រាជធានីភ្នំពេញ៖ អ្នកនាងឌី លីណា តារាដែលធ្លាប់ចូលរួមសម្តែងជាច្រើនរឿងនោះ បានប្រកាសផ្អាកអាជីពសិល្បៈមួយរយៈ ។ ការសម្រេចផ្អាកសិល្បៈនេះដោយសារតែនាងចាំបាច់ត្រូវមើលថែកូននៅក្នុងផ្ទៃដោយប្រុងប្រយ័ត្នបំផុត ដោយសារកូនទីបីមានភាពពិបាកជាងកូន មុនៗ ។
អតីតតារាចម្រៀងក្នុងក្រុមស្រមោចក្រហមអ្នកនាងឌី លីណា បានអះអាងកាលពីពេល ថ្មីៗកន្លងមកថា កូននៅក្នុងផ្ទៃរបស់នាងមានអាយុ៣ខែហើយរហូតមកដល់ពេលនេះ ។ នាងបញ្ជាក់ថា ដំបូងឡើយកូនរបស់នាងស្ទើរតែបាត់បង់ទៅហើយ ដោយសារបញ្ហាសុខភាពរបស់នាងប៉ុន្តែមកទល់ពេលនេះ អ្វីៗបានល្អប្រសើរឡើងវិញហើយ ប៉ុន្តែត្រូវទាមទារឲ្យនាងមើលថែដោយយកចិត្តទុកដាក់ជាទីបំផុត ។ ដោយសារបញ្ហានេះហើយទើបឌី លីនណា សម្រេចផ្អាកសិល្បៈមួយរយៈសិន ដោយត្រូវមើលសុខភាពខ្លួននាង និងកូនក្នុងផ្ទៃ ខណៈពេលពោះរបស់នាងកាន់តែធំមិនអាចស្លៀកឈុតបុរាណបាន ។
បើតាមអ្នកនាងឌី លីណា រឿងដែលនាងកំពុងថតគឺនៅតែថតដដែល ដើម្បីកុំឲ្យខូចសាច់រឿង ប៉ុន្តែសម្រាប់រឿងថ្មីដែលគេទាក់ទងមកគឺនាងមិនទទួលទៀតឡើយ ។ យ៉ាងណាសិល្បៈ គឺជាការស្រឡាញ់ចូលចិត្តរបស់នាង បើទោះបីជាកម្រៃបានមកពីការថតនេះនៅមានកម្រិតសម្រាប់ផ្គត់ផ្គង់គ្រួសារឲ្យបានគ្រប់គ្រាន់ក៏ដោយ ។
ឌី លីណា បញ្ជាក់ថា បច្ចុប្បន្នក្រៅពីការងារសិល្បៈ នាងក៏មានមុខរបរពុះដីឡូតិ៍លក់ផងដែរ ដោយមិនពឹងតែលើសិល្បៈតែមួយមុខទេ ។ បើទោះបីជាឌី លីណា បានសាងគ្រួសារមានកូន៣នាក់មកហើយក្តី ប៉ុន្តែតារារូបនេះហាក់មិនសូវបានបង្ហាញមុខមាត់ស្វាមីជាសាធារណៈឡើយ ។ ឌី លីណា បញ្ជាក់ថា ស្វាមីរបស់នាងកំពុងតែមានវត្តមាននៅស្រុកខ្មែរ ក្នុងពេលដែលនាងកំពុងពពោះកូនទីបីនេះ ។
ឌី លីណា ធ្លាប់បានផ្អាកសិល្បៈ បន្ទាប់ពីនាងបានសម្រេចកសាងគ្រួសារ ខណៈពេលដែលនាងធ្លាប់បង្ហាញបំណងនឹងទៅរស់នៅអាមេរិកមួយរយៈដើម្បីយកសញ្ជាតិនៅទីនោះ ទើបត្រឡប់មកស្រុកខ្មែរវិញ ។ ទោះបីជាយ៉ាងណា ក្តីឌី លីណា មិនបានបញ្ជាក់ទេថា នាងអាចនឹងវិលចូលសិល្បៈវិញ ឬយ៉ាងណាឡើយ បន្ទាប់ពីនាងសម្រាលកូនរួចហើយនោះ ៕ (កែសម្រួលដោយ ៖ បុប្ផា)
ចែករំលែកព័តមាននេះ