ការផឹកស្រាបៀរ ៖ យោងតាមការសិក្សាមួយថា អាស៊ីតំណាងឲ្យជិត៤០%នៃការផឹកស្រាបៀរលើពិភពលោក គឺអស់ដល់ទៅ៦៨០.០០០លានលីត្រក្នុង១ឆ្នាំ។ ចិនផឹកស្រាបៀរគិតជាមធ្យមតែ៣០លីត្រ ក្នុងមនុស្សម្នាក់ តែចិនមានប្រជាជនច្រើនដែលតំណាងឲ្យទីផ្សារស្រាបៀរដ៏ធំ។ បណ្ដាក្រុមហ៊ុនផលិតស្រាបៀរចាប់អារម្មណ៍ខ្លាំងចំពោះទីផ្សារនោះ។
ក្រោយរយៈពេលច្រើនទសវត្ស គ្របដណ្ដប់ដោយផលិតកម្មឧស្សាហកម្ម ទីផ្សារស្រាបៀរជួបប្រទះនឹងរបត់មួយជាប្រវត្តិសាស្ត្ររបស់ខ្លួន។ នៅអឹរ៉ុបនិងនៅសហរដ្ឋអាមេរិក ពួកអ្នកនិយមស្រាបៀរ ងាកកាន់តែខ្លាំងទៅរកស្រាបៀរសិប្បកម្មស្រស់ថ្មីៗ ជាជាងស្រាបៀរឧស្សាហកម្មដែលមានម៉ាកយីហោធំៗ។
បើគិតពីកម្រិតពិភពលោក ទោះមាននិន្នាការនោះ ក៏ការផលិតស្រាបៀរឧស្សាហកម្មនៅតែមានស្ថេរភាព។ នៅអាសីុស្រាបៀរកំពុងពេញនិយម។ យោងតាមក្រុមហ៊ុនស្រាបៀរបារាំងទាំងឡាយថា លើទីផ្សារពិភពលោកស្រាបៀរត្រូវបានផឹកអស់ប្រមាណជា២០០ពាន់លានលីត្រ។ ទ្វីបអាស៊ីតែមួយតំណាងឲ្យ៤០%នៃការផឹកស្រាបៀរលើពិភពលោក ចាប់ពីឆ្នាំ២០២០ទៅ។
ក្រុមហ៊ុនផលិតស្រាបៀរប្រេស៊ីលជាម្ចាស់របស់ស្រាបៀរSTELLA ARTOIS CORONA និងLEFFEក្នុងឆ្នាំ២០១៨សម្រេចបានការលក់ចេញស្រាបៀរប្រភេទទាំងនោះរបស់គេ ក្នុងទំហំទឹកប្រាក់៥៤,៦ពាន់លានដុល្លារ ជាមួយការលក់នៅអាស៊ីឡើងដល់ទឹកប្រាក់៨,៤ពាន់លានដុល្លារ ជាតួលេខមួយដែលមានការកើនឡើង៦,១%៕ (កែសម្រួលដោយ ៖ បុប្ផា)
ចែករំលែកព័តមាននេះ