ខេត្តកំពង់ឆ្នាំង ៖ កាលពីរសៀលថ្ងៃទី៩ ខែកក្កដា ឆ្នាំ២០១៩ លោកឈួរ ច័ន្ទឌឿន អភិបាលខេត្តកំពង់ឆ្នាំង បានដឹកនាំមន្ត្រីនៃសាខាកាកបាទក្រហមខេត្ត នាំយកនូវអំណោយមានតង់…
ខេត្តកំពង់ឆ្នាំង ៖ កាលពីរសៀលថ្ងៃទី៩ ខែកក្កដា ឆ្នាំ២០១៩ លោកឈួរ ច័ន្ទឌឿន អភិបាលខេត្តកំពង់ឆ្នាំង បានដឹកនាំមន្ត្រីនៃសាខាកាកបាទក្រហមខេត្ត នាំយកនូវអំណោយមានតង់ សេរ៉ូម និងគ្រែពេទ្យផ្ដល់ជូនដល់មន្ទីរពេទ្យបង្អែកខេត្តកំពង់ឆ្នាំង បន្ទាប់ពីជំងឺគ្រុនឈាមផ្ទុះឡើងធ្វើឲ្យកើនអ្នកជំងឺ ហើយខ្វះកន្លែងសម្រាប់អ្នកជំងឺស្នាក់នៅព្យាបាល ។
នៅក្នុងឱកាសនោះដែរ លោកអភិបាលខេត្តបានមានប្រសាសន៍ថា ដោយយោងទៅតាមស្ថានភាពអ្នកជំងឺគ្រុនឈាមចេះតែកើនឡើង និងបានទទួលព័ត៌មានថាខាងមន្ទីរពេទ្យខ្វះកន្លែងសម្រាប់អ្នកជំងឺស្នាក់នៅនិងព្យាបាល លោកអភិបាលខេត្តបាននាំយកនូវតង់ចំនួន៥០ សេរ៉ូម ចំនួន១.០០០ប្លោក ដោយឡែកគ្រែពេទ្យចំនួន១៥ ជាអំណោយរបស់ក្រសួងសុខាភិបាលក៏បានប្រគល់ជាមួយគ្នានេះផងដែរ ។
នៅក្នុងឱកាសប្រគល់អំណោយនៅរសៀលនោះដែរ លោកអភិបាលខេត្តក៏បានផ្តាំផ្ញើដល់អាណាព្យាបាលដែលកំពុងតែកំដរកូនសម្រាកនៅក្នុងមន្ទីរពេទ្យត្រូវយកចិត្តទុកដាក់ថែទាំសុខភាពកូនចៅដោយការពារកុំឲ្យមូសខ្លាខាំ ត្រូវស្លៀកពាក់ខោអាវឱ្យជិត និងលុបបំបាត់ទឹកដក់ក្នុងសំបកកង់រថយន្ត ឬក្នុងកំប៉ុងនៅតាមលំនៅឋានជាដើម ។
សូមបញ្ជាក់ថា លោក សូរិន្ទ ទីរ៉ាវុឌ្ឍី ប្រធានមន្ទីរពេទ្យបង្អែកខេត្តកំពង់ឆ្នាំង ធ្លាប់ប្រាប់ឱ្យដឹងថា ចាប់ពីដើមខែមិថុនាដល់ដើមខែកក្កដានេះ មានអ្នកជំងឺជាកុមារចូលសម្រាកនៅក្នុងមន្ទីរពេទ្យចំនួន៤៥៩នាក់ ក្នុងនោះ៩០ភាគរយមានជំងឺគ្រុនឈាម ចំណែក១០ភាគីមានជំងឺរាករូសនិងគ្រុនក្តៅធម្មតា ៕ (កែសម្រួលដោយ ៖ ធីតា)
ចែករំលែកព័តមាននេះ