វ៉ាស៊ីនតោន ៖ ប្រធានាធិបតី Donald Trump ចូលចិត្តសន្សំពិន្ទុណាស់ ដោយពេលនេះអាមេរិកនៅតែមានពិន្ទុសូន្យ ខណៈដែលប្រទេសផ្សេងៗទៀតឡើងពិន្ទុអស់ហើយ ។ ពិន្ទុនេះគឺជាពិន្ទុសំដៅទៅលើលទ្ធផលនៃសង្គ្រាមពាណិជ្ជកម្ម ។ ខណៈពេលដែលអតិថិជនអាមេរិកបានរង់ចាំអស់រយៈពេលជាងមួយឆ្នាំ ដើម្បីមើលដំណោះស្រាយខ្លះចំពោះជម្លោះពាណិជ្ជកម្មជាច្រើនដែលបានចាប់ផ្តើមដោយ Trump នោះ ប្រទេសផ្សេងទៀតបានព្រមព្រៀងកាត់បន្ថយពន្ធគយរបស់ពួកគេហើយបានចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយគ្នាទៅវិញទៅមកថែមទៀត។ ទន្ទឹមនឹងនេះដែរអ្នកប្រើប្រាស់ និងអ្នកនាំចេញរបស់អាមេរិក កំពុងលង់ទឹកនៅក្នុងសមុទ្រនៃពន្ធគយខ្ពស់ ។
និយាយដោយសង្ខេបៗ ក្នុងរយៈពេលមួយឆ្នាំកន្លះមកនេះ លោកប្រធានាធិបតីបានដាក់ពន្ធខ្ពស់កប់ពពកទៅលើរបស់នាំចូលពីប្រទេសចិន ដូចជា ដែក អាលុយមីញ៉ូម និង ផលិតផលផ្សេងៗទៀត ដែលតម្លៃជាងរាប់ពានលានដុល្លារអាមេរិក ។ រាប់ចាប់ពីអ្នកផលិតទៅដល់កសិករ ឧស្សាហកម្មទាំងអស់សុទ្ធតែត្រូវរងគ្រោះដោយការគាបពន្ធនេះទាំងអស់។ ពួកគេត្រូវចំណាយថ្លៃដើមផលិតកម្មខ្ពស់និងការចូលទីផ្សារបរទេសតិចតួច ហើយការផលិតរបស់អាមេរិកបានធ្លាក់ចុះដល់កម្រិតទាបរយៈពេល ៣២ខែមកនេះ ។
បើទោះបីជាមានការធ្វើសង្គ្រាមពាណិជ្ជកម្មយ៉ាងណាក៏ដោយ ប្រទេសផ្សេងៗទៀតមិនបានទុកពេលឱ្យអត់ប្រយោជន៍នោះទេ ដោយពួកគេបានចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយគ្នា ។ ថ្មីៗនេះសហភាពអឺរ៉ុប ប្រេស៊ីល អាហ្សង់ទីន អ៊ុយរូហ្គាយ និងប៉ារ៉ាហ្គាយ បានប្រកាសអំពីកិច្ចព្រមព្រៀងពាណិជ្ជកម្មសេរី ដែលគ្របដណ្តប់លើប្រជាជន ៧៨០លាននាក់ ។ នេះគឺជាកិច្ចព្រមព្រៀងដ៏ធំមួយ ដោយសារតែប្លុកពាណិជ្ជកម្មរបស់អាមេរិកខាងត្បូងមានពន្ធគយខ្ពស់ ដែលប្រឆាំងនឹងសហភាពអឺរ៉ុប ។ ជប៉ុននិងសហភាពអឺរ៉ុប ក៏បានសម្រេចកិច្ចព្រមព្រៀងពាណិជ្ជកម្មសេរីមួយផងដែរ ។
សមាជិកសហភាពអឺរ៉ុបក៏បានធ្វើបច្ចុប្បន្នភាពលើកិច្ចព្រមព្រៀងពាណិជ្ជកម្មរបស់ខ្លួនជាមួយនឹងម៉ិកស៊ិកូផងដែរ ហើយបានចុះហត្ថលេខាលើកិច្ចព្រមព្រៀងពាណិជ្ជកម្មជាមួយវៀតណាម ដើម្បីលុបបំបាត់ពន្ធលើទំនិញនិងសេវាកម្ម៩៩% រវាងទីផ្សារអឺរ៉ុបនិងវៀតណាម។ ទន្ទឹមនឹងនេះដែរ ប្រទេសនៃភាពជាដៃគូឆ្លងកាត់ប៉ាស៊ីហ្វិកចំនួន១២ ដែលរួមបញ្ចូលទាំងប្រទេសជប៉ុន បានសម្លឹងមើលការសម្រេចកិច្ចព្រមព្រៀងជាមួយដៃគូសក្តានុពលផ្សេងទៀត បន្ទាប់ពីលោក Trump បានច្រានចោលកិច្ចព្រមព្រៀងនេះ នៅថ្ងៃដំបូងរបស់លោកនៅក្នុងការិយាល័យ។
តើការពិតនេះមានន័យថាយុទ្ធសាស្ត្រ Trump កំពុងដំណើរការយ៉ាងរលូនដែរឬទេ? មិនមែនទេ។ ផែនការរបស់លោក Trump គឺថាក្រុមហ៊ុនទាំងឡាយនឹងចាកចេញពីប្រទេសចិនហើយត្រលប់ទៅសហរដ្ឋអាមេរិកវិញ។ ប៉ុន្តែនោះមិនមែនជាអ្វីដែលកំពុងកើតឡើងនោះទេ។ ផ្ទុយទៅវិញ ពួកគេកំពុងផ្លាស់ប្តូរផលិតកម្មទៅបណ្តាប្រទេសអាស៊ីផ្សេងទៀតរួមទាំងប្រទេសវៀតណាម។ នោះហើយជាមូលហេតុដែលប្រធានាធិបតីកំពុងគំរាមកំហែងដាក់ពន្ធគយយ៉ាងធ្ងន់ធ្ងរប្រឆាំងនឹងវៀតណាម ៕
ប្រភព ៖ reason , កែសម្រួលដោយ ៖ សំណាង
ចែករំលែកព័តមាននេះ