រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា អគ្គិសនីកម្ពុជា នឹងផ្លាស់ប្តូរវិក័យប័ត្រតម្លៃទូទាត់ភ្លើងជាភាសាខ្មែរនៅដើមឆ្នាំក្រោយ ។ នេះបើយោងតាមលោក កែវ រតនៈ អគ្គនាយកអគ្គិសនីកម្ពុជា…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា អគ្គិសនីកម្ពុជា នឹងផ្លាស់ប្តូរវិក័យប័ត្រតម្លៃទូទាត់ភ្លើងជាភាសាខ្មែរនៅដើមឆ្នាំក្រោយ ។ នេះបើយោងតាមលោក កែវ រតនៈ អគ្គនាយកអគ្គិសនីកម្ពុជា ។ លោក កែវ រតនៈ បានលើកឡើងក្នុងសម័យប្រជុំពេញអង្គព្រឹទ្ធសភា នាព្រឹកថ្ងៃទី១១ ខែកក្កដា ឆ្នាំ២០១៩នេះថា អគ្គិសនីកម្ពុជានឹងផ្លាស់ប្តូរវិក័យប័ត្រសម្រាប់ការទូទាត់ថវិកាភ្លើងប្រចាំខែជាភាសាខ្មែរដើម្បីឲ្យប្រជាពលរដ្ឋងាយយល់នឹងដឹងពីការប្រើប្រាស់នៅដើមឆ្នាំ២០២០ខាងមុខនេះ។
លោកអគ្គនាយកអគ្គិសនីកម្ពុជា ក៏បានលើមូលហេតុដែលអគ្គិសនីមិនទាន់បានផ្លាស់ប្តូរនៅក្នុងឆ្នាំនេះ ដោយសារតែប្រព័ន្ធទិន្នន័យសម្រាប់ទូទាត់ថវិកាប្រចាំខែនេះ បច្ចុប្បន្ននៅជាប់កុងត្រាជាប្រទេសណូវែលសេឡង់។ លោកបញ្ជាក់ថា «យើងខ្ញុំបានកំពុងកែវិក័យប័ត្រនេះហើយ ប៉ុន្តែបញ្ហាដែលពិបាកនោះ ប្រូក្រាមនោះយើងទិញពីប្រទេសណូវែលសេឡង់ ហើយរាជរដ្ឋាភិបាល តាមរយៈអគ្គិសនីបានទិញប្រើប្រាស់យូរហើយ នឹងជាប់កុងត្រាជាមួយគេ ហើយការកែប្រែទៅជាអក្សរខ្មែរមានការពិបាក ព្រោះថា កម្មវិធីនេះមិនទទួលស្គាល់នឹងកម្មវិធីយូនីកូដរបស់ខ្មែរ អុីចឹងការកែប្រែមានការពិបាក»។
យ៉ាងណាក្តី លោកកែវ រតនៈ ក៏បានគូសបញ្ជាក់ថា «ដោយសារមានការរីកចម្រើនរបស់កម្ពុជាយើងមានក្រុមហ៊ុនមួយអាចធ្វើវិក័យប័ត្រនោះជាភាសារខ្មែរ។ ក្រុមហ៊ុននេះ យកតម្រៃថោកជាងក្រុមហ៊ុននៅក្នុងប្រទេសណូវែសេឡង់ អុីចឹងយើងបានដាក់សាងល្បងរួចហើយ ហើយនឹងដាក់ដំណើរនៅដើមឆ្នាំក្រោយ គឺនឹងចេញវិក័យប័ត្រថ្មី ដែលមានភាសាខ្មែរសឹងតែទាំងអស់ លើកលែងតែពាក្យបច្ចេកទេស ឬខ្នាតអគ្គិសនីទេ« ។
សម្រាប់វិក័យប័ត្រថ្មីនេះដែរ លោក កែវ រតនៈ ក៏បានឲ្យដឹងថា វិក័យប័ត្រនេះអ្នកប្រើប្រាស់ភ្លើងអាចមើលតម្លៃចំណាយប្រចាំខែទាំងតួលេខចាស់ ខែមុន និងតម្លៃបង់សំរាមអស់ប៉ុន្មាន។ លើសពីនេះ វិក័យប័ត្រថ្មីនេះនឹងធ្វើលើសពីវិក័យប័ត្របច្ចុប្បន្ន ដោយដាក់រយៈពេលពីខែ ដើម្បីងាយស្រួលដល់ប្រជាពលរដ្ឋប្រៀបធៀបគ្នា ពីខែមុនប្រើអស់ប៉ុន្មាន ផងដែរ។
លោកបញ្ជាក់ថា «អុីចឹងវិក័យប័ត្រថ្មីនេះ យើងកែដាក់ចំនួនទិន្នន័យពីខែមុន ដែលប្រើហើយ ឲ្យគាត់ដឹង និងប្រៀធៀបថា ការប្រើប្រាស់របស់ជាមធ្យមអស់ប៉ុន្មាន? ជាងនេះដាក់តួលេខមុនៗ ដើម្បីឲ្យគាត់យល់ និងសន្សំសំចៃក្នុងការប្រើប្រាស់ភ្លើងផងដែរ»។ ជាមួយគ្នានោះដេរលោកអគ្គនាយករដ្ឋក៏បានឲ្យដឹងថា ហេតុអ្វីបានជាយើងមិនប្តូរបច្ចុប្បន្ននេះ ព្រោះយើងកំពុងប្តូរទិន្និន័យពីទិន្នន័យដែរ ទិញពីប្រទេសណូវែលសេឡង់ នៅពេលប្តូររួចហើយនឹងចេញនៅដើមឆ្នាំក្រោយ។
សូមជម្រាបថា ការឲ្យដឹងរបស់លោក កែវ រតនៈ បន្ទាប់ពីលោក ម៉ម ប៊ុននាង សមាជិករដ្ឋសភាបានចោទសួរតំណាងរាជរដ្ឋាភិបាលចំពោះបញ្ហាភ្លើងដែលជាចំណុចកង្វល់ប្រជាពលរដ្ឋ។ សមាជិកព្រឹទ្ធសភាលោក ម៉ម ប៊ុន នាង បានសួរចំណុចៗដែលជាកង្វល់របស់ប្រជារាស្ត្រ ពាក់ព័ន្ធនឹងការប្រើប្រាស់ភ្លើងនាពេលបច្ចុប្បន្ន។ ក្នុងសម័យប្រជុំពេញអង្គព្រឹទ្ធសភានាព្រឹកថ្ងៃទី១១ កក្កដា នេះ។
លោក ម៉ម ប៊ុននាងសមាជិក និងជាអ្នកនាំពាក្យបានសួរទៅកាន់តំណាងរាជរដ្ឋាភិបាលការដាច់ភ្លើង ហើយកុងទ័រភ្លើងកើនឡើង? ស្នើឲ្យមន្ត្រីអគ្គិសនីចុះតាមមូលដ្ឋានមួយខែជួបប្រជាពលរដ្ឋម្តង គឺពេលទៅចុះកត់ចំនួនតួលេខកុងទ័រ គួរផ្តល់យោបល់ផង កុំធ្វើឫក និងមានអ្នកខ្លះពេលពលរដ្ឋទៅជិតភ័យខ្លាចសួរទៅវិញ? អីញ្ចឹងសុំធ្វើទំនាក់ទំនងល្អ ហើយធ្វើជាមន្ត្រីបំរើរាស្ត្រ កុំឆ្លើយថាទេ នៅពេលចុះកត់កុងទ័រម្តងៗ ហើយពលរដ្ឋសួរថា ហេតុអ្វីកុងភ្លើងខែនេះឡើង បើមិនសូវប្រើផង ហើយដាច់ភ្លើងញឹក?
សូមឲ្យមន្ត្រីត្រួតពិនិត្យភ្លើងគាត់នៅផ្ទះផង ដោយសារខ្លះមានបញ្ហាដោយសារមានការឆ្លងដោយសារខ្សែភ្លើង ឬឆ្លងព្រីភ្លើង ជាដើម។ លោក ម៉ម ប៊ុននាង បានស្នើសុំយ៉ាងដូច្នេះថា ក៏ស្នើដល់មន្ត្រីអគ្គិសនីជួយផ្តល់យោបល់ដល់ពលរដ្ឋផង ឬបើល្អទៀតសុំឲ្យមន្ត្រីមានឧបករណ៍សម្រាប់ត្រួតពិនិត្យភ្លើងផង ដាក់ខ្សែភ្លើងគាត់ឆ្លងឬអត់ ហើយបើឆ្លងនៅកន្លែងណាផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ