ខេត្តស្ទឹងត្រែង ៖ បើតាមសេចក្តីរាយការណ៍បឋមបានឱ្យដឹងថា រថយន្តប្រភេទធុនធំ (បាកុង) ចំនួន៦គ្រឿងដែលសង្ស័យថា ជាមធ្យោបាយបំរើឱ្យបទល្មើព្រៃឈើ ត្រូវបានបំផ្លាញចោល ដោយការចាក់ប្រេងដុតនៅក្បែរផ្លូវជាតិលេខ៧៨ ស្ថិតក្នុងភូមិស្រែស្រណុក ឃុំក្បាលរមាស ស្រុកសេសាន កាលពីម៉ោងជិត១២ថ្ងៃត្រង់ ថ្ងៃទី១៤ ខែកក្កដា ឆ្នាំ២០១៩។
ក្នុងព្រឹត្តិការណ៍ជាលើកទី១ នៃការកម្ទេចដុតបំផ្លាញចោលរថយន្តដែលមានតម្លៃខ្ទង់សែនដុល្លារនេះ គឺធ្វើឡើងបន្ទាន់នៅខេត្តផ្សេងទៀតជោគជ័យនៃការដុតកម្ទេចចោលនេះដែរ ដូច្នេះមានខេត្តចំនួន៣ ក្នុងនោះមានខេត្តមណ្ឌលគិរី បន្ទាប់មកខេត្តក្រចេះ និងខេត្តស្ទឹងត្រែង។
ប្រតិបត្តិការខាងលើនេះ ដឹកនាំដោយលោក ឈាត វាសនា មេបញ្ជាការស្តីទី និងលោក ដួង វិចិត្រ មេបញ្ជាការរងទទួលការងារសន្តិសុខ និងបង្ក្រាបបទល្មើសព្រៃ លោក សុវណ្ណ ពិសិដ្ឋ អភិបាលស្រុកសេសាន លោក ចៅ មុន្នីរ៉ា នាយករដ្ឋបាលសាលាខេត្តតំណាងឱ្យលោកអភិបាលខេត្ត និងអាជ្ញាធរថ្នាក់ភូមិ-ឃុំផងដែរ។
បើតាមការឱ្យដឹងនៃដើមចមដែលជាហេតុនាំឱ្យមានការដុតបំផ្លាញចោលរថយន្តខាងលើនេះត្រូវបានគេបង្ហើបឡើងថា រថយន្តទាំង៦គ្រឿងខាងលើ ជាវត្ថុតាងដែលបានបំរើឱ្យមានសកម្មភាពបំផ្លិចបំផ្លាញធនធានព្រៃឈើនៅខេត្តមណ្ឌលគិរី។ ក្រោយកងរាជអាវុធហត្ថលោកឧត្តមសេនីយ៍ សៅ សុខា បញ្ចេញកណ្តាប់ដៃដែកបញ្ជាផ្ទាល់ឱ្យចាប់ដុតចោលនៅនឹងកន្លែងរាល់វត្ថុតាងបំរើឱ្យបទល្មើសព្រៃឈើ រួមមានរថយន្ត ម៉ូតូ និងគោយន្តកែច្នៃផងនោះ ។
ចំណែករថយន្តទាំង៦គ្រឿងខាងលើនេះ គឺបានបើកគេចពីស្រុកកោះញែក មកលាក់ទុកនៅស្រុកសេសាន ទើបកម្លាំងកងរាជអាវុធហត្ថចុះស្រាវជ្រាវ រហូតរឹបអូសនៅមុខសាលាអនុវិទ្យាល័យស្រែស្រណុក ចំនួន៤គ្រឿង និងនៅភូមិច្រប់ចំនួន២គ្រឿង។
ប្រភពដដែលនោះថា ខណៈកម្លាំងកងរាជអាវុធហត្ថរឹបអូសពុំមានបុគ្គលណាម្នាក់ចេញមុខ អះអាងជារថយន្តរបស់ខ្លួនឡើយ។ (កែសម្រួលដោយ ៖ បុប្ផា)
ចែករំលែកព័តមាននេះ