រាជធានីភ្នំពេញ ៖ ក្រុមហ៊ុន Davitra Cambodia Co.,Ltd និងក្រុមហ៊ុនឆ្នោតមហាសំណាង បានសហការគ្នាក្នុងការបង្កើតយុទ្ធនាការប្រឹក្សាយោបល់ អាហារូបករណ៍និងការសិក្សានៅក្រៅប្រទេសដោយឥតគិតថ្លៃ ។ យុទ្ធនាការនេះ គឺជាការផ្ដល់ឱកាសដ៏ល្អមួយដល់និស្សិតកម្ពុជា ក្នុងការទទួលបានឱកាសសិក្សានៅក្រៅប្រទេសដោយឥតគិតថ្លៃពីក្រុមហ៊ុនទាំងពីរ ។
ថ្លែងនៅក្នុងសន្និសីទសារព័ត៌មានមួយកាលពីថ្ងៃទី១១ កក្កដា ២០១៩ លោកអ៊ឹម ច័ន្ទបូរ៉ាជាតិ សហស្ថាបនិក និងជានាយកប្រតិបត្តិរបស់ក្រុមហ៊ុន Davitra Cambodia Co.,Ltd បានមានប្រសាសន៍ថា ការសិក្សានៅក្រៅប្រទេសគឺជាក្តីស្រម៉ៃរបស់សិស្សានុសិស្សគ្រប់ៗគ្នា ដូច្នេះដើម្បីឱ្យក្ដី ស្រម៉ៃសិស្សនិស្សិត ក្រុមហ៊ុនយើងក៏បានសហការជាមួយក្រុមហ៊ុនខ្មែរមហាសំណាង ដើម្បីផ្ដល់ការពិគ្រោះយោបល់ស្តីពីការត្រៀម និងរៀបចំដាក់អាហារូបករណ៍ទៅសិក្សាក្រៅប្រទេសជូនសិស្សនិស្សិតនៅកម្ពុជា ដើម្បីជួយជ្រោមជ្រែង និងបើកឱកាសឱ្យសិស្សនិស្សិតនៅកម្ពុជា បានយល់ដឹងពីប្រព័ន្ធអប់រំនៅប្រទេសដទៃទៀតក្នុងសកលលោក ព្រមទាំងជួយជ្រោមជ្រែងពួកគាត់ក្នុងការចាប់យកឱកាសទៅសិក្សានៅក្រៅប្រទេសក្នុងក្ដីស្រម៉ៃតាមរយៈការទទួលបានអាហាររូបករណ៍ ក៏ដូចជាការសិក្សាបង់ថ្លៃ ។
លោកបន្តថា ក្រុមហ៊ុន Davitra ជាក្រុមហ៊ុនប្រឹក្សាយោបល់តែមួយគត់ដែលមានអ្នកពិគ្រោះដែលមានចំណេះជំនាញនិងវិជ្ជាជីវៈច្បាស់លាស់ពាក់ព័ន្ធនឹងការដាក់អាហារូបករណ៍ទៅសិក្សានៅក្រៅប្រទេស ដោយក្រុមហ៊ុនមាន អ្នក ជំនាញ សុទ្ធតែជាសាស្ត្រាចារ្យ និងបុគ្គលដែលធ្លាប់ទៅសិក្សានៅសាកលវិទ្យាល័យលំដាប់កំពូលក្នុងសកល លោកដូចជាសាកលវិទ្យាល័យ National University of Singapore សាកលវិទ្យាល័យ Lund នៅស៊ុយអែត , សាកល វិទ្យាល័យ Kobe នៅជប៉ុន សាកលវិទ្យាល័យ Nottiqham នៅចក្រភពអង់គ្លេស សាកលវិទ្យាលយ UIBE នៅប្រទេសចិន សាកលវិទ្យាល័យ Central Euopean University នៅហុងគ្រី និងសាកលវិទ្យាល័យ AIT នៅប្រទេសថៃជាដើម ។
កញ្ញាជិន និកាប្រធានទំនាក់ទំនងសាធារណៈនៃក្រុមហ៊ុនខ្មែរមហាសំណាង បានអោយដឹងថា ដើម្បីចូលរួមលើកស្ទួយវិស័យអប់រំនៅក្នុងប្រទេសកម្ពុជាឱ្យកាន់តែមានភាពទូលំទូលាយ និងរីកចម្រើនបន្ថែមទៀត ក្រុមហ៊ុនខ្មែរមហាសំណាង បានសហការជាមួយក្រុមហ៊ុន Davitra Cambodia ផ្ដួចផ្ដើម គំនិតរួមគ្នាបង្កើតយុទ្ធនាការប្រឹក្សាពិគ្រោះយោបល់អាហារូបករណ៍ និងការសិក្សាក្រៅប្រទេសឥតគិតថ្លៃ ជូនសិស្សនិស្សិតចាប់ពីវិទ្យាល័យដល់មហាវិទ្យាល័យ នៅទូទាំងរាជធានីខេត្តក្នុងប្រទេសកម្ពុជា ។
កញ្ញាបន្តថាសកម្មភាពសប្បុរសធម៌សង្គមដ៏សំខាន់មួយនេះ ជាគំនិតផ្ដួចផ្ដើមរបស់ក្រុមហ៊ុន Davitra Cambodia និងក្រុមហ៊ុនខ្មែរមហាសំណាងនិងធ្វើការឃោសនាផ្សព្វផ្សាយ បញ្ជ្រាបព័ត៌មានជូនដល់ប្អូនៗសិស្សនិស្សិតនៅតាមបណ្ដាខេត្តក្រុងនានា តាមរយៈយុទ្ធនាការ ផ្សព្វផ្សាយប្រគុំតន្ត្រី ដែលនឹងប្រព្រឹត្តិទៅទូទាំង២៥ខេត្តក្រុង ក្រោមប្រធានបទ តន្ត្រីអាហារូបករណ៍មហាសំណាងចូលរួមសម្ដែងដោយក្រុមតារាចម្រៀងល្បីៗក្នុងប្រទេសកម្បុជា ៕
កែសម្រួលដោយ ៖ សំណាង
ចែករំលែកព័តមាននេះ