រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា បុរសម្នាក់រងរបួសធ្ងន់ធ្ងរ បែកក្បាលហូរឈាមតាមត្រចៀក គ្មានសង្ឃឹមថារស់ តែដើម្បីឲ្យអស់ចិត្ត ត្រូវបានដឹកតាមរថយន្តគ្លីនិកឯកជនយកទៅសង្គ្រោះ បន្ទាប់ពីជនរងគ្រោះបើកម៉ូតូឆ្លងផ្លូវ ត្រូវបានរថយន្តកុងតឺន័រព្យាយាមបើកគេចដែរ តែមិនផុតក៏ជ្រុលទៅបុកម៉ូតូកៀបជាប់ពីក្រោមរថយន្ត បង្កការភ្ញាក់ផ្អើលកាលពីវេលាម៉ោង៧និង២០នាទីយប់ថ្ងៃទី១៣ ខែកក្កដា ឆ្នាំ២០១៩ ស្ថិតនៅតាមមហាវិថីឈ្នះ ឈ្នះ ភូមិត្រពាំងទា សង្កាត់ត្រពាំងក្រសាំង ខណ្ឌពោធិសែនជ័យ ។
ភាគីខាងម៉ូតូមួយគ្រឿងម៉ាកហុងដា ធុនសេ១២៥ ស៊េរី២០១៥ ពណ៌ខ្មៅ ពាក់ស្លាកលេខ ភ្នំពេញ ១CW-០៣២២ បើកបរដោយឈ្មោះ សាយ ឆាន់យ៉ា ភេទប្រុស អាយុ២៨ឆ្នាំ មុខរបរកម្មកររោងចក្រ ស្នាក់នៅភូមិព្រៃទា សង្កាត់ចោមចៅ៣ ខណ្ឌពោធិសែនជ័យ បានរងរបួសធ្ងន់ បែកក្បាលហូរឈាមតាមត្រចៀក ។ ចំណែករថយន្តកុងតឺន័រ ពណ៌បៃតង ពាក់ស្លាកលេខ ភ្នំពេញ ៣C-១៥៤៧ បើកបរដោយឈ្មោះ ពេជ្រ សុខហេង ភេទប្រុស អាយុ៣៦ឆ្នាំ មុខរបរបើកបររថយន្តក្រុមហ៊ុនតេង ឡាយ ស្នាក់នៅក្រុមហ៊ុន ត្រូវសមត្ថកិច្ចចាប់ឃាត់ខ្លួន។
តាមប្រភពព័ត៌មានបានឲ្យដឹងថា មុនកើតហេតុ គេឃើញបុរសរងគ្រោះ បានបើកឆ្លងផ្លូវពីលិចទៅកើត លុះមកដល់ចំណុចកើតហេតុ ស្របពេលមានរថយន្តកុងតឺន័របើកពីជើងទៅត្បូង ហើយព្យាយាមគេចទៅឆ្វេងដែរ ក៏ប៉ុន្តែបុរសរងគ្រោះនៅតែបន្តបើកបរម៉ូតូឆ្លងផ្លូវ ក៏ត្រូវរថយន្តកុងតឺន័រជ្រុលទៅបុកម៉ូតូកល់ជាប់ពីក្រោមតែម្តង បណ្តាលឲ្យអ្នកបើកបរម៉ូតូរងរបួសបែកក្បាលហូរឈាមតាមត្រចៀក សង្ឃឹមរស់តិចណាស់ ។
ក្រោយកើតហេតុ ដោយមិនអស់ចិត្ត សមត្ថកិច្ច និងប្រជាពលរដ្ឋ សុំឲ្យរថយន្តគ្លីនិកឯកជន ជួយដឹកយកជនរងគ្រោះទៅសង្គ្រោះនៅមន្ទីពេទ្យព្រះកុសុមះ ។ ចំណែកអ្នកបើកបររថយន្ត ព្រមទាំងរថយន្តកុងតឺន័រ និងម៉ូតូត្រូវបានសមត្ថកិច្ចនាំទៅកាន់ប៉ុស្តិ៍ត្រពាំងក្រសាំង និងរង់ចាំប្រគល់ឲ្យការិយាល័យចរាចរណ៍ជើងគោកស្នងការក្រុងភ្នំពេញ ។
អស់រយៈពេលជិតមួយម៉ោង ក្រោយមានការផ្សព្វផ្សាយព័ត៌មានស្វែងរកគ្រួសារ ទើបគេឃើញ ស្ត្រីជាប្រពន្ធរបស់ជនរងគ្រោះមកដល់កន្លែងកើតហេតុ ៕ (កែសម្រួលដោយ ៖ ធីតា)
ចែករំលែកព័តមាននេះ