ខេត្តបាត់ដំបង ៖ បើតាមសេចក្តីរាយការណ៍បឋមបានឱ្យដឹងថា ខ្មាន់កាំភ្លើងម្នាក់ដែលគេសង្ស័យជាមន្ត្រីយោធាផងនោះ បានរត់គេចខ្លួនភ្លាមៗ បន្ទាប់ពីវាយបំផ្លាញលំនៅឋានគេ និងដកកាំភ្លើងបាញ់គំរាម២គ្រាប់ រួចប្លន់យកទូរស័ព្ទ១គ្រឿងពីម្ចាស់ផ្ទះ បង្កឱ្យមានការភ្ញាក់ផ្អើលកាលពីម៉ោង៤រសៀល ថ្ងៃទី១៣ ខែកក្កដា នៅចំណុចចំការតាធា ស្ថិតក្នុងភូមិចម្លងរមាំងលើ ឃុំអូរសំរិល ស្រុកសំឡូត។
យោងតាមសេចក្ដីរាយការណ៍របស់សមត្ថកិច្ចបានឲ្យដឹងថា ខ្មាន់កាំភ្លើងនោះឈ្មោះ ទឹម សុខា ហៅ ០៧ អាយុ៦០ឆ្នាំ ដែលគេសង្ស័យជននេះជាមន្ត្រីយោធា។ រីឯជនរងគ្រោះឈ្មោះជួប សុផល ហៅ សារ៉ូ ស្រី អាយុ៥៧ឆ្នាំ រស់នៅចំណុចកើតហេតុខាងលើ។
សេចក្ដីរាយការណ៍បានឲ្យដឹងទៀតថា ជនសង្ស័យបានជិះម៉ូតូចូលទៅផ្ទះជនរងគ្រោះបង្កជាជម្លោះ រួចទាញដែកស្បែងវាយបំផ្លាញជញ្ជាំងផ្ទះជនរងគ្រោះ រួចដកកាំភ្លើងខ្លីបាញ់គំរាម២គ្រាប់ ហើយប្រវាយប្រតប់ប្លន់យកទូរស័ព្ទជនរងគ្រោះអស់១គ្រឿង រួចជិះម៉ូតូគេចខ្លួនភ្លាមៗដែរ។ សមត្ថកិច្ចប្រាប់ថា ជនសង្ស័យ និងជនរងគ្រោះជាអ្នកស្គាល់គ្នា ហើយករណីនេះទំនងផ្ដើមចេញពីបញ្ហាដីធ្លី។
បើតាមចម្លើយបឋមដែលសមត្ថកិច្ចសួរនាំជនរងគ្រោះបាននិយាយថា ជនសង្ស័យខាងលើធ្លាប់បណ្ដេញគ្រួសារខ្លួនឲ្យចាកចេញពីលើដីដែលខ្លួនរស់នៅសព្វថ្ងៃ ដោយជននេះអះអាងថា ជាដីរបស់ខ្លួន តែខ្លួនមិនចាកចេញ ព្រោះខ្លួនរស់នៅទីនោះយូរមកហើយ និងបានចិញ្ចឹមគោរាប់សិបក្បាល និងធ្វើចំការលើដីនោះច្រើនឆ្នាំមកហើយ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ៕ (កែសម្រួលដោយ ៖ បុប្ផា)
ចែករំលែកព័តមាននេះ