សហរដ្ឋអាមេរិក ៖ ក្រោយការរញ្ជួយដីខ្លាំងកាលពីថ្ងៃទី៤ កក្កដា ធ្វើឲ្យញ័ររញ្ជួយដល់ភាគខាងត្បូងរដ្ឋកាលីហ្វ័រនីញ៉ា ពលរដ្ឋមួយចំនួនបានរៀបចំវត្ថុចាំបាច់នានាទុក ហើយនាំគ្នានៅមិនឆ្ងាយពីមាត់ទ្វារ ដើម្បីងាយបើកើតមានការរញ្ជួយដីខ្លាំងទៀតដើម្បីរត់ចេញ្ឲ្យបានឆាប់។ ប៉ុន្តែនាថ្ងៃទី៥ កក្កដា ដោយសារការជ្រួលច្របល់ ព្រោះតែការរញ្ជួយដីទី២ខ្លាំងជាងមុន មានអ្នកខ្លះទោះរៀបចំឥវ៉ាន់ចាំបាច់ត្រៀមទុក បានរត់ចេញពីផ្ទះយ៉ាងលឿន ភ្លេចយករបស់ត្រៀមទុកតាមខ្លួនផង។
ពលរដ្ឋនៅកាលីវ័រនីញ៉ាភាគច្រើន បានរៀបចំឥវ៉ាន់ត្រៀមទុកលើក្បាលដំណេក ដោយខ្លាចការរញ្ជួយដីធំហៅBIG ONE ជាការរញ្ជួយដីដែលមានកម្លាំងបំផ្លិចបំផ្លាញក្នុងរដ្ឋកាលីហ្វ័រនីញ៉ា ជាតំបន់នៅចំខ្សែបន្ទាត់នៃការរញ្ជួយដីដែលមានគ្រោះថ្នាក់ខ្លាំងឬមិនសូវខ្លាំង។
ការរញ្ជួយដី២ជាប់ៗគ្នា មួយមានកម្លាំង៦,៤និងមួយទៀតកម្លាំង៧,១រីស្ទ័រ កើតមាននៅកន្លែងមួយចម្ងាយប្រមាណជា២៥០គីឡូម៉ែត្រពីទីក្រុងឡូសអេនចឺឡេស បាននាំឲ្យមានការព្រួយបារម្ភចំពោះគ្រោះមហន្តរាយធម្មជាតិនេះ។ បណ្ដាអ្នកទទួលខុសត្រូវនយោបាយ បានអំពាវនាវដល់ប្រជាជនឲ្យរៀបចំខ្លួន សម្រាប់ការរញ្ជួយដីថ្មីៗ។
ក្នុងតំបន់នោះមនុស្សម្នាដឹងថា ពួកគេរស់នៅក្នុងតំបន់មួយដែលមានគ្រោះថ្នាក់ដោយសារការរញ្ជួយដី តែលែងចាប់អារម្មណ៍ធំដុំចាប់តាំងពីច្រើនឆ្នាំមកហើយ។ អាស្រ័យហេតុនេះបានជាពួកគេហាក់មានការធ្វេសប្រហែស។ តែក្រោយការរញ្ជួយដីខ្លាំងដល់ទៅ២ជាប់ៗគ្នានៅកន្លែងដដែល ការព្រួយបារម្ភពិតណាស់មានជាប់ជាប្រចាំ។
កាលពីខែមករាឆ្នាំ១៩៩៤មានការរញ្ជួយដីខ្លាំងមួយកម្លាំង៦,៧រីស្ទ័រក្នុងតំបន់ក្រុងឡូសអេនចឹឡេស បណ្ដាលឲ្យមនុស្សស្លាប់ជិត៦០នាក់និងជាង៩០០០នាក់រងរបួស។ ចាប់តាំងពីឆ្នាំ២០០៨មកមានសមយុទ្ធសម្រាប់ករណីមានការរញ្ជួយដី ត្រូវបានធ្វើរៀងរាល់ឆ្នាំនៅភាគខាងត្បូងកាលីហ្វ័រនីញ៉ា៕ (កែសម្រួលដោយ ៖ បុប្ផា)
ចែករំលែកព័តមាននេះ