ខេត្តស្វាយរៀង ៖ តាមសេចក្តីរាយការណ៍បឋមបានឱ្យដឹងថា ខ្ទមកំសត់របស់លោកយាយវ័យ៧៩ឆ្នាំម្នាក់ដែលរស់នៅជាមួយចៅពីរនាក់តូចៗ ត្រូវបានអគ្គិភ័យលេបត្របាក់អស់គ្មានសល់ ។ ហេតុការណ៍ខាងលើនេះបានកើតឡើងកាលពីវេលាម៉ោង៥និង១០នាទីព្រឹកថ្ងៃទី១៣ ខែកក្កដា ឆ្នាំ២០១៩ នៅភូមិត្រពាំងពោន…
ខេត្តស្វាយរៀង ៖ តាមសេចក្តីរាយការណ៍បឋមបានឱ្យដឹងថា ខ្ទមកំសត់របស់លោកយាយវ័យ៧៩ឆ្នាំម្នាក់ដែលរស់នៅជាមួយចៅពីរនាក់តូចៗ ត្រូវបានអគ្គិភ័យលេបត្របាក់អស់គ្មានសល់ ។
ហេតុការណ៍ខាងលើនេះបានកើតឡើងកាលពីវេលាម៉ោង៥និង១០នាទីព្រឹកថ្ងៃទី១៣ ខែកក្កដា ឆ្នាំ២០១៩ នៅភូមិត្រពាំងពោន ឃុំធ្មា ស្រុករំដួល។
បើតាមលោកស្រី ពេជ្រ ស្រីមុំ ជំទប់ទី១ឃុំធ្មា បានប្រាប់ឲ្យដឹងថា លោកយាយរងគ្រោះឈ្មោះសំ សាំ អាយុ៧៩ឆ្នាំ រស់នៅជាមួយចៅតូចៗពីរនាក់ ក្នុងនៅភូមិឃុំកើតហេតុខាងលើ។
តាមប្រភពពីលោកស្រីជំទប់ទី១ឃុំធ្មាបានបន្តទៀតថា មូលហេតុបណ្តាលឱ្យមានអគ្គិភ័យឆាបឆេះខ្ទមរបស់លោកយាយខាងលើត្រូវបានគេសង្ស័យថាមកពីដុតធូប និងដុតចង្កៀងចោល ហើយភ្លើងចង្កៀងឆាបឆេះមុង រួចរាលដាលឆេះខ្ទមទាំងមូលតែម្តង។
ខ្ទមរបស់លោកយាយរងគ្រោះដែលត្រូវភ្លើងឆេះខាងលើមានទំហំ៤ម៉ែត្រ×៥ម៉ែត្រ ជញ្ជាំងស្លឹក ដំបូលប្រក់ស័ង្កសី បានរងការខូចខាតអស់ទាំងស្រុង និងឆេះសម្ភាររងខូចខាតរួមមាន កន្ទេល មុង ភួយ ខ្នើយ អង្ករចំនួន១ធុងប៉េត្រូ គ្រែមួយ ធុងប៉េត្រូចំនួន៣ និងសម្ភារមួយចំនួនទៀត ត្រូវបានឆេះអស់ទាំងស្រុង។
តាមប្រភពពីលោកស្រីជំទប់ទី១ឃុំធ្មាដែលបានចុះទៅផ្ទាល់ដល់កន្លែងកើតហេតុបានសម្តែងការសោកស្តាយជាពន់ពេក ដែលលោកយាយមានជីវភាពក្រីក្រយ៉ាងខ្លាំងហើយរស់នៅជាមួយចៅតូចៗពីរនាក់ទៀត ស្រាប់តែជួបគ្រោះអកុសលត្រូវភ្លើងឆេះខ្ទមអស់បែបនេះ។
លោកស្រីជំទប់ទី១ឃុំធ្មាក៏សូមអំពាវនាវដល់សប្បុរសជនក្នុងនិងក្រៅប្រទេស សូមមេត្តាជួយដល់លោកយាយផង នាគ្រាដែលគាត់ជួបទុក្ខធំបាត់បង់ខ្ទមដែលកំពុងរស់នៅ។
តាមប្រភពពីលោកយាយរងគ្រោះបានបញ្ជាក់ថា កាលពីយប់កើតហេតុ គាត់បានពន្លត់ភ្លើងធូប និងចង្កៀងអស់ហើយ ចុះហេតុអ្វីក៏មានភ្លើងឆេះទៀត គាត់សង្ស័យថាមានគេលួចដុតខ្ទមរបស់គាត់ និងសូមឲ្យសមត្ថកិច្ចស្រាវជ្រាវករណីនេះផង ៕ (កែសម្រួលដោយ ៖ ធីតា)
ចែករំលែកព័តមាននេះ