ខេត្តព្រៃវែង ៖ ជ្រូករស់ចំនួន១១ក្បាល ត្រូវបានមន្ត្រីគយនិងរដ្ឋាករ សហការជាមួយនឹងកម្លាំងស្នាក់ការច្រកទ្វារព្រំដែនអន្តរជាតិបន្ទាយចក្រី ចាប់បានខណៈក្រុមឈ្មួញកំពុងដឹកតាមរ៉ឺម៉កម៉ូតូនាំចូលពីប្រទេសវៀតណាម បម្រុងនាំយកទៅកាន់ទីផ្សារ ដោយមិនខ្វល់ពីព័ត៌មានផ្ទុះជំងឺប៉េស្តជ្រូកអាហ្វ្រិកនៅខេត្តស្វាយ រៀងជាប់ព្រំប្រទល់គ្នានោះ ហើយអ្វីដែលហួសចិត្តទៀតនោះគឺនៅវៀតណាមក៏ផ្ទុះជំងឺនេះដែរ…
ខេត្តព្រៃវែង ៖ ជ្រូករស់ចំនួន១១ក្បាល ត្រូវបានមន្ត្រីគយនិងរដ្ឋាករ សហការជាមួយនឹងកម្លាំងស្នាក់ការច្រកទ្វារព្រំដែនអន្តរជាតិបន្ទាយចក្រី ចាប់បានខណៈក្រុមឈ្មួញកំពុងដឹកតាមរ៉ឺម៉កម៉ូតូនាំចូលពីប្រទេសវៀតណាម បម្រុងនាំយកទៅកាន់ទីផ្សារ ដោយមិនខ្វល់ពីព័ត៌មានផ្ទុះជំងឺប៉េស្តជ្រូកអាហ្វ្រិកនៅខេត្តស្វាយ រៀងជាប់ព្រំប្រទល់គ្នានោះ ហើយអ្វីដែលហួសចិត្តទៀតនោះគឺនៅវៀតណាមក៏ផ្ទុះជំងឺនេះដែរ និងត្រូវបានប្រទេសជាច្រើនហាមមិនឱ្យនាំចូល ។
សកម្មភាពបង្ក្រាបបទល្មើសខាងលើនេះ បានធ្វើឡើងកាលពីវេលាម៉ោងប្រមាណ៨និង១៥នាទីយប់ថ្ងៃទី៩ ខែកក្កដា នៅក្បែរច្រករបៀងទួលលោកយាយ ខាងជើងប៉ុស្តិ៍យាមរបស់ សមត្ថកិច្ចប្រមាណ៨០០ម៉ែត្រ ក្នុងឃុំបន្ទាយចក្រី ស្រុកព្រះស្តេច។ប្រភពព័ត៌មានពីមន្ត្រីគយនិងរដ្ឋាករច្រកទ្វារអន្តរជាតិបន្ទាយចក្រី បានឱ្យដឹងថា នាវេលាម៉ោងប្រមាណ៨យប់ថ្ងៃទី៩ ខែកក្កដា ខណៈកំពុងដើរល្បាតនៅក្បែបន្ទាត់ព្រំដែន ស្រាប់តែប្រទះឃើញរ៉ឺម៉កម៉ូតូមួយគ្រឿងរបស់ឈ្មួញឈ្មោះ ភួង ធី ភេទស្រី អាយុ៤២ឆ្នាំ កំពុងដឹកជ្រូករស់ចំនួន១១ក្បាល ។
ពេលឃាត់សួរនាំ ស្ត្រីជាម្ចាស់ជ្រូកបានប្រាប់ថា ជ្រូកទាំងនេះនាំចូលពីប្រទេសវៀតណាមយកទៅកាប់សាច់លក់នៅផ្សារទ្រា ទីរួមស្រុកព្រះស្តេច ប៉ុន្តែពេលសួររកលិខិតអនុញ្ញាតពីមន្ត្រីជំនាញពេទ្យសត្វ បែរ
ជាថា អត់មាន ទើបមន្ត្រីគយនិងរដ្ឋាករ ទាក់ទងសុំការសហការពីកម្លាំងស្នាក់ការច្រកទ្វាអន្តរជាតិបន្ទាយចក្រី ចាប់ឃាត់ជ្រូករស់ទាំងនោះ និងធ្វើកំណត់ហេតុប្រគល់ទៅឱ្យមន្ត្រីពេទ្យសត្វខេត្តនៅយប់នោះតែម្តង។
លោក ចិន វិសាល ប្រធានការិយាល័យផលិតកម្មនិងបសុព្យាបាលនៃមន្ទីរកសិកម្មរុក្ខាប្រមាញ់និងនេសាទខេត្ត បានឲ្យដឹងថា សត្វជ្រូករស់ទាំង១១ក្បាលនេះ មានទម្ងន់សរុប១.១១៦គីឡូក្រាម ត្រូវបានឈ្មួញឈ្មោះ ភួង ធី ភេទស្រី អាយុ៤២ឆ្នាំ មានទីលំនៅក្នុងភូមិស្វាយទោល ឃុំជៃកំពក ស្រុកព្រះស្តេច លួចនាំចូលពីប្រទេសវៀតណាមដោយខុសច្បាប់ ។ បន្ទាប់ពីត្រូវចាប់បាន សត្វជ្រូកទាំងអស់ត្រូវបាននាំយកទៅរក្សាទុកនៅទីសត្តឃាតអ្នកលឿង ដើម្បីបូមឈាមយកទៅពិនិត្យនៅមន្ទីរពិសោធន៍ឯរាជធានីភ្នំពេញ ។
ចំណែកលោក អ៊ុក សំណាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានឱ្យដឹងដែរថា ចំពោះសត្វជ្រូកទាំង១១ក្បាលនេះ បើក្រោយពីពិនិត្យឈាមទៅឃើញថាមានផ្ទុកជំងឺ នោះយើងនឹងធ្វើការកម្ទេចចោលតែម្តង ប៉ុន្តែបើពិនិត្យឃើញថាមិនមានផ្ទុកជំងឺទេ នោះយើងនឹងអនុវត្តវិធានការផាកពិន័យទៅតាមផ្លូវច្បាប់ដែលបានកំណត់ ។ (សម្រួលដោយ៖ស្រីណា)
ចែករំលែកព័តមាននេះ