សហរដ្ឋអាមេរិក ៖ បើយោងតាមភ្នាក់ងារឧតុនិយមថា ភ្លៀងបានធ្លាក់យ៉ាងខ្លាំងដល់កម្រិតជាង១០សង្ទីម៉ែត្រក្នុងរយៈពេលតែ១ម៉ោង ក្នុងរដ្ឋធានីអាមេរិកក្រុងវ៉ាស៊ិនតោន កាលពីថ្ងៃទី៨ កក្កដា។ នោះជាភ្លៀងធ្លាក់ខ្លាំងបំផុតមួយ ក្នុងចំណោមភ្លៀងធ្លាក់ខ្លាំង២៥លើកគួរឱ្យកត់សម្គាល់ឃើញរយៈពេលតែ១ថ្ងៃ នៅសហរដ្ឋអាមេរិកចាប់តាំងពីឆ្នាំ១៨៧១មក។
យោងតាមបណ្ដាសារព័ត៌មានក្នុងស្រុកថា ភ្លៀងបានធ្លាក់ខ្លាំង បង្កជាទឹកជំនន់ជន់លិចផ្លូវជាច្រើននៅក្រុងវ៉ាស៊ិនតោន ខណៈអ្នកបើករថយន្តជាច្រើនសិបនាក់ ត្រូវបង្ខំចិត្តឡើងលើដំបូលរថយន្តពួកគេគេចពីទឹកលិច។ ភ្លៀងបានធ្លាក់ដល់កម្ពស់ជាង១០សង្ទីម៉ែត្រក្នុងស្រុកកូឡុំប៊ីយ៉ា រយៈពេលតែ១ម៉ោងនាវេលាម៉ោង៩និង៣០នាទីព្រឹកម៉ោងក្នុងស្រុកនាំឲ្យបិទវិថីជាច្រើន។
កាសែតវ៉ាស៊ិនតោនប៉ុស្តិ៍សរសេរថា នោះជាព្រឹត្តិការណ៍វិសាមញ្ញមួយ ក្នុងចំណោមភ្លៀងធ្លាក់ខ្លាំងបំផុត២៥លើក កត់សម្គាល់ឃើញក្នុងពេលតែ១ថ្ងៃចាប់តាំងពីឆ្នាំ១៨៧១មក។ ភ្លៀងធ្លាក់ខ្លាំងក៏បណ្ដាលឲ្យមានការបាក់ដី និងធ្វើឲ្យខូចគ្រឹះផ្ទះជាច្រើន។ ទឹកក៏ជ្រាបចូលដែរក្នុងរូងមេត្រូក្រុងវ៉ាសិុនតោន៕ (កែសម្រួលដោយ ៖ បុប្ផា) (ប្រភពវីដេអូ ៖ Le Huffington Post)
ចែករំលែកព័តមាននេះ