រាជធានីភ្នំពេញ ៖ បុរសមួយក្រុមមានគ្នាជិត៨ទៅ៩នាក់ បានអង្គុយផឹកស៊ីនៅក្នុងភោជនីដ្ឋាន5555 ស្រាប់តែពេលស្រវឹងស្រាក៏បែកគំនិតឈ្លោះប្រកែកគ្នាឯង ហើយហ៊ានលើកដៃយកដបស្រាបៀរវាយមិត្តភក្តិខ្លួនឯង បណ្តាលអោយរងរបួសធ្ងន់ជិតដាច់សសៃដៃ ហូរឈាមពេញក្នុងហាង ហេតុការណ៍នេះបានកើតឡើង កាលពីវេលាម៉ោង១១និង៣០នាទីយប់ ថ្ងៃទី៨ ខែកក្កដានេះ តាមបណ្តោយផ្លូវ154 នៅចំណុចភោជនីដ្ឋាន 5555 ស្ថិតនៅក្នុងសង្កាត់ផ្សារកណ្តាល1 ខណ្ឌដូនពេញ ។
តាមប្រភពព័ត៌មានពីបុគ្គលិកហាង 5555 សុំមិនបញ្ចេញឈ្មោះបានអោយដឹងថា មុនពេលកើតហេតុជនរងគ្រោះ និងជនបង្កត្រូវជាមិត្តភក្តិគ្នា ហើយពួកគាត់បាននាំគ្នាមកផឹកស៊ីនៅក្នុងភោជនីដ្ឋាន 5555 តាំងពីម៉ោង៧ជិត៨យប់ឯណោះ រហូតដល់ម៉ោងកើតហេតុខាងលើនេះជនរងគ្រោះស្រវឹងស្រា ហើយខាងជនបង្កក៏ស្រវឹងស្រាបានទាក់ពាក្យសំដីគ្នារហូតដល់ខាងជនបង្កហ៊ានលើកដៃយកដបស្រាបៀរយកទៅវ៉ៃក្បាលមិត្តភក្តិខ្លួនឯង បណ្តាលអោយរងរបួសររយះដៃស្ទើរតែដាច់សសៃដៃហូរឈាមពេញតុ និងខូចខាតសម្ភារក្នុងហាង បណ្តាលអោយរាយប៉ាយពេញក្នុងហាងផ្អើលភ្ញៀវរត់ខ្លះទាំងមិនទាន់គិតលុយស្ទើរតែទាំងអស់ ។
ភ្លាមៗនោះដែក៏មានរថយន្តសង្គ្រោះរបស់គ្លីនិកហុងហាក់បានមកដល់ដឹកយកជនរងគ្រោះយកទៅព្យាបាលបាត់ហើយ តែជនរងគ្រោះមិនបានដាក់ពាក្យនោះទេ សុខចិត្តព្យាបាលរួចក៏ត្រឡប់ទៅផ្ទះដោយខ្លួនវិញ ពីព្រោះនឹកឃើញថា ជាមិត្តភក្តិនឹងគ្នារាប់អានគ្នាយូរមកហើយ ។
ក្រោយពេលកើតហេតុខាងលើនេះខាងម្ចាស់ហាងគាត់ទាមទារសំណងចំនួន៥០០ដុល្លារ ប៉ុន្តែខាងជនបង្កមានតែ១១០ដុល្លារតែប៉ុណ្ណោះ ហើយម្ចាស់ព្រមយករួចបញ្ចប់រឿងនៅកន្លែងកើតហេតុតែម្តង ៕ កែសម្រួលដោយ ៖ សុឃាក់
ចែករំលែកព័តមាននេះ