ខេត្តរតនគិរី-មណ្ឌលគិរី ៖ ព័ត៌មានចុងក្រោយនៅរសៀលថ្ងៃ១២ កក្កដា នោះ ឧកញ៉ា ស៊ឹង សំអុល និងបក្សពួកដែលត្រូវបានចាប់ខ្លួន ត្រូវតុលាការសម្រេចឃុំខ្លួនបណ្ដោះអាសន្ននៅពន្ធនាគារ បន្ទាប់ពីត្រូវចោទប្រកាន់៤ បទល្មើសពាក់ព័ន្ធនិងបទឧក្រិដ្ឋព្រៃឈើ ។
សូមបញ្ជាក់ថា បន្ទាប់់ពីឈ្មួញឈើដុះស្លែមានងារជាឧកញ៉ាម្នាក់នេះ ត្រូវបានគណៈកម្មការជាតិដើម្បីទប់ ស្កាត់និងបង្ក្រាបបទល្មើសធនធានធម្មជាតិ ចាប់ឃាត់ខ្លួនបញ្ជូនទៅសាលាដំបូងខេត្តមណ្ឌលគិរីនោះ ប្រតិ បត្តិការនេះ ក៏កំពុងធ្វើឲ្យកក្រើកពេញផ្ទៃប្រទេស ព្រោះតែ កម្ទេចវត្ថុតាងនៅនឹងកន្លែងដែលមិនធ្លាប់មាន ។
សេចក្តីរាយការណ៍បានឲ្យដឹងថា នារសៀលថ្ងៃទី១១ ខែកក្កដា ឧកញ៉ា ស៊ឹង សំអុល និងអ្នកពាក់ព័ន្ធដែលត្រូវបានកម្លាំងគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ ឃាត់ខ្លួនសួរចម្លើយពីបទល្មើសព្រៃឈើតាំងពីថ្ងៃ៩ ខែកក្កដា នៅបញ្ជាការដ្ឋានកងរាជអាវុធហត្ថខេត្តមណ្ឌលគិរី់ ត្រូវបានបញ្ជូនទៅសាលាដំបូងខេត្ត ។
ព្រះរាជអាជ្ញារងនិងជាអ្នកនាំពាក្យសាលាដំបូងខេត្តមណ្ឌលគិរី លោក ម៉ម វ៉ាន់ដា បានឲ្យដឹងនៅល្ងាចថ្ងៃទី១១ ខែកក្កដាថា ក្នុងចំណោមមនុស្ស៤នាក់ មាន៣នាក់ជាប់ពាក់ព័ន្ធត្រូវបាន បញ្ជូនមកសាលាដំបូងខេត្ត ក្នុងនោះមាន លោក ស៊ឹង សំអុល ម្នាក់ដែរ ។ ការសាកសួរលោក សុឹង សំអុល និងមនុស្ស២នាក់ទៀតមិនទាន់បញ្ចប់ទេ រង់ចាំសួរបន្តនៅថ្ងៃទី១២ ខែកក្កដាទៀត ហើយលោក ស៊ឹង សំអុល និងអ្នកពាក់ព័ន្ធបានបញ្ជូនទៅផ្ញើនៅបញ្ជាការដ្ឋានកងរាជអាវុធហត្ថខេត្ត១យប់សិន ។
ដោយឡែក នៅខេត្តរតនគិរី នាថ្ងៃទី១១ខែកក្កដា រថយន្តឡង់គ្រីស្ស័រកែច្នៃចំនួន២គ្រឿងដឹកឈើឆ្លងដែនទៅប្រទេសវៀតណាម បានត្រូវកម្លាំងកងរាជអាវុធហត្ថស្រុកអូរយ៉ាដាវ សហការជាមួយមន្ត្រីរដ្ឋបាលព្រៃឈើ និងអាជ្ញាធរមូលដ្ឋានស្ទាក់ចាប់បាន កាលពីវេលាម៉ោងប្រមាណ១០និង២០នាទីព្រឹកថ្ងៃទី១១ ខែកក្កដា នៅភូមិប៉ក់ធំឃុំប៉ក់ញ៉ៃ ស្រុកអូរយ៉ាដាវ ត្រង់ចំណុចផ្លូវក្រុមហុ៊ន៧៤ ។
ប្រភពពីសមត្ថកិច្ចថា រថយន្តឡង់គ្រីស្ស័រដឹកឈើទាំង២គ្រឿងនេះគ្មានផ្លាកលេខទេ ដែលមួយគ្រឿងពណ៌ស និងមួយគ្រឿងទៀតពណ៌ខ្មៅ ។ រថយន្តទាំង២គ្រឿងនេះ ដឹកឈើប្រភេទសុក្រំនិងពពូលថ្មចំនួន៣៤កំណាត់ មុខកាត់ចាប់ពី២០សង្ទីម៉ែត្រទៅ៣០សង្ទីម៉ែត្រ ប្រវែងពី៣ម៉ែត្រទៅ៥ម៉ែត្រ បម្រុងឆ្លងដែនទៅវៀតណាម។ មានការកត់សម្គាល់ថា នៅក្នុងការបង្ក្រាបលើកនេះខុសពីលើកមុនៗ ដោយបានប្រគល់ឈើទៅឲ្យសមត្ថកិច្ចជំនាញរក្សាទុក ចំណែករថយន្តយកទៅកម្ទេចចោល ។
នៅក្នុងខេត្តរតនគិរីក៏មិនខុសនៅខេត្តមណ្ឌលគិរីដែរ កណ្តាប់ដៃដែករបស់លោកឧត្តមសេនីយ៍ ត្រី ថាវ យេន មេបញ្ជាការកងរាជអាវុធហត្ថខេត្តរតនគិរី ដោយមានការសម្របសម្រួលពីលោក លាង អូ៊ ព្រះរាជអាជ្ញារងអមសាលាដំបូងខេត្ត បានយករថយន្តឡង់គ្រីស្ស័រកែច្នៃដឹកឈើទាំង២គ្រឿងទៅកម្ទេចចោលនៅមុខស្នាក់ការសន្តិសុខកងរាជអាវុធហត្ថ៧៨២ ស្ថិតក្នុងភូមិសោម ត្រក ឃុំសោមធំ ស្រុកអូរយ៉ាដាវ នាល្ងាចថ្ងៃដដែលនោះ ។
សូមរំឭកថា ក្នុងប្រតិបត្តិការបង្ក្រាបបទ ល្មើសព្រៃឈើនៅខេត្តមណ្ឌលគិរី កម្លាំងគណៈកម្មការជាតិទប់ស្កាត់និងបង្ក្រាបបទល្មើសធន ធានធម្មជាតិ ដឹកនាំដោយនាយឧត្តមសេនីយ៍ សៅ សុខាអគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថ លើផ្ទៃប្រទេស បានចុះបង្ក្រាបទ្រង់ទ្រាយធំ កាលពីរសៀលថ្ងៃទី៩ ខែកក្កដា ឆ្នាំ២០១៩ ចាប់ខ្លួនមនុស្ស៤នាក់ ក្នុងនោះមានមេការក្រុមហ៊ុន២នាក់អ្នកបើករថយន្តម្នាក់ និងប្រធានក្រុមហ៊ុនម្នាក់ ឈ្មោះឧកញ៉ា ស៊ឹង សំអុល ។ (សម្រួលដោយ៖ ស្រីណា)
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ