ខេត្តស្វាយរៀង ៖ ក្រសួងកសិកម្មរុក្ខាប្រមាញ់ និងនេសាទរួមដំណើរដោយអាជ្ញាធរខេត្តស្វាយរៀង និងមន្ទីរកសិកម្មខេត្ត នៅថ្ងៃទី៩ ខែកក្កដានេះ បានបើកការប្រកាសដាក់ភូមិឫស្សីជួខាងត្បូង ឃុំក្រោលគោ ស្រុកស្វាយជ្រំ ខេត្តស្វាយរៀង ជាតំបន់ផ្ទុះជំងឺប៉េស្តជ្រូកអាហ្វ្រិក បន្ទាប់ពីក្រុមការងាររបស់មន្ទីរកសិកម្មខេត្តសហការជាមួយនឹងមន្ទីរពិសោធន៍យកដំណក់ឈាមទៅវិភាគរកមេរោគ កាលពីថ្ងៃទី២៩ មិថុនាកន្លងទៅនេះ ។
មានប្រសាសន៍នាឱកាសនោះលោក គឹម សុន រដ្ឋលេខាធិការក្រសួងកសិកម្មរុក្ខាប្រមាញ់ និងនេសាទបានសំដែងនូវការចូលរួមសោកស្ដាយជាមួយបងប្អូនប្រជាពលរដ្ឋដែលបានរងនូវការបាត់បង់សត្វជ្រូកយ៉ាងច្រើន ដោយការវាយប្រហារពីជំងឺប៉េស្តជ្រូកអាហ្វ្រិកទន្ទ្រាន ក្នុងភូមិនាពេលថ្មីៗនេះ ។ លោកបន្តថា និន្នាការជំងឺប៉េស្តជ្រូកអាហ្វ្រិកដែលបង្កឲ្យសត្វជ្រូកងាប់ងាយ ចម្លងខ្លាំងណាស់ ដូចនេះបងប្អូនដែលរស់នៅក្នុងភូមិគួរកុំដើរឆ្លងកាត់ពីផ្ទះមួយទៅផ្ទះមួយទៀតឲ្យបានមួយរយៈសិន ហើយក៏កុំយកសាច់ជ្រូកដែលឈឺងាប់ទៅធ្វើម្ហូប ដើម្បីហូបចុកជាដាច់ខាតពីព្រោះសាច់ មានមេរោគមិនងាយនឹងសម្លាប់ឲ្យងាប់ណាស់ ពិសេសជីកកប់សត្វជ្រូកដែលងាប់ឲ្យបានជ្រៅ និងធ្វើការសំអាតភូមិដ្ឋានផ្ទះសំបែងទ្រុងជ្រូក ទ្រុងមាន់ទាឲ្យបានស្អាត ដើម្បីត្រៀមចិញ្ចឹមជ្រូកឡើងវិញ ខណៈដែលជំងឺជ្រូកសាយអស់ក្លិនស៊ាំ និងអាកាសធាតុនៅពេលខាងមុខ ។
ទាក់ទងទៅនឹងតម្លៃសាច់ជ្រូកលោកស្រីចាន់គ្រី អ្នកលក់សាច់ជ្រូកផ្សារវាលយន្ត ក្រុងស្វាយរៀង បានបញ្ជាក់ប្រាប់ឲ្យដឹងថា ទោះជារដ្ឋបាលខេត្តបានធ្វើការទប់ស្កាត់ការនាំជ្រូកចូលពីប្រទេសជិតខាង ដើម្បីបង្ការជំងឺឆ្លងប៉េស្តជ្រូកអាហ្វ្រិករហូតមកដល់ពលនេះ តម្លៃសាច់ជ្រូកនៅក្នុងផ្សារនេះមិនបានឡើងថ្លៃប៉ុន្មានទេ គឺសាច់១គីឡូក្រាមនៅចន្លោះតម្លៃ១៦០០០ទៅ១៧០០០រៀលតែប៉ុណ្ណោះ ។ លោកនាង ចន្ថា ប្រធានសមាគមអ្នកចិញ្ចឹមជ្រូកបានថ្លែងប្រាប់បន្ថែមថា បើទោះជាខេត្តបានរងនូវជំងឺប៉េស្តជ្រូកអាហ្វ្រិកនៅឃុំក្រោលគោ ក្នុងស្រុកស្វាយជ្រំហើយមានតំបន់មួយចំនួននៅក្នុងស្រុករមាសហែកបានរងផលប៉ះពាល់នឹងជំងឺសត្វជ្រូកចំនួន៣ឃុំផងដែរ គឺឃុំម្រាម២ ភូមិឃុំចន្ត្រី១ភូមិ និងឃុំត្រពាំងស្តៅ១ភូមិ ។
អាជ្ញាធរខេត្តបានចេញសារាចរណ៍ណែនាំឲ្យទប់ស្កាត់ការនាំជ្រូកចូលពីប្រទេសជិតខាងនៅទូទាំងខេត្តស្វាយរៀង ក៏ប៉ុន្តែតម្លៃសាច់ជ្រូករស់មិនទាន់មានសញ្ញាមានការឡើងថ្លៃនៅឡើយទេគឺតម្លៃជ្រូករស់ដែលក្រុមហ៊ុន CP ដឹកលក់ចែកចាយក្នុងខេត្តមួយគីឡូនៅតម្លៃតែ១០៥០០រៀល ឯតម្លៃជ្រូកក្រុមកសិករចិញ្ចឹមជាលក្ខណៈគ្រួសារពូជក្នុងស្រុកមានតម្លៃជាង៨០០០ទៅ៩០០០រៀលដែរ ពោល គឺតម្លៃជ្រូកមិនទាន់មានបញ្ហាអ្វីនោះទេ ។
លោកថាច់ រតនា ប្រធានមន្ទីរកសិកម្មខេត្តបានបញ្ជាក់ថា អនុវត្តបង្ការទប់ស្កាត់ការរាលដាលជំងឺប៉េស្តជ្រូកដែលរដ្ឋបាលខេត្ត និងក្រសួងចាត់វិធានការទប់ស្កាត់មន្ទីររួមនឹងអាជ្ញាធរមូលដ្ឋានបាន និងកំពុងតែបន្តចុះផ្សព្វផ្សាយពីវិធានការទប់ស្កាត់ និងបាញ់ថ្នាំ ធ្វើជីវសុវត្ថិភាពនៅតាមបណ្ដាភូមិមួយចំនួនជា បណ្តើរៗហើយ នៅប៉ុន្មានសប្ដាហ៍នេះបន្ទាប់ពីសង្ស័យមាននិន្នាការជំងឺរាតត្បាត ។ និងបានចុះបូមឈាមជ្រូក នៅឃុំចិន្ត្រី ឃុំត្រពាំងស្តៅ ស្រុករមាសហែកយកទៅពិនិត្យបន្តទៀត លទ្ធផលយ៉ាងណា និងផ្តល់ពេលក្រោយទៀត ៕ កែសម្រួលដោយ ៖ សុឃាក់
ចែករំលែកព័តមាននេះ