មនុស្សគ្រប់រូបដឹងថា ខ្លួនត្រូវតែសន្សំលុយ ប៉ុន្តែការធ្វើវាមិនងាយស្រួល ដូចការនិយាយឡើយ។ អ្នក ជំនាញផ្នែកលុយជាច្រើនផ្តល់យោបល់ឲ្យសន្សំប្រមាណ១០ ទៅ២០%នៃប្រាក់ចំណូលរបស់ខ្លួន ជារៀងរាល់ខែ ប៉ុន្តែវាក៏មិនងាយស្រួលដែរ ខណៈដែលការចំណាយរបស់មនុស្សជាច្រើនចេះតែកើនឡើង។ យ៉ាងណាក្តី វាមិនមែនជារឿងដែលមិនអាចទៅរួចទេ។ ដើម្បីផ្តល់ភាពងាយស្រួលក្នុងការសន្សំថវិកា អ្នកអាចសាកល្បងវិធីខាងក្រោមបាន៖
១. កុំចាយក្រដាសប្រាក់៥ដុល្លារ
ប្រសិនបើអ្នកជាមនុស្សចាយប្រាក់ អ្នកអាចរៀបសន្សំបាន ដោយគ្រាន់តែទុករាល់ក្រដាសប្រាក់៥ដុល្លារ ឬ២ម៉ឺនរៀល ។ បន្ទាប់មក អ្នកត្រូវកំណត់រយៈពេលដែលអ្នកចង់សន្សំ ឧទាហរណ៍ដូចជា៦ខែ ឬ៣ខែជាដើម រួចអ្នកនឹងមានប្រាក់សល់ជាក់ជាមិនខាន ។ ប្រាកដណាស់ វិធីនេះ អាចមានប្រសិទ្ធិភាពទៅបានប្រសិនបើអ្នកមិនបង្កើនការចំណាយផងដែរ ។ ប្រសិនបើអ្នកទម្លាប់ចាយវាយមួយខែ២០០ដុល្លារនោះ អ្នកគួរតែរក្សាចំនួននេះ។
វិធីមួយទៀត គឺការសន្សំលុយរាយទុក ។ អ្នកអាចទុកក្រដាសប្រាក់១ដុល្លារ ១០០រៀល ៥០០រៀល ១០០០រៀល ឬ២០០០រៀលជាដើម និងហាមខ្លួនកុំឲ្យចាយប្រាក់ទាំងអស់ រហូតដល់ពេលណាមួយជាកំណត់ ។ ឧទាហរណ៍ ដូចជាអ្នកសន្សំ១ដុល្លារក្នុងមួយថ្ងៃ ហើយអ្នកបន្តធ្វើដូច្នេះបាន៣ខែនោះ អ្នកទទួលបានប្រមាណ៩០ដុល្លារទៅហើយ។
លើសពីនេះទៅទៀត មនុស្សភាគច្រើនចៀសវាងការចាយវាយពេលដែលពួកគេមានក្រដាសប្រាក់ធំក្នុងខ្លួន ដូច្នេះការយកក្រដាសប្រាក់ដុំជាប់ខ្លួន ក៏អាចកាត់បន្ថយការចំណាយអ្នកដែរ។
២-ឧស្សាហ៍លុប Browsing History
យុវវ័យជាច្រើនចូលចិត្តការទិញទំនិញលើអ៊ីនធើណែតឬលើប្រព័ន្ធសង្គម ។ វិធីមួយដែលអាចកាត់បន្ថយការខ្ជះខ្ជាយថវិកាលើអ្វីដែលខ្លួនមិនត្រូវការនោះ គឺការកាត់បន្ថយការប្រើប្រាស់ប្រព័ន្ធសង្គម ឬឧស្សាហ៍លុប Browsing History ព្រោះទូរស័ព្ទនិងកុំព្យូទ័ររបស់យើងប្រមូលរាល់ទិន្នន័យដែលយើងបាន Search រក ឬមើល។ ដូច្នេះអ្នកដែលឧស្សាហ៍ចុចលើ Page ដែលលក់សម្ភារៈផ្សេងៗនិងឧស្សាហ៍ឃើញហាងដទៃដែលលក់ផលិតផលដូចគ្នាហើយ។
៣-ទុកលុយក្នុងគណនីសន្សំ
ប្រសិនបើអ្នកជាបុគ្គលិក ដែលបើកប្រាក់បៀវត្សរ៍ជាសាច់ប្រាក់ ឬមានគណនីធនាគារច្រើន អ្នកគួរតែប្រញាប់វេរលុយ ឬយកប្រាក់បៀវត្សរ៍ទៅដាក់ក្នុងគណនីសន្សំភ្លាមៗ បន្ទាប់ពីពេលបើកប្រាក់បៀវត្សរ៍។ មនុស្សយើងតែងតែរមាស់ដៃចង់ចាយវាយពេល ដែលមានលុយជាប់ខ្លួនច្រើន ដូច្នេះការយកវាទៅដាក់ក្នុងគណនីធនាគារអាចជួយកាត់បន្ថយការចំណាយផងដែរ។ (សម្រួលដោយ៖ ស្រីណា)
ចែករំលែកព័តមាននេះ