ខេត្តកំពត ៖ មានហេតុការកើតឡើងធ្វើឲ្យសមត្ថកិច្ចដុតដៃដុតជើងតាមប្រមាញ់គ្រប់ច្រកល្ហកដោយសារតែស្ត្រីម្នាក់មានទំនាស់គ្នាជាមួយប្តីប្រពន្ធខ្លួនឯងរួចប្តីជិះរថយន្តចេញទៅធ្វើការបាត់ទៅពេល នោះដោយមានកំហឹងជាមួយប្តី ស្ត្រីរូបនោះក៏បានបង្ហោះហ្វេសប៊ុកថាមានចោរចូលលួចរថយន្ត យកទៅបាត់កាលពីវេលាម៉ោង០១រំលងអធ្រាត្រថ្ងៃទី៧ ខែកក្កដា ឆ្នាំ ២០១៩ ចេញពីផ្ទះបាត់សុំឲ្យសមត្ថកិច្ចជួយអន្តរាគមន៍ ។
ពេលឃើញ Facebook ស្ត្រីរូបនោះបង្ហោះយ៉ាងដូច្នេះកំលាំងសមត្ថកិច្ចក៏អញ្ជើញស្ត្រីអ្នកបង្ហោះហ្វេសប៊ុកនោះមកសួរនាំជាមួយគ្នានោះពេលប្តីឃើញហ្វេសប៊ុករបស់ប្រពន្ធបង្ហោះដូច្នេះក៏បានខមិនមកប្រពន្ធព្រមទាំងបើករថយន្តចូលទៅកាន់ស្នងការដ្ឋាននគរបាលខេត្តដើម្បីបំភ្លឺសមត្ថកិច្ចជុំវិញរឿងរ៉ាវដែលកើតឡើងក្នុងគ្រួសារឲ្យសមត្ថកិច្ចបានយល់ ។
ចំណែកស្ត្រីជាប្រពន្ធទោះបីជាប្តីបំភ្លឺសមត្ថកិច្ចថា នាងជាប្រពន្ធទោះជាមិនបានរៀបការត្រឹមត្រូវតាមច្បាប់ក៏យកគ្នាជាប្តីប្រពន្ធអស់រយៈពេលជាងបីឆ្នាំមកហើយព្រមទាំងមានកូនស្រីអាយុ៣ឆ្នាំម្នាក់ផងដែរហើយក៏មានចុះលិខិតអាពាហ៍ពិពាហ៍ដោយអាជ្ញាធរភូមិ-ឃុំទទួលស្គាល់ត្រឹមត្រូវផងដែរ ។
ទោះបីជាប្តីឆ្លើយបំភ្លឺសមត្ថកិច្ចលាតត្រដាងពីសាវតារពិតរបស់ខ្លួនទាំងពីរនាក់ប្តីប្រពន្ធជូនសមត្ថកិច្ចយ៉ាងនេះក៏ដោយក៏ស្ត្រីរូបនេះនៅតែឆ្លើយមិនទទួលស្គាល់ការពិតនៅតែកុហកសមត្ថកិច្ចថាបុរសរូបនេះមិនមែនជាប្តីរបស់ខ្លួនទៀត ។
ដោយសារតែមិនព្រមទទួលការពិតរបស់ខ្លួន ដោយយោងតាមការឆ្លើយបំភ្លឺរបស់ប្តី និងមានឯកសារត្រឹមត្រូវសមត្ថកិច្ចបានកសាងសំណុំរឿងបញ្ជូនស្ត្រីរូបនោះទៅកាន់តុលាការដោយចោទពីបទក្លែងកុហកសមត្ថកិច្ចធ្វើឲ្យសមត្ថកិច្ចរត់ខ្វែងដៃខ្វែងជើងតាមប្រមាញ់ចោរដែលស្ត្រីរូបនេះថា បានលួចរថយន្តរបស់ខ្លួនតាមពិត ប្តីស្ត្រីខ្លួនឯងជិះចេញពីផ្ទះក្រោយពីមានទាស់សំដីគ្នាបន្តិចបន្តួចក្នុងគ្រួសារ ។
ស្ត្រីជាប់ចោទមានឈ្មោះ តូច ណាវី អាយុ៣៤ឆ្នាំ ស្នាក់នៅភូមិសុវណ្ណសាគរ សង្កាត់កំពង់កណ្តាល ក្រុងកំពត រីឯប្តីមានឈ្មោះ ឆុន សិលា អាយុ៣៥ឆ្នាំ មុខរបរម៉ៅការសំណង់ ស្នាក់នៅភូមិសង្កាត់ ជាមួយគ្នាខាងលើ ។
ក្នុងហេតុការខាងលើបើតាមសមត្ថកិច្ចការិយាល័យព្រហ្មទណ្ឌកំរិត ស្រាលនៃស្នងការដ្ឋាននគរបាលខេត្តបានប្រាប់ កោះសន្តិភាព ថាជុំវិញករណីនេះបុរសជាប្តីគ្មានជាប់ពាក់ព័ន្ធទេ រីឯស្ត្រីជាប្រពន្ធត្រូវជាប់ពាក់ព័ន្ធពីបទបង្ហោះ Facebook បំផ្លើសការពិតធ្វើឲ្យសមត្ថកិច្ចរវល់ និងខាតពេលវេលាដោយសារការបង្ហោះក្លែងសភាពការ និងបង្កភាពអសន្តិសុខក្នុងខេត្តទាំងមូលដូច្នេះត្រូវទទួលទោសតាមច្បាប់ដែលបានប្រព្រឹត្ត ៕
កែសម្រួលដោយ ៖ សំណាង
ចែករំលែកព័តមាននេះ