រាជធានីភ្នំពេញ ៖ យុវជន២នាក់ជំនាញខាងបិទគូទពីក្រោយអោយបក្សពួកខ្លួនធ្វើសកម្មភាពឆក់ត្រូវសមត្ថកិច្ច ប៉ុស្តិ៍ផ្សារដើមថ្កូវសហការជាមួយសមត្ថកិច្ចទួលទំពូង២ធ្វើការប្រដេញបង្ក្រាបជាក់ស្ដែងបានភ្លាមៗ បន្ទាប់ពីពួកគេធ្វើសកម្មភាពឆក់ទូរស័ព្ទដៃមួយគ្រឿងពីជនជាតិចិនមិនបានសម្រេចព្យាយាមជិះរត់គេចខ្លួន តែរត់មិនរួចត្រូវសមត្ថកិច្ចប្រដេញតាមចាប់បាន២នាក់វាយខ្នោះ នាំខ្លួនមកសាកសួរនៅប៉ុស្តិ៍នគរបាលរដ្ឋបាលផ្សារដើមថ្កូវ ដែលហេតុការណ៍នេះដែលបានកើតឡើងកាលពីវេលាម៉ោង១០យប់ថ្ងៃទី៧ កក្កដា នៅលើផ្លូវ430 សង្កាត់ផ្សារដើមថ្កូវ ខណ្ឌចំការមន ។
យុវជនដែលជំនាញបិទគូទអោយបក្សពួកធ្វើសកម្មភាពឆក់នោះទីមួយឈ្មោះ សម្បត្តិ ភេទប្រុស អាយុ18ឆ្នាំ មុខរបរសិស្សវិទ្យាល័យជម្ពូវ័ន ស្នាក់នៅភូមិព្រែកទា សង្កាត់ចោមចៅ២ ខណ្ឌពោធិ៍សែនជ័យ ជាអ្នកបើកម៉ូតូ និងម្នាក់ទៀតឈ្មោះ ម៉ុន បញ្ញា ភេទប្រុស អាយុ១៨ឆ្នាំ មុខរបរនៅផ្ទះ មានទីលំនៅភូមិក្រាំងដូនតី សង្កាត់ចោមចៅ2 ខណ្ឌពោធិ៍សែនជ័យ ។ ចំណែកជនរងគ្រោះជាជនជាតិចិន ភេទប្រុស សុំមិនបញ្ចេញឈ្មោះ ទូរស័ព្ទដែលជនសង្ស័យឆក់នោះម៉ាក VIVO ពណ៌ទឹកប្រាក់ ។
តាមចម្លើយសារភាពរបស់ជនសង្ស័យទាំងពីរនាក់បានប្រាប់អោយដឹងថា មុននឹងធ្វើសកម្មភាពខ្លួន និងបក្សពួកមានគ្នា៤នាក់ជិះម៉ូតូ២គ្រឿងមួយម៉ាកឌូក ពណ៌ខ្មៅលាយទឹកក្រូច បើកបរដោយយុវជនឈ្មោះ សម្បត្តិ និងឈ្មោះ ម៉ុន បញ្ញា អង្គុយពីក្រោយនឹងជាអ្នកបិទគូទអោយម៉ូតូមួយគ្រឿងទៀតម៉ាក Beat ពណ៌ខៀវ មិនចាំផ្លាកលេខ បើកបរដោយមិត្តភក្ដិរបស់គេ២នាក់មួយឈ្មោះ នុ ជាអ្នកអ្នកធ្វើសកម្មភាពឆក់ និងអ្នកបើកម៉ូតូឈ្មោះ យុទ្ធ ។
ប្រភពព័ត៌មានពីសមត្ថកិច្ចបានប្រាប់អោយដឹងថា មុនកើតហេតុគឺកម្លាំងសមត្ថកិច្ចបានធ្វើដំណើរឆ្លងកាត់ទីនោះហើយឃើញជនជាតិចិនម្នាក់កាន់ទូស័ព្ទនិយាយបម្រុងឡើងជិះកង់បីតែត្រូវជនសង្ស័យខាងលើជិះម៉ូតូ២គ្រឿងមានគ្នា៤នាក់ធ្វើដំណើរតាមផ្លូវ430 ទិសដៅពីត្បូងទៅជើង ហើយជនសង្ស័យដែលជិះម៉ូតូម៉ាក Beat បានជិះទៅអែបជនរងគ្រោះហើយធ្វើសកម្មភាពឆក់យកទូរស័ព្ទដៃតែមិនបានសម្រេចបណ្តាលអោយធ្លាក់ក៏បានបន្ថែមល្បឿនបើករត់គេចខ្លួន ។
ដោយឃើញជាក់ស្តែងសមត្ថកិច្ចក៏បានធ្វើការប្រដេញតាមជនសង្ស័យដែលធ្វើសកម្មភាពឆក់តែត្រូវបក្សពួកគេដែលជិះម៉ូតូឌូក បិទគូទពីក្រោយនោះព្យាយាមរារាំង និងលើកជើងធាក់ម៉ូតូសមត្ថកិច្ចទៀតពេលកំពុងប្រដេញតែកម្លាំងសមត្ថកិច្ចនៅតែព្យាយាមប្រដេញរហូតទៅដល់ផ្លូវ271 ចំណុចស្តុបផ្លូវបំបែកជាប្រាំ សង្កាត់ទំនប់ទឹក ទើបក្របួចបានជនសង្ស័យជំនាញបិទគូទបាន២នាក់ ចំណែកជនដៃដល់ដែលធ្វើសកម្មភាពឆក់រត់គេចខ្លួនបាត់ស្រមោលសមត្ថកិច្ចកំពុងធ្វើការស្រាវជ្រាវតាមចាប់ខ្លួនបន្ត ។
នៅចំពោះមុខសមត្ថកិច្ចជនសង្ស័យទាំង២នាក់ពិតជាបានសារភាពថា ពួកគេនឹងបក្សពួកពិតជាបានធ្វើសកម្មភាពឆក់ទូរស័ព្ទដៃពីជនរងគ្រោះជាជនជាតិចិនពិតប្រាកដមែន ។ បច្ចុប្បន្នជនសង្ស័យទាំង២នាក់ត្រូវបានសមត្ថកិច្ចមូលដ្ឋានប៉ុស្តិ៍នគរបាលរដ្ឋបាលផ្សារដើមថ្កូវកសាងសំណុំរឿងបញ្ជូនបន្តទៅអធិការដ្ឋានខណ្ឌចំការមនចាត់ការបន្តតាមនីតិវិធី ៕
កែសម្រួលដោយ ៖ សំណាង
ចែករំលែកព័តមាននេះ