រាជធានីភ្នំពេញ៖លោកខុន ច័ន្ទសិទ្ធិការ្យ ស្ថាបនិកយុវជនល្ខោនខោលកម្ពុជា បានបង្ហាញជោគជ័យរបស់ខ្លួននៅក្នុងរយៈពេល៣ឆ្នាំ ជាមួយនឹងសមិទ្ធផលធំសម្រាប់បង្ហាញដល់មហាជនតាមរយៈសិល្បៈបុរាណមួយនេះ ។
លោកខុន ច័ន្ទសិទ្ធិការ្យ កាលពីពេល ថ្មីៗកន្លងមកបញ្ជាក់ថា «ជោគជ័យនេះគឺកើតចេញពីការខិតខំប្រឹងប្រែងរបស់ខ្ញុំនៅក្នុងការហាត់រៀនល្ខោនខោល។ ខ្ញុំប្រឹងឲ្យគេកោតតាមរយៈការតស៊ូ ជាងប្រឹងរអ៊ូឲ្យគេអាណិត ។
តាំងតែបង្កើតក្រុមនេះមក ក្រុមរបស់ខ្ញុំបានធ្វើផ្ទាំងទស្សនីយភាពល្ខោនខោល ធំៗជាច្រើនលើកមកហើយ សម្តែងមិនគិតថ្លៃជូនប្រជាជនបានទស្សនា និងចូលរួមការងារសង្គមផងដែរតាមរយៈជំនាញសិល្បៈនេះ ។
ជាង៣ឆ្នាំនេះខ្ញុំមិនដែលបានចំណាយថវិកាផ្ទាល់ខ្លួន ជំពាក់ ឬយកទ្រព្យសម្បត្តិក្រុមគ្រួសារលក់ដូរ សម្រាប់បម្រើការងារនេះទេ ផ្ទុយទៅវិញគឺមានតែខ្ញុំ និងសមាជិកក្រុមសំបូរការងារធ្វើ និងកាន់តែអភិវឌ្ឍន៍ជំនាញ រៀងៗខ្លួន រួមទាំងមានកិត្តិយសនៅក្នុងសង្គមផងដែរ ។
ខ្ញុំហ៊ាននិយាយថា កិត្យានុភាពនៃសិល្បៈ ដែលយើងកំពុងតែបន្តវេននេះ អាចជួយឲ្យយើងប្រសើរ យើងព្យាយាមឲ្យតម្លៃ និងដាក់វាឲ្យខ្ពស់ បូករួមនិងវិជ្ជាជីវៈច្បាស់លាស់ក្នុងជំនាញ »។
បើតាមលោកខុន ច័ន្ទសិទ្ធិការ្យ ចុងឆ្នាំនេះពួកលោកដែលជាយុវជនល្ខោនខោលកម្ពុជា នឹងបញ្ចប់ការងារដ៏ធំមួយជូនជាតិ នោះគឺការថតជាវីដេអូរឯកសារទុកជាមូលដ្ឋានគ្រឹះក្បាច់ស្វា ។
ក្រុមយុវជនល្ខោនខោលកម្ពុជា បានផ្តួចផ្តើមថត Video មូលដ្ឋានក្បាច់បាតស្វាក្បាច់ និងស្វាពល ដែលសហការជ្រោមជ្រែងពីលោកគ្រូឯកទេសស្វា ដើម្បី Upload ជាសារធាណៈ ជូនជាទុនសម្រាប់អ្នកដែលចង់ហាត់រៀន និងជាការជំនួយស្មារតីសម្រាប់រៀមច្បង និង ប្អូនៗដែលមានការភ្លេចភ្លាំង ឬភាន់ច្រឡំលំដាប់លំដោយ ។
លោកខុន ច័ន្ទសិទ្ធីការ្យ និងកញ្ញាលាវ ច័ន្ទលិកា បានក្លាយជាសិល្បករ សិល្បការិនីតំណាងប្រទេសកម្ពុជា ដែលចេញទៅចូលរួមជាមួយសិល្បករនៃបណ្ដាប្រទេសអាស៊ាន ក្នុងកម្មវិធីសម្ដែងសិល្បៈរួមគ្នា The Best of ASEAN Performing Arts and ASEAN Cultural Roadshow ពីថ្ងៃទី២៨ ដល់ថ្ងៃទី១៦ ខែកក្កដា ឆ្នាំ២០១៩ នៅប្រទេសថៃ រួចបន្តទៅសម្ដែងនៅប្រទេសDenmark និងប្រទេសNetherlands៕ (កែសម្រួលដោយ ៖ បុប្ផា)
ចែករំលែកព័តមាននេះ