រាជធានីភ្នំពេញ ៖ ជំងឺប៉េស្តជ្រូកអាហ្វ្រិកគិតត្រឹមថ្ងៃទី៨ ខែកក្កដា បានរាលដាលនិងផ្ទុះឡើងនៅខេត្ត២ទៀតគឺ ខេត្តស្វាយរៀង និងខេត្តតាកែវ ។ សម្រាប់កម្ពុជា មានខេត្តចំនួន៤ហើយ…
រាជធានីភ្នំពេញ ៖ ជំងឺប៉េស្តជ្រូកអាហ្វ្រិកគិតត្រឹមថ្ងៃទី៨ ខែកក្កដា បានរាលដាលនិងផ្ទុះឡើងនៅខេត្ត២ទៀតគឺ ខេត្តស្វាយរៀង និងខេត្តតាកែវ ។ សម្រាប់កម្ពុជា មានខេត្តចំនួន៤ហើយ ដែលផ្ទុះឡើងនូវជំងឺប៉េស្តជ្រូកអាហ្វ្រិក គឺខេត្តរតនគិរី ត្បូងឃ្មុំ ស្វាយរៀង និងតាកែវ ។
លោក តាន់ ផាន់ណារ៉ា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វនិងផលិតកម្មសត្វ បានឲ្យដឹងថា នៅខេត្តស្វាយរៀងជំងឺប៉េស្តជ្រូកបានផ្ទុះឡើងនៅភូមិឫស្សីជួរខាងត្បូង ឃុំក្រោលគោ ស្រុកស្វាយជ្រំ ។ចំណែកនៅខេត្តតាកែវ ជំងឺនេះផ្ទុះឡើងនៅភូមិអំពិល ឃុំពន្លៃ ស្រុកអង្គរបុរី ។
ក្នុងការទប់ស្កាត់ការរីករាលដាលនៃជំងឺប៉េស្តជ្រូកអាហ្វ្រិកនេះ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានផ្ញើលិខិតទៅកាន់អភិបាលខេត្តទាំង២ខាងលើ ដើម្បីស្នើឲ្យមានការចាត់ វិធានការទប់ស្កាត់ចលនាជ្រូក សាច់ជ្រូក និងផលិតផលមានដើមកំណើតពីសត្វជ្រូកពីកន្លែងផ្ទុះជំងឺ ។
ជ្រូកងាប់កើនដល់33ក្បាលដោយជំងឺប៉េស្តជ្រូកអាហ្វ្រិកនៅអូររាំងឪ
ខេត្តត្បូងឃ្មុំ ៖ ក្រោយពីមានការផ្ទុះជំងឺប៉េស្តជ្រូកអាហ្វ្រិកនៅភូមិកំពូលសេរី និងភូមិសោយ ឃុំមៀន ស្រុកអូររាំងឪ រហូតមកដល់រសៀលថ្ងៃទី៧ ខែកក្កដា ឆ្នាំ២០១៩ ជ្រូកងាប់បានកើនដល់៣៣ក្បាល និងកំពុងឈឺចំនួន៥៨ក្បាល។
ជាមួយគ្នានេះ គេឃើញមន្ត្រីជំនាញចុះបាញ់ថ្នាំសម្លាប់មេរោគ និងធ្វើការផ្សព្វផ្សាយតាមឃុំផ្សេងទៀតក្នុង ស្រុកអូររាំងឪ ឲ្យមានវិធានការទប់ស្កាត់ ចៀសវាងកុំឲ្យជំងឺនេះឆ្លងរីករាលដាលកាន់តែធំឡើងៗ ។លោក ងួន ប៊ុណ្ណាន អភិបាលស្រុកអូររាំងឪបានឲ្យដឹងថា តាមរយៈការធ្វើតេស្តសំណាកនៅមន្ទីរពិសោធន៍ឯរាជធានីភ្នំពេញ បានរកឃើញជ្រូកនៅភូមិទាំង២ខាងលើកើតជំងឺប៉េស្តជ្រូកអាហ្វ្រិក ។
បន្ទាប់មក អាជ្ញា ធរពាក់ព័ន្ធនិងមន្ទីរកសិកម្ម រុក្ខាប្រមាញ់ និងនេសាទខេត្ត បានបើកយុទ្ធនាការចុះបាញ់ថ្នាំសម្លាប់មេរោគនៅតាមដងផ្លូង និងតាមខ្នងផ្ទះរបស់ពលរដ្ឋដោយមានសកម្មភាពយ៉ាងផុលផុស ។
លោកអភិបាលស្រុកថ្លែងទៀតថា នៅថ្ងៃទី៦ ខែកក្កដា លោក ជាម ច័ន្ទសោភ័ណ អភិបាលខេត្តអមដំណើរដោយសហការីជាច្រើនរូប បានអញ្ជើញចុះផ្ទាល់ដល់ផ្ទះរបស់ប្រជាពលរដ្ឋនៅឃុំមៀន ដោយធ្វើការណែនាំដល់អ្នកចិញ្ចឹមជ្រូក ត្រូវបង្កើនការប្រុងប្រយ័ត្ន ។ ប្រសិនមានជ្រូកណាឈឺ ត្រូវបំបែកចេញដាក់ឲ្យឆ្ងាយ តាមដានមើលពីស្ថានភាពជំងឺ ដើម្បីជៀសវាងកុំឲ្យឆ្លងទៅជ្រូកផ្សេងទៀត ដោយហាមមិនឲ្យចរាចរណ៍សត្វក្នុងរង្វង់ផ្ទុះជំងឺ៣គីឡូម៉ែត្របួនជ្រុងហាមលក់ ។
ក្រោមកិច្ចសហការជាមួយនឹងមន្ទីរកសិកម្មរុក្ខាប្រមាញ់ និងនេសាទខេត្ត បានចុះផ្សព្វផ្សាយទៅដល់ឃុំ
មួយចំនួនទៀតក្នុងស្រុកអូររាំងឪ ឲ្យមានការយល់ដឹងពីជំងឺប៉េស្តជ្រូកអាហ្វ្រិកឲ្យកាន់តែមានភាពផុលផុស ហើយជំងឺនេះបើសិនឆ្លងទៅជ្រូកផ្សេងនោះនឹងត្រូវងាប់១០០ភាគរយ មិនមានថ្នាំព្យាបាលទេ តែវាមិនចម្លងមកមនុស្សឡើយ ។
ផ្ទះដែលបានរកឃើញជ្រូកមានមេរោគនេះមុនគេគឺផ្ទះរបស់ឈ្មោះ ហោ ឈឿង ប្រពន្ធឈ្មោះ ឆុម យឹម នៅភូមិកំពូលសេរី និងឈ្មោះសំ ចេន ប្រពន្ធឈ្មោះ ប៊ុត ថុន នៅភូមិសោយ។លោក ហេង ពិសិដ្ឋ ប្រធានមន្ទីរកសិកម្មរុក្ខាប្រមាញ់ និងនេសាទខេត្ត ប្រាប់ឲ្យដឹងដែរ ថា ចាប់តាំងពីថ្ងៃទី២៣ ខែមិថុនាដល់ថ្ងៃទី៦ ខែកក្កដា ឆ្នាំ២០១៩ ជ្រូកកើតជំងឺប៉េស្តជ្រូកអាហ្វ្រិកនៅឃុំមៀន ស្រុកអូររាំងឪ បានងាប់ជាបន្តបន្ទាប់កើនដល់៣៣ក្បាល និងឈឺចំនួន៥៨ក្បាល ។
រូបលោកបានចុះផ្សព្វផ្សាយនៅឃុំចំនួន៧នៃស្រុកអូររាំងឪ តាមរយៈលោកមេឃុំ ហើយសម្រាប់ស្រុក-ក្រុងចំនួន៧ក្នុងខេត្តត្បូងឃ្មុំ នឹងមានផែនការចុះបេសកកម្មបន្តទៀត ដោយមានចែកថ្នាំសម្រាប់បាញ់សម្លាប់មេរោគឲ្យពលរដ្ឋមានការយល់ដឹងកាន់ខ្ពស់ និងចេះពិធីការពារ ។
ជំងឺប៉េស្តជ្រូកអាហ្វ្រិកនេះមិនឆ្លងមកមនុស្សទេ តែវាឆ្លងដល់ជ្រូកដូចគ្នាដែលធ្វើឱ្យមានការបង់ខាតដល់ម្ចាស់ជ្រូក ពិសេសម្ចាស់កសិដ្ឋានហើយការផ្គត់ផ្គង់សាច់នឹងខ្វះខាតនៅលើទីផ្សារ ។ នៅប្រទេសវៀតណាម ការផ្គត់ផ្គង់សាច់កំពុងប្រឈមលើទីផ្សារដោយសារពាណិជ្ជកម្មសាច់ ជ្រូកនេះត្រូវបានប្រទេសនានាហាមឃាត់ ។ (សម្រួលដោយ៖ ស្រីណា)
ចែករំលែកព័តមាននេះ