ក្រោយចាប់ខ្លួន…ឧកញ៉ាស៊ឹង សំអុល និងបក្សពួក ថ្ងៃនេះកំពុងសាកសួរនៅឡើយ
- មណ្ឌលគិរី
ខេត្តមណ្ឌលគិរី ៖ លោកហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរីបានឱ្យដឹងថា គិតត្រឹមព្រឹកថ្ងៃទី១០ កក្កដា នេះ ឧកញ៉ា ស៊ឹង…
ខេត្តមណ្ឌលគិរី ៖ លោកហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរីបានឱ្យដឹងថា គិតត្រឹមព្រឹកថ្ងៃទី១០ កក្កដា នេះ ឧកញ៉ា ស៊ឹង…
ខេត្តមណ្ឌលគិរី ៖ លោកហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរីបានឱ្យដឹងថា គិតត្រឹមព្រឹកថ្ងៃទី១០ កក្កដា នេះ ឧកញ៉ា ស៊ឹង សំអុល និងបក្សពួក កំពុងត្រូវបានសាកសួរនៅទីបញ្ជាការដ្ឋានកងរាជអាវុធហត្ថខេត្តមណ្ឌលគិរីនៅឡើយ ខណៈនៅមិនទាន់បញ្ជូនទៅណានោះទេ ។ គួរបញ្ជាក់ថា ពួកគេត្រូវបានគណៈកម្មធិការថ្នាក់ជាតិបង្ក្រាបបទល្មើសព្រៃឈើចាប់ខ្លួនកាលពីថ្ងៃទី០៩ កក្កដា ។
សេចក្តីរាយការណ៍ពីស្រុកកោះញែកថា គេសង្កេតឃើញមានរថយន្តកែច្នៃ, និងរថយន្តយីឌុបរាប់សិប គ្រឿង ត្រូវបានយកទៅរក្សាទុកនៅមូលដ្ឋានកងរាជអាវុធហត្ថស្រុកកោះញែក ក្រោយពីមានការចាប់
ឃាត់ខ្លួនឧកញ៉ា ស៊ឹង សំអុល កាលពីថ្ងៃទី០៩ កក្កដា នោះ ។ សមត្ថកិច្ចកំពុងបង្កើនសកម្មភាពរុករករថ យន្តបន្ថែមទៀត ដែលជាប់ពាក់ព័ន្ឋបទល្មើសព្រៃឈើ ដើម្បីធ្វើការកម្ទេចចោលនៅហ្នឹងកន្លែងតែម្តង។
ទោះជាយ៉ាងណាគេនៅមិនទាន់ដឹងថា នឹងមានមនុស្សប៉ុន្មាននាក់ត្រូវចាប់ខ្លួនបន្តទៀតឡើយ ទោះជានៅទឹកដីស្រុកកោះញែក សំបូរអ្នករកស៊ីបទល្មើសព្រៃឈើក៏ដោយ ។ ចំណែកវត្ថុតាងដែលរឹបអូស បានដូចជា ឈើ និងរថយន្ត ក្នុងករណីខាងលើក៏នៅមិនទាន់មានរបាយការណ៍បញ្ជាក់នោះដែរ។
សូមបញ្ជាក់ទៀតថា ឧកញ៉ា ស៊ឹង សំអុល ដែលល្បីល្បាញជាឈ្មួញរកស៊ីឈើច្រើនឆ្នាំមកហើយ បានសុខរហូតក្លាយជា«ស្តេចខ្មូត» និងល្បីកក្រើកនៅភូមិភាគឦសាន ដែលកាលពីឆ្នាំ២០១៦ បានរួចផុតពីការចាប់ខ្លួនក្នុងមុខជំនួញរត់ពន្ធឈើឆ្លងដែនទៅប្រទេសវៀតណាមនោះ ពេលនេះបានត្រូវសមត្ថកិច្ចចាប់ខ្លួននៅស្រុកកោះញែក កាលពីថ្ងៃទី៩ ខែកក្កដា រួមជាមួយអ្នកពាក់ព័ន្ធចំនួន៣នាក់ទៀត ។
ក្រោយពីមានសេចក្តីប្រកាសពីវិធានការបង្ក្រាបការជួញដូរឈើគ្រប់ប្រភេទនៅទូទាំងប្រទេស ដែលចេញដោយនាយឧត្តមសេនីយ៍សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស កាលពីពេលថ្មីៗនេះ នៅឯខេត្តមណ្ឌលគិរី បានបើកប្រតិបត្តិការបង្ក្រាបបទល្មើសព្រៃឈើទ្រង់ទ្រាយធំ ។
លោកឧត្តមសេនីយ៍ អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានឲ្យដឹងនារសៀលថ្ងៃទី៩ ខែកក្កដាថា កម្លាំងគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ ក្រោមការដឹក
នាំបញ្ជាផ្ទាល់ពីនាយឧត្តមសេនីយ៍ សៅ សុខា ជាប្រធានគណៈកម្មការជាតិ បានបង្ក្រាបក្នុងរូបភាពទ្រង់ ទ្រាយធំ ដោយចាប់ខ្លួនមនុស្ស៤នាក់ ក្នុងនោះមានឧកញ៉ា ស៊ឹង សំអុល ប្រធានក្រុមហ៊ុន មេការ២នាក់ និងអ្នកបើករថយន្តម្នាក់ ព្រមទាំងដកហូតរថយន្ដជាមធ្យោបាយដឹកឈើជាង៤០គ្រឿងផងដែរ ។
លោក អេង ហុី បន្តថា នារសៀលថ្ងៃទី៩ខែកក្កដា ឧកញ៉ា ស៊ឹង សំអុល និងមនុស្ស៣នាក់ទៀត កំពុងត្រូវបានសាកសួរនៅបញ្ជាការដ្ឋានកងអាវុធហត្ថខេត្តមណ្ឌលគិរី ។ លោកឧត្តមសេនីយ៍ បានបញ្ជាក់ទៀតថា រថយន្ដល្មើសផ្សេងទៀត ត្រូវបានឈ្មូញយកទៅលាក់ទុកនៅក្នុងព្រៃ ហើយនៅពេលនេះកម្លាំងសមត្ថកិច្ចកំពុងរុករកយ៉ាងក្ដៅគគុក ។
ចំពោះរថយន្ដដែលសមត្ថកិច្ចរកឃើញនៅក្នុងព្រៃ នឹងបំផ្លាញចោលនៅទីនោះតែម្ដង ។ លោក អេង ហុី ក៏បានអំពាវនាវដល់ក្រុមឈ្មួញដែលពាក់ព័ន្ធនឹងបទល្មើសព្រៃឈើនេះ ត្រូវដកខ្លួនចេញជាបន្ទាន់ បើមិនដូច្នោះទេ នឹងត្រូវប្រឈមមុខនឹងផ្លូវច្បាប់ជាក់ជាមិនខានឡើយ ។
សូមបញ្ជាក់ថា ប្រតិបត្តិការដ៏ក្តៅគគុកនេះបានធ្វើឡើងបន្ទាប់ពីគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ សម្រេចដាក់ចេញនូវវិធានការថ្មីៗបន្ថែមទៀត ដើម្បីរឹតបន្តឹងច្បាប់ឲ្យបានតឹងរ៉ឹង និងសម្រេចឲ្យមានការបំផ្លាញចោលមធ្យោបាយដឹកជញ្ជូនបទល្មើសព្រៃឈើនៅនឹងកន្លែងតែម្តង ។
លោកឧត្តមសេនីយ៍ អេង ហ៊ី បានបញ្ជាក់ថា កន្លងទៅគណៈកម្មការជាតិ បានធ្វើការត្រួតពិនិត្យឃើញថា ទោះបីមានការផ្សព្វផ្សាយអប់រំ និងបង្ក្រាបបទល្មើសព្រៃឈើជាបន្តបន្ទាប់ក៏ដោយ ក៏នៅតែមានការលួចបន្លំកាប់ឈើដឹកជញ្ជូនផល-អនុផលព្រៃឈើដោយខុសច្បាប់ តាមគ្រប់មធ្យោបាយនិងគ្រប់រូបភាព ។
លោកបន្តថា ដើម្បីថែរក្សាព្រៃឈើឲ្យបានគង់វង្ស គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ នឹងអនុវត្តវិធានការ២ចំណុចគឺ ៖ ទី១-បុគ្គលឬក្រុមហ៊ុនដែលពាក់ព័ន្ធការប្រព្រឹត្តល្មើស ច្បាប់នេះ នឹងត្រូវអនុវត្តវិធានការច្បាប់តឹងរ៉ឹង ។ ទី២-មធ្យោបាយ (រថយន្ត គោយន្ត ម៉ូតូ…) ដែលពាក់ព័ន្ធនឹងបទល្មើសព្រៃឈើនេះ ត្រូវបានស្នើសុំទៅអាជ្ញាធរមានសមត្ថកិច្ច ដើម្បីបំផ្លាញចោលនៅនឹងកន្លែង ។
លោកឧត្តមសេនីយ៍ ក៏បានអំពាវនាវដល់សមត្ថកិច្ចជំនាញ អាជ្ញាធរមានសមត្ថកិច្ចគ្រប់ថ្នាក់ មេត្តារួមគ្នាគិត រួមគ្នាធ្វើ និងរួមគ្នាទទួល ខុសត្រូវ និងសូមអំពាវនាវដល់ប្រជាពលរដ្ឋទាំងអស់ ផ្លាស់ប្តូរផ្នត់គំនិតពីការប្រកបមុខរបរកាប់ឈើ ដឹកជញ្ជូនឈើខុសច្បាប់ ទៅប្រកបមុខរបរស្របច្បាប់វិញ ដើម្បីរួមគ្នាការពារបរិស្ថាន និងបម្រែបម្រួលអាកាសធាតុ ៕
ចែករំលែកព័តមាននេះ