សហរដ្ឋអាមេរិក-អង់គ្លេស ៖ ក្រោយការបែកធ្លាយការសម្ងាត់ខាងការទូត ពីការរិះគន់របស់ឯកអគ្គរាជទូតអង់គ្លេសប្រចាំក្រុងវ៉ាស៊ិនតោនដែលវាយប្រហារថា ប្រធានាធិបតីអាមេរិកលោកដូណាល់ត្រាំជាមនុស្សមិនគ្រប់ទឹកនិងគ្មានសមត្ថភាព បាននាំឲ្យលោកត្រាំខឹងសម្បាយ៉ាងខ្លាំង ហើយវាយប្រហារលើនាយករដ្ឋមន្ត្រីអង់គ្លេស លោកស្រីTHERESA MAY ដែលសុំលាលែងពីតំណែង ដោយសារបរាជ័យរបស់លោកស្រីក្នុងរឿងBREXIT ព្រោះតែលោកស្រីគាំទ្រសម្ដីឯកអគ្គរាជទូតរូបនោះ។
លោកត្រាំតាមTWITTERវាយប្រហារនាថ្ងៃទី៨កក្កដាចំពោះលោកស្រីMAY ដោយសម្ដែងជាចំហពីក្ដីរីករាយរបស់លោក ដល់ការចាកចេញពីតំណែងរបស់លោកស្រី។ លោកត្រាំថានោះជាដំណឹងល្អមួយដែលអង់គ្លេសនាពេលឆាប់ខាងមុខនេះ នឹងមាននាយករដ្ឋមន្ត្រីថ្មីមួយរូប។ លោកថាលោកអស់ការអត់ធ្មត់ទៀតហើយ។ លោកបន្តថាលោកស្រីMAY ជាអ្នកទទួលខុសត្រូវលើការច្របូកច្របល់បច្ចុប្បន្ននៅអង់គ្លេសព្រោះរឿងBREXIT។
នៅទីក្រុងឡុងដ៏រដ្ឋាភិបាលកំពុងតាមដានរក បណ្ដាអ្នកទទួលខុសត្រូវធ្វើឲ្យបែកធ្លាយ របាយការណ៍សម្ងាត់រាយការណ៍ដោយឯកអគ្គរាជទូតលោកKIM DARROCHប្រចាំក្រុងវ៉ាស៊ិនតោន ដល់កាសែតMAIL ON SUNDAY ដែលក្នុងរបាយការណ៍នោះ លោកហៅលោកត្រាំថាជាមនុស្សមិនគ្រប់ទឹកនិងគ្មានសមត្ថភាព។
លោកត្រាំកាលពីថ្ងៃទី៨កក្កដាបានរិះគន់ឯកអគ្គរាជទូតអង់គ្លេសប្រចាំក្រុងវ៉ាស៊ិនតោនដោយអះអាងថា ខ្ញុំនឹងគ្មានការប្រាស្រ័យទាក់ទងជាមួយឯកអគ្គរាជទូតនោះទៀតហើយ។ លោកថាខ្ញុំមិនស្គាល់ឯកអគ្គរាជទូតនោះទេ តែគាត់នោះជាមនុស្សមិនគួរឲ្យស្រឡាញ់និងមិនសូវឃើញមុខនៅសហរដ្ឋអាមេរិក។ យើងនឹងមិនមានការទាក់ទងជាមួយគេទេ៕ (កែសម្រួលដោយ ៖ បុប្ផា)
ចែករំលែកព័តមាននេះ