ខេត្តសៀមរាប ៖ កុមារីរងគ្រោះ៣នាក់បងប្អូនបង្កើតបាននាំគ្នាយកគីង្គក់ទៅធ្វើម្ហូបដែលឪពុកចាប់បានយកមកទុក ស្រាប់តែចំគីង្គក់មានពងទើបពុលពងគីង្គក់ទាំង៣នាក់បងប្អូន បណ្តាលឱ្យស្លាប់បងស្រីម្នាក់ ខណៈបញ្ជូនទៅដល់មន្ទីរពេទ្យ និងប្អូនស្រី២នាក់ទៀតពុលតិចតួច(ស្រាល) ដែលជា(កូនភ្លោះ) ហើយត្រូវបានគ្រូពេទ្យឱ្យត្រឡប់ទៅផ្ទះវិញ នៅរសៀលថ្ងៃទី៩…
ខេត្តសៀមរាប ៖ កុមារីរងគ្រោះ៣នាក់បងប្អូនបង្កើតបាននាំគ្នាយកគីង្គក់ទៅធ្វើម្ហូបដែលឪពុកចាប់បានយកមកទុក ស្រាប់តែចំគីង្គក់មានពងទើបពុលពងគីង្គក់ទាំង៣នាក់បងប្អូន បណ្តាលឱ្យស្លាប់បងស្រីម្នាក់ ខណៈបញ្ជូនទៅដល់មន្ទីរពេទ្យ និងប្អូនស្រី២នាក់ទៀតពុលតិចតួច(ស្រាល) ដែលជា(កូនភ្លោះ) ហើយត្រូវបានគ្រូពេទ្យឱ្យត្រឡប់ទៅផ្ទះវិញ នៅរសៀលថ្ងៃទី៩ ខែកក្កដានេះ ។
ចំណែកបងស្រីត្រូវបានសមត្ថកិច្ចប្រគល់ឱ្យក្រុមគ្រួសារយកចេញពីមន្ទីរពេទ្យទៅធ្វើបុណ្យតាមប្រពៃណីនៅឯស្រុកកំណើត ដែលហេតុការណ៍គួរឱ្យរន្ធត់ចិត្តនេះ បានកើតឡើងនៅវេលាម៉ោង៦និង៣០នាទីល្ងាច ថ្ងៃទី០៧ ខែកក្កដានេះ ស្ថិតនៅចំណុចភូមិត្រកៀត ឃុំមុខប៉ែន ស្រុកពួក ខេត្តសៀមរាប ។
បើតាមលោកវរសេនីយ៍ឯក ទេព ពុំសែន អធិការនគរបាលស្រុកបានឱ្យដឹងនៅថ្ងៃទី១០ ខែកក្កដាថា ក្រោយទទួលព័ត៌មាន នៅព្រឹកថ្ងៃទី០៨ ខែកក្កដានេះ ទើបលោកបានឱ្យកម្លាំងនគរបាលជំនាញសហការជាមួយការិយាល័យនគរបាលបច្ចេកទេសវិទ្យាសាស្ត្រ និងគ្រូពេទ្យមណ្ឌលឃុំសសរស្តម្ភចុះស្រាវជ្រាវ និងពិនិត្យសាកសពក្មេងស្រីឈ្មោះ ធឿន គិមសាន រួចមក បានសន្និដ្ឋានថា ពិតជាពុលពងគីង្គក់ បណ្តាលឱ្យស្លាប់មែន ។
លោកបានបញ្ជាក់ថា កុមារីទាំង០៣នាក់ដែលពុលពងគីង្គក់នោះមានទី១-ឈ្មោះ ធឿន គិមសែ អាយុ៩ឆ្នាំ (ត្រូវជាបងបង្កើត) បានស្លាប់ ។ ទី២-ឈ្មោះ ធឿន គិមសែន អាយុ៦ឆ្នាំ និងទី៣-ឈ្មោះ ធឿន គិមសាន អាយុ៦ឆ្នាំ (អ្នកទាំង២ជាកូនភ្លោះ) មុខរបរសិស្ស រស់នៅភូមិត្រកៀត ឃុំមុខប៉ែន ស្រុកពួក ខេត្តសៀមរាប ។ លោកបញ្ជាក់ទៀតថា កុមារីទាំង៣នាក់បងប្អូនបង្កើតបាននាំគ្នាចាប់សត្វគីង្គក់ យកមកវ៉ៃធ្វើម្ហូបដែលឪពុកចាប់បានយកមកប្រស់ទុក ហើយបងស្រី (ធឿន គិមសែ) បានយកទៅអារកគីង្គក់ និងប្រលាត់ស្បែកបានចំនួន៦ក្បាល ក្នុងនោះមានគីង្គក់ពង២ក្បាល បន្ទាប់មកយកសាច់គីង្គក់ និងពងទៅចៀនសាបពុំបានប្រឡាក់គ្រឿងទេ ដើម្បីយកមកហូប ។
លុះក្រោយហូបរួចបានមួយសន្ទុះ ស្រាប់តែប្អូនឈ្មោះ ធឿន គិមសាន មានអាការៈឈឺពោះត្រូវបានលោកយាយជួយលាបប្រេងកូឡា និងរីតពោះ ប៉ុន្តែមិនបាត់បែរជាក្អួតចេញពងគីង្គក់ជាច្រើនឡើងទន់ខ្លួន ក្រោយមកត្រូវបានឪពុកជូនទៅសង្គ្រោះដល់មន្ទីពេទ្យកុមារ (គន្ធបុប្ផាខេត្តសៀមរាប) ចំណែក២នាក់ទៀតឈ្មោះ ធឿន គិមសែ និង ធឿន គិមសែន (កូនភ្លោះ) មានអាការៈពុលក្អួតតិចតួចក៏បានជូនទៅសង្គ្រោះដល់ពេទ្យគន្ធបុប្ផាទាំងអស់គ្នាដែរ លុះម៉ោងប្រហែលជាង១២យប់ ឈានចូលថ្ងៃទី៨ ខែកក្កដានេះ ស្រាប់តែកុមារីឈ្មោះ ធឿន គិមសាន រើប្រកាច់ បណ្តាលឱ្យស្លាប់ក្នុងមន្ទីពេទ្យគន្ធបុប្ផាតែម្តង ។
លោកវរសេនីយ៍ឯក ទេព ពុំសែន អធិការស្រុកពួកបានបញ្ជាក់បន្ថែមទៀតថា កូនស្រី២នាក់ដែលជាកូនភ្លោះនោះបានជាសេះស្បើយហើយ ព្រមទាំងត្រូវបានក្រុមគ្រូពេទ្យឱ្យត្រឡប់ទៅផ្ទះវិញហើយ ចំណែកកូនបងដែលបានស្លាប់នោះកំពុងតែធ្វើបុណ្យសព ៕ កែសម្រួលដោយ ៖ សុឃាក់
ចែករំលែកព័តមាននេះ