រាជធានីភ្នំពេញ ៖ ទាំងអ្នកនយោបាយ និងអង្កការសង្គមស៊ីវិលនៅតែបន្តមកដាក់កម្រងផ្ការដើម្បីរំលឹកវិញ្ញាណក្ខន្ធលោក កែម ឡី អ្នកវិភាគសង្គម និងនយោបាយដែលត្រូវបានឃាតករបាញ់សម្លាប់ នៅក្នុងម៉ាត់ស្តុបបូកគោ កាលពី៣ឆ្នាំមុន…
រាជធានីភ្នំពេញ ៖ ទាំងអ្នកនយោបាយ និងអង្កការសង្គមស៊ីវិលនៅតែបន្តមកដាក់កម្រងផ្ការដើម្បីរំលឹកវិញ្ញាណក្ខន្ធលោក កែម ឡី អ្នកវិភាគសង្គម និងនយោបាយដែលត្រូវបានឃាតករបាញ់សម្លាប់ នៅក្នុងម៉ាត់ស្តុបបូកគោ កាលពី៣ឆ្នាំមុន គឺនៅថ្ងៃទី១០ ខែកក្កដា ឆ្នាំ២០១៧ ។
លោក គង់ មុនីកា ប្រធានគណបក្សឆន្ទៈខ្មែរបានឲ្យដឹងនៅថ្ងៃទី១០ កក្កដាថា ថ្ងៃនេះជាថ្ងៃគម្រប់ខួប០៣ឆ្នាំ នៃការបាត់បង់ជីវិតលោកបណ្ឌិត កែម ឡី ក្រោមស្នាដៃឃាតករមួយរូបដែលទាំងរូបខ្ញុំផ្ទាល់ និងមនុស្សជាច្រើននៅតែយល់ថា ជាឃាតករសិប្បនិម្មិត ។ លោកបញ្ជាក់ថា ៖«ក្នុងនាមខ្ញុំ និងប្រជាជនខ្មែរដែលគោរពស្រលាញ់លោកបណ្ឌិត កែម ឡី សូមអំពាវនាវចំពោះរាជរដ្ឋាភិបាលអោយពន្លឿនការស៊ើបអង្កេត ដើម្បីវែកមុខឃាតករពិត និងអ្នកពាក់ព័ន្ធ ដើម្បីអោយដួងព្រលឹងលោកបណ្ឌិតបានទៅកាន់សុខគតិភព ព្រមទាំងផ្តល់យុត្តិធម៌ដល់ក្រុមគ្រួសារជនរងគ្រោះផងដែរ»។
ចំណែកលោក ព្រាប កុល ប្រធានអង្កការតម្លាភាពកម្ពុជាក៏បានលើកឡើងថា ដូចឆ្នាំមុនៗ គឺនៅម៉ោង៩ព្រឹក ថ្ងៃទី១០ ខែកក្កដា ខ្ញុំតែងទៅញ៉ាំកាហ្វេនៅម៉ាត (Mart) ស្តុបបូកគោ ដោយទិញកាហ្វេពីរកែវ មួយកែវសម្រាប់ឧទ្ទិសជូនដល់បងបណ្ឌិត កែម ឡី និងមួយកែវសម្រាប់ខ្ញុំញ៉ាំខ្លួនឯង ។ លោកបន្តថា ពេលខ្ញុំទៅដល់ ខ្ញុំសង្កេតឃើញប៉ូលិស និងសន្តិសុខជាច្រើននាក់នៅជុំវិញម៉ាត ហើយក៏ឃើញសមត្ថកិច្ចស្លៀកឯកសណ្ឋានស៊ីវិលនៅខាងក្នុងម៉ាតនេះដែរ ។ ខ្ញុំអង្គុយចុះដាក់កាហ្វេទាំងពីរកែវនៅលើតុ ហើយជជែកលេងជាមួយបងប្អូនមិត្តភក្តិមួយចំនួនដែលអញ្ជើញទៅទីនោះដែរ ។ លោកបន្ថែមថា ក្រោយមក មានបងប្អូនមួយចំនួនបានយកកម្រងផ្កាមកដាក់ នៅជុំវិញកែវការហ្វេ ដែលខ្ញុំឧទ្ទិសជូនបងបណ្ឌិត កែម ឡី ។ ៥នាទីក្រោយមក ស្រាប់តែមានសន្តិសុខខណ្ឌចម្ការមនម្នាក់មកយកកម្រងផ្កានោះទៅបាត់ ។ ខ្ញុំក៏ក្រោកឈរ ហើយស្រែក ហៅសន្តិសុខសុំកម្រងផ្កាមកវិញ ប៉ុន្តែគាត់យកកម្រងផ្កាដើរចេញទៅដោយមិនងាកក្រោយ ឡើយ ។
លោកបញ្ជាក់ថា ៖« ខ្ញុំពិតជាហួសចិត្តរកអ្វីមកថ្លែងពុំបាន ! ប្រទេសខ្ញុំ មានរដ្ឋធម្មនុញតម្រូវឱ្យប្រកាន់យករបបប្រជាធិបតេយ្យ សេរីពហុបក្ស និងបានធានាសិទ្ធិសេរីភាព ជាមូលដ្ឋានរបស់ប្រជាពលរដ្ឋ» ។ តាមពិត១ឆ្នាំខ្ញុំទៅទីនោះម្តង ហើយគ្រោងទៅត្រឹមតែ 40 នាទីប៉ុណ្ណោះ ដើម្បី អង្គុយញ៉ាំកាហ្វេ នឹករឮក និងឧទ្ទិដល់រៀមច្បងបណ្ឌិត កែម ឡី ដែលត្រូវឃាតករបាញ់សម្លាប់នៅទីនោះ ។ ជាមួយគ្នានោះដែរលោកព្រាប កុល ក៏បានសង្ឃឹមថា ឆ្នាំក្រោយអាជ្ញាធរ និងសមត្ថកិច្ចមានចិត្តទូលាយជាងនេះ ៕ កែសម្រួលដោយ ៖ សុឃាក់
ចែករំលែកព័តមាននេះ