សូមកុំចេះតែហ៊ាន …លាយថ្នាំបង្កើតអ័រម៉ូនផ្ទុះលាន់កក្រើកធរណី

ថ្ងៃទី ១១ ខែ កក្កដា ឆ្នាំ ២០១៩
ម៉ោង ១៦:៥០
នីយ៉ា

ខេត្តប៉ៃលិន ៖ ប៊ីដុងដាក់ថ្នាំលាយបញ្ជូលគ្នាបង្កើតជាអ័រម៉ូន ដែលភាសាថៃហៅថាសាន សម្រាប់ដាក់ដើមតាង៉ែនឱ្យចេញផ្កាផ្លែ បានផ្ទុះយ៉ាងកក្រើកបណ្តាលឲ្យមនុស្ស៤នាក់រងរបួសធ្ងន់និងស្រាល ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តភ្លាមៗ ។ នេះជាហេតុការណ៍លើកដំបូងហើយ ជុំវិញការលាយថ្នាំគីមីបង្កើតអ័រម៉ូនស្រោចគល់ដើមឈើហូបផ្លែ ហើយបានក្លាយជាគ្រាប់បែកទៅវិញ ។

ហេតុការណ៍នេះ កើតឡើងកាលពីវេលាម៉ោងប្រមាណ៧និង៣០នាទីយប់ថ្ងៃទី៩ ខែ កក្កដា នៅភូមិអូរពឺត សង្កាត់ទួលល្វា ក្រុងប៉ៃលិន។ប្រភពព័ត៌មាននៅកន្លែងកើតហេតុឲ្យដឹងថា ជនរងគ្រោះបានលាយថ្នាំគីមីបញ្ជូលគ្នាបង្កើតជាអ័រម៉ូន ដែលភាសាថៃហៅថាសាន ដើម្បីយកទៅដាក់ដើមតាង៉ែនឲ្យចេញផ្កាផ្លែ ហើយការលាយនេះគាត់ធ្លាប់ធ្វើកន្លងមកហើយ ។ បន្ទាប់ពីលាយបញ្ជូលគ្នារួច ជនរងគ្រោះបានយកទៅក្រឡុកដើម្បីឲ្យចូលសាច់តែមួយ ស្រាប់តែផ្ទុះលាន់កក្រើកដូចផ្ទុះគ្រាប់មីន បណ្តាលឲ្យជនរងគ្រោះជាម្ចាស់ផ្ទះរងរបួសរហូតសន្លប់នៅនឹងកន្លែង ព្រមទាំងបណ្តាលឲ្យមនុស្ស៣នាក់ផ្សេងទៀតរងរបួសដែរ ។

ប្រភពព័ត៌មានឲ្យដឹងទៀតថា ក្រោយពេលកើតហេតុ គេឃើញវត្តមានលោក ចេន ញ៉ាន់អភិបាលរងខេត្ត និងអធិការនគរបាលក្រុងប៉ៃ លិន ដឹកនាំមន្ត្រីក្រោមឱវាទ ព្រមទាំងមន្ត្រីកម្ចាត់មីន(ស៊ីម៉ាក់) ចុះត្រួតពិនិត្យជាក់ស្តែងនៅនឹងកន្លែង ។ ចំណែកជនរងគ្រោះទាំងអស់ ត្រូវគេបញ្ជូនទៅសង្គ្រោះនៅមន្ទីរពេទ្យបង្អែកខេត្ត។

បើតាមលោក យ៉ែម សារិទ្ធ អធិការនគរបាលក្រុងប៉ៃលិន ឲ្យដឹងថា មូលហេតុដែលបណ្តាលឲ្យមានករណីផ្ទុះផ្អើលនេះ គឺដោយសារជនរងគ្រោះយកថ្នាំគីមីលាយបញ្ជូលគ្នា បង្កើតជាអ័រម៉ូន ឬជីសាន ច្រកដាក់ក្នុងប៊ីដុងរួចក្រឡុក ទើបបណ្តាលឱ្យផ្ទុះ ប្រសិនបើគ្រាន់តែកូរមិនអីទេ តែការក្រឡុកទាំងបង្ខំធ្វើឲ្យជាតិហ្កាសភាយចេញនិងផ្ទុះជាមិនខាន ។

លោកអធិការឲ្យដឹងទៀតថា ជនរងគ្រោះទាំង៤នាក់នេះមាន ៖
១-ឈ្មោះ ធីម រឹម ភេទប្រុស អាយុ៤១ឆ្នាំ មុខរបរលក់ដូរ ជាម្ចាស់ផ្ទះ រស់នៅភូមិអូរពឺត សង្កាត់ទួលល្វា ក្រុងប៉ៃលិន របួសធ្ងន់
២-ឈ្មោះ អ៊ុត សុវណ្ណ ភេទប្រុស អាយុ៤១ឆ្នាំ ជាជាងកាត់កញ្ចក់ រស់នៅភូមិអូរច្រាកើត សង្កាត់ទួលល្វា ក្រុងប៉ៃលិន របួសធ្ងន់
៣-ឈ្មោះ ធីម រតនា ភេទប្រុស អាយុ៨ឆ្នាំ ជាសិស្ស រស់នៅភូមិអូរពឺត សង្កាត់ទួល
ល្វា ក្រុងប៉ៃលិន របួសស្រាល និង
៤-ឈ្មោះ ខាត់ សាឡែន ភេទស្រី អាយុ១៤ឆ្នាំ ជាសិស្ស រស់នៅភូមិអូរពឺត សង្កាត់ទួលល្វា ក្រុងប៉ៃលិន រងរបួសស្រាល ។

អ្នករងរបួសធ្ងន់ ត្រូវបានបញ្ជូនទៅសង្គ្រោះបន្តនៅមន្ទីរពេទ្យខេត្តបាត់ដំបង ចំណែកអ្នករងរបួសស្រាល សម្រាកព្យាបាលនៅមន្ទីរពេទ្យបង្អែកខេត្តប៉ៃលិន ។ចំពោះករណីនេះ មានការលើកឡើងពីមន្ត្រីជំនាញថា ថ្នាំគីមីដែលជនរងគ្រោះយកមកលាយបញ្ចូលគ្នា ជាប្រភេទថ្នាំដែលអាចបង្កគ្រោះថ្នាក់ដល់អាយុជីវិតបាន ហើយប្រសិនជាយើងមិន ចេះជំនាញច្បាស់លាស់ទេ សូមកុំប្រថុយលាយបញ្ចូលគ្នាឲ្យសោះ ព្រោះអាចមានគ្រោះថ្នាក់ជាយថាហេតុដូចករណីខាងលើនេះ ៕ (សម្រួលដោយ៖ ស្រីណា)