ខេត្តត្បូងឃ្មុំ៖ ជំងឺប៉េសជ្រូកអាហ្វ្រិក បានផ្ទុះឡើងនៅក្នុងភូមិចំនួនពីរ គឺភូមិកំពូលសេរី និងភូមិសោយ
ឃុំមៀន ស្រុកអូររាំងឪ ដោយបានងាប់ជាបន្តបន្ទាប់ និងកើនដល់ជិត៨០ក្បាលហើយ ចាប់តាំងពីថ្ងៃទី២៣មិថុនា ដល់ថ្ងៃទី១១ កក្កដា ២០១៩ ។ ជាមួយនោះ អាជ្ញាធរគ្រប់លំដាប់ថ្នាក់និងស្ថាប័នជំនាញបាននៅប្រចាំការចុះបាញ់ថ្នាំសម្លាប់មេរោគរាល់ថ្ងៃផងដែរ ។
ជាមួយនោះ អ្នកចិញ្ចឹមជ្រូកមួយចំនួន បានសុំលក់ជ្រូករស់ក្រែងបានលុយ មកសងធនាគារឯកជនខ្លះតែមិនត្រូវបានជំនាញអនុញ្ញាតនោះទេ ព្រោះបើដឹកចេញពីតំបន់ផ្ទុះទៅកាន់កន្លែងផ្សេង គឺដូចយកមេរោគទៅជាមួយនឹងធ្វើឲ្យជំងឺនេះកាន់តែរីកសាយភាយ។
បុរសឈ្មោះឃុន ស៊ុយ វ័យ៥៨ឆ្នាំ នៅភូមិបុសល្ហុង ឃុំអំពិតតាពក ប្រាប់ថាៈ គាត់បានចាប់ផ្តើមចិញ្ចឹម
ជ្រូកក្នុងរយៈប្រហែល៤ឆ្នាំមកហើយ ចិញ្ចឹមម្តងមានជ្រូកជិត១០ក្បាល ដោយលក់ឲ្យឈ្មួញយកទៅកាប់សាច់លក់លើទីផ្សារ ទទួលបានផលចំណេញឲ្យកូនៗបានរៀនសូត្រ មានចំនេះដឹងខ្ពស់នឹងគេហើយមិនដែលអី ក៏បានចិញ្ចឹមបន្តមកដល់សព្វថ្ងៃនេះ។
បុរសឃុន ស៊ុយ បន្តថា ស្រាប់មកដល់ក្នុងខែកក្កដា២០១៩ ជ្រូករបស់គាត់បានចាប់ផ្តើមឈឺបន្តបន្ទាប់ លុះពេលចាក់ថ្នាំបានធូរ២ទៅ៣ថ្ងៃក៏ងាប់ជ្រូកក្នុង១ក្បាល ដោយមានទង្ងន់ពី៧០ទៅ៨០គីឡូក្រាមហើយបែរជាត្រូវងាប់ក្នុងចំណោម៧ក្បាលនៅសល់តែ២ក្បាលប៉ុណ្ណោះ គាត់សង្ស័យកើតជំងឺប៉េសជ្រូកអាហ្វ្រិកទើបនៅព្រឹកថ្ងៃទី១១កក្កដា បានមកសុំថ្នាំសម្រាប់យកទៅបាញ់សម្លាប់មេរោគនៅទ្រុងជ្រូក។
ចំពោះជ្រូកងាប់តំបូងគិតយកទៅលក់ក្រែងបានលុយខ្លះ ក្រោយពីស្តាប់ការពន្យល់របស់ជនាញពេទ្យសត្វរួចមកគាត់មិនបានលក់ទៅណាទេ ដោយបានជីកដីកប់ដាក់កំបោរសម្លាប់មេរោគជាសវាងកុំឲ្យឆ្លងទៅតំបន់ផ្សេង ហើយពីផ្ទះរបស់គាត់មកភូមិសោយ មានចំងាយប្រមាណ៣គីឡូម៉ែត្រគឺស្ថិតនៅក្នុងរង្វង់ហាមមិនឲ្យចរាចរសត្វ។ គាតា់ជំពាក់បំណុលធនាគារឯកជនចំនួនជាង១០០០ដុល្លារនិងចំណីសត្វចំនួន១លានរៀល នៅពេលខាងមុខបើជំងឺនេះស្ងប់ស្ងាត់ គាត់និងចាប់ផ្តើមចិញ្ចើមឡើងវិញព្រោះជីវភាពពឹងផ្អែកលើរបរនេះផងដែរ ។
អ្នកស្រី យី គឹមស៊ាន អាយុ៤៥ឆ្នាំនៅភូមសោយ ឃុំមៀន ប្រាប់ថា គាត់បានចាប់ផ្តើមចិញ្ចឹមជ្រូកក្នុង
អំឡុងតាំងពីឆ្នាំ១៩៩៣មកម្លេះ ដោយមានពេលខ្លះដាក់ជ្រូកក្រោម៥០ក្បាលក៏មានដែរនិងបានទទួល
ផលចំណេញគ្រាន់បើ សម្រាប់ដោះស្រាយជីវភាពគ្រួសារបានធូរស្រាលមួយកំរិត។កន្លងមកធ្លាប់ជួបជំងឺត្រចៀកខៀវតែមិនបានខាតបង់ប្រាក់ច្រើននោះទេ ទើបមកដល់ក្នុងឆ្នាំ២០១៩ជ្រូករបស់គាត់បានឈឺងាប់បន្តបន្ទាប់ដោយជំងឺប៉េសជ្រូកអាហ្វ្រិក អស់១២ក្បាលនៅសល់៦ក្បាល ដោយបានបំបែកដាក់នៅទ្រុងផ្សេង គាត់ចង់លក់ជ្រូកដែលមិនឈឺចេញគ្រាន់នឹងបានថវិការខ្លះ សម្រាប់សងធនាគារឯកជនដោយ ក្នុង១ខែៗបង់ជាង៣០០ដុល្លារ ។
លោកងួន ប៊ុណ្ណាន អភិបាលស្រុកអូររាំងឪប្រាប់ឲ្យដឹងដែរថា រដ្ឋបាលស្រុកអូររាំងឪបានទទួលលិខិត
មួយច្បាប់របស់ក្រសួងកសិកម្មរុក្ខាប្រមាញ់និងនេសាទ ពីការផ្ទុះជំងឺប៉េសជ្រូកអាហ្វ្រិកនៅឃុំមៀន
ស្រុកអូររាំងឪ ភ្លាមៗរូបលោកបានចុះទៅដល់កន្លែងផ្ទុះក្រោមកិច្ចសហការជាមួយនឹងជំនាញបសុព្យា
បាលខេត្តដោយបានបាញ់ថ្នាំសម្លាប់មេរោគ ចែកខិតប័ណ្ណដល់ប្រជាជនឲ្យបានយល់ដឹងនិងចេះពីពិធី
ការពារមិនឲ្យឆ្លង ។
សូមឲ្យប្រជាពលរដ្ឋនៅភូមិកំពូលសេរីនិងភូមិសោយ ក្នុងឃុំមៀន មានការយោគយល់ប្រសិនណាបើមានជ្រូកងាប់ ត្រូវប្រញាប់រាយការណ៏មកស្ថាប័នជំនាញដើម្បីវិធានការយកទៅកប់ចោលក្នុងរណ្តៅឫដុតបំផ្លាញចោល ធ្វើយ៉ាងណារួមគ្នាទប់ស្កាត់កុំឲ្យរីកសាយភាយមេរោគទៅតំបន់ខាងក្រៅ។ហើយយប់ៗបានដាក់កម្លាំងសមត្ថកិច្ច ឲ្យយាមនៅប្រចាំការតាមគោលដៅចំនួន៤ ដើម្បីទប់ស្កាត់មិនឲ្យមានចរាចរសត្វនៅក្នុងតំបន់ហាមឃាត់ ៕ (សម្រួលដោយ៖ ស្រីណា)
ចែករំលែកព័តមាននេះ