រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់អត់ដឹងថា មានវិបត្តិអ្វីនៅក្នុងចិត្តនោះទេ ខណៈកំពុងធ្វើការនៅក្នុងរោងចក្រសុខៗប្រាប់ប្រពន្ធថា អត់ស្រួសខ្លួនទេ និងសុំអ្នកគ្រប់គ្រងចេញទៅផ្ទះមុន ស្រាប់តែធ្វើអត្តឃាតចង.កសម្លាប់ខ្លួននៅក្នុងផ្ទះតែម្តង លុះពេលប្រពន្ធត្រឡប់ទៅវិញបើកទ្វារក៏ប្រទះឃើញ ទើបបង្កឲ្យមានការភ្ញាក់ផ្អើលកាលពីម៉ោង៣រសៀល ថ្ងៃទី១០ ខែកក្កដា ឆ្នាំ២០១៩ នៅក្នុងផ្ទះលេខ១២២ ផ្លូវលំ ស្ថិតក្នុងភូមិតាកេរ សង្កាត់កំបូល ខណ្ឌកំបូល (ដែលបានបំបែកចេញពីខណ្ឌពោធិ៍សែនថ្មីៗនេះ)។
បុរសរងគ្រោះខាងលើឈ្មោះ ប៉ែន ស៊ីថាត អាយុ៤៣ឆ្នាំ មុខរបរកម្មកររោងចក្រ មានប្រពន្ធ កូនស្រី២នាក់ រស់នៅក្នុងភូមិ-ឃុំកើតហេតុខាងលើ និងមានស្រុកកំណើតនៅក្នុងឃុំកណ្តាល ស្រុកក្រូចឆ្មារ ខេត្តកំពង់ចាម ។
បើតាមស្ត្រីជាប្រពន្ធប្រាប់ឲ្យនគរបាលដឹងថា កន្លងមក ប្ដីគាត់ជាមនុស្សម្នាក់ធម្មតាទេ ប៉ុន្តែក្រោយមកបានជួបឧប្បត្តិហេតុគ្រោះថ្នាក់ចរាចរណ៍ ហើយប៉ះពាល់ក្បាលធ្ងន់ធ្ងរធ្វើឲ្យក្លាយទៅជាមនុស្សម្នាក់ផ្សេងទៅវិញ ដោយមានស្មារតីខុសប្លែកពីធម្មតា ។លុះដល់ រសៀលថ្ងៃកើតហេតុថ្ងៃទី១០ កក្កដា ខណៈពេលកំពុងធ្វើការសុខៗស្រាប់តែប្រាប់ថា មិនស្រួលខ្លួន ហើយបានសុំច្បាប់អ្នកគ្រប់គ្រងត្រឡប់ទៅផ្ទះមុន។
ប្រពន្ធជនរងគ្រោះបន្តថា ពេលនោះគាត់មិននឹកស្មានថា ប្ដីគិតខ្លីចង.កសម្លាប់ខ្លួនបែបនេះសោះ លុះពេលម៉ោងកើតហេតុខាងលើ គាត់បានចេញពីធ្វើការចូលទៅដល់ផ្ទះបើកទ្វារស្រាប់តែប្រទះឃើញប្ដីចង.កស្លាប់បាត់ទៅហើយ។
នគរបាលបាននិយាយថា ក្រោយពេលទទួលបានព័ត៌មាននោះហើយ កម្លាំនគរបាលខណ្ឌ និងនគរបាលប៉ុស្តិ៍ រួមជាមួយនគរបាលបច្ចេកទេសនៃស្នងការដ្ឋាននគរបាលរាជធានីភ្នំពេញបានចុះទៅពិនិត្យកោសល្យវិច័យ ហើយរកឃើញថា បុរសខាងលើពិតជាចង.កសម្លាប់ខ្លួនមែន។ (កែសម្រួលដោយ ៖ បុប្ផា)
ចែករំលែកព័តមាននេះ