ុណ្ណោះ ។ ដោយឡែកកក់សម្រាប់យកមកត្បាញជាកន្ទេល គឺរាល់ឆ្នាំពួកគាត់តែងទុកគ្រាប់ជាប្រចាំ ហើយដល់ខែមេសា ឬឧសភា ពួកគាត់ចាប់ផ្តើមសាបគ្រាប់កក់ រួមទាំងដើមក្រចៅ ដែលត្រូវយកមកវេញ ជាខ្សែសម្រាប់ត្បាញក៏ត្រូវសាបគ្រាប់ដែរ ។ ក្រចៅរយៈពេល២ខែកន្លះអាចច្រូតកាត់យករឹតវាឱ្យសំប៉ែត ចំណែកក្រចៅត្រូវកាប់ដើមយកមកបកយកសម្បកវេញជាខ្សែ ។
កសិករអ្នកភូមិអណ្តូងរនុក បានបន្តថា ពេលជ្រលក់កក់ឱ្យក្លាយជាពណ៌តាមតម្រូវការ និងវេញខ្សែក្រចៅ ហើយពួកគាត់ចាប់ផ្តើមត្បាញជាកន្ទេលហើយ ក្នុងមួយផ្ទះយ៉ាងហោចណាស់ ត្បាញបានកន្ទេលមួយដែរ ក្នុង១ថ្ងៃបើផ្ទះខ្លះមានមានមនុស្សច្រើន អាចបាន២ ឬ៣កន្ទេលក្នុងមួយថ្ងៃ ។ កន្ទេល១លក់ថ្លៃពី៦ទៅ១០ម៉ឺនរៀល តាមតូចតាមធំ ហើយកន្ទេលទាំងនោះមានម៉ូយទៅយកដល់ផ្ទះ តែពេលខ្លះក៏មានអ្នកប្រើប្រាស់ទៅទិញដោយផ្ទាល់ដែរ ។
អ្នកភូមិសំណូមពរដល់អតិថិជនដែលប្រើប្រាស់កន្ទេលក្រហមឲ្យជួយទិញកន្ទេលក្រហមអ្នកភូមិអណ្ដូងរនុក នេះផងព្រោះមានគុណភាពទាំងជាប់ និងពណ៌បានយូរដល់ទៅ៥ទៅ៦ឆ្នាំឯណោះលើកលែងតែកណ្ដុរកាត់ ។
អាជ្ញាធរមូលដ្ឋានបញ្ជាក់ថា អ្នកភូមិអណ្ដូងមាន១៩៥គ្រួសារ មានអ្នកត្បាញកន្ទេលប្រមាណ៩៥% ហើយប្រពលរដ្ឋទាំងនោះសុទ្ធតែមានជីវភាពសមរម្យទាំងអស់ ៕ (កែសម្រួលដោយ ៖ បុប្ផា)
ចែករំលែកព័តមាននេះ