ខេត្តព្រះសីហនុ ៖ រយៈពេលប៉ុន្មានថ្ងៃក្នុងសប្តាហ៍ទី៤ ខែមិថុនា នេះ ភ្លៀងបានបង្អោរធា្លក់ជាបន្ដបន្ទាប់ ដែលធ្វើឲ្យលំនៅឋានរបស់ប្រជាពលរដ្ឋនៅតំបន់ខ្លះ ក្នុងក្រុងព្រះសីហនុ មានការជន់លិចដោយទឹកភ្លៀង និងទឹកកខ្វក់…
ខេត្តព្រះសីហនុ ៖ រយៈពេលប៉ុន្មានថ្ងៃក្នុងសប្តាហ៍ទី៤ ខែមិថុនា នេះ ភ្លៀងបានបង្អោរធា្លក់ជាបន្ដបន្ទាប់ ដែលធ្វើឲ្យលំនៅឋានរបស់ប្រជាពលរដ្ឋនៅតំបន់ខ្លះ ក្នុងក្រុងព្រះសីហនុ មានការជន់លិចដោយទឹកភ្លៀង និងទឹកកខ្វក់ ។
បន្ទាប់ពីទទួលបានព័ត៌មាននេះ កាលពីរសៀលថ្ងៃចុងសប្តាហ៍ វត្តមានរបស់លោកគួច ចំរេីន អភិបាលខេត្ដព្រះសីហនុ បានដឹកនាំក្រុមការងារចុះត្រួតពិនិត្យតាមតំបន់ជន់លិចមួយចំនួនក្នុងក្រុងព្រះសីហនុ និងបានជម្រុញឲ្យមន្ត្រីជំនាញបន្ដអនុវត្ដវិធានការច្បាប់ដើម្បីដោះស្រាយបញ្ហាប្រឈមជូនប្រជាពលរដ្ឋឲ្យបានឆាប់រហ័ស។ លោកមានប្រសាសន៍ថា លោកបានបញ្ជាឲ្យក្រុមការងារគ្រប់គ្រងប្រព័ន្ធប្រឡាយ អូរ ចាត់ វិធានការតាមផ្លូវច្បាប់ ឬកសាងសំណុំរឿងបញ្ជូនទៅតុលាការ ដើម្បីចាត់ការបន្ទាប់ពីបានណែនាំរួចហើយតែនៅតែបន្ដរំលោភចំណី ឬលើប្រឡាយ អូរទៀត ។
មន្ទីរធនធានទឹក និងឧតុនិយមខេត្តព្រះសីហនុ ដែលជាអនុប្រធានគណៈកម្មការគ្រប់គ្រងប្រព័ន្ធលូ ប្រឡាយ អូរ និងអាងប្រព្រឹត្ដកម្ម ត្រូវមានវិធានការដាច់ខាតមួយ ចំពោះបុគ្គលទាំងឡាយណា ដែលបានរំលោភប្រឡាយ អូរ បង្ករឲ្យមានការស្ទះទឹកជន់លិចភូមិឋានរបស់ប្រជាពលរដ្ឋនាបច្ចុប្បន្ននេះ។
លោកបន្ដថា សព្វថ្ងៃនេះប្រឡាយ អូរ នៅក្រុងព្រះសីហនុ ត្រូវបានរងការរំលោភហើយរំលោភទៀត ជាបន្តបន្ទាប់ពីសំណាក់អ្នកលោភលន់មួយចំនួន ។ ប្រឡាយ អូរខ្លះ ត្រូវបានគេរំលោភយកដោយច្នៃដាក់លូរួចចាក់ដីលុប និងធ្វើផ្ទះពីលើបង្ករឲ្យស្ទះទឹកមិនអាចឲ្យទឹកហូរចេញបានលឿន ដែលជាមូលហេតុចម្បងមួយនៅក្នុងចំណោម មូលហេតុសំខាន់ៗជាច្រើនទៀត ធ្វើឱ្យមានការជន់លិចភូមិឋានប្រជាពលរដ្ឋ។
សូមបញ្ជាក់ផងដែរថា ក្រុងព្រះសីហនុ គឺជាតំបន់ខ្ពង់រាបហើយ ទឹកតែងតែហូរធ្លាក់មកពីទីខ្ពស់ ទៅទីទំនាប តាមលូ ប្រឡាយ អូរ ប៉ុន្តែដោយសារស្ថានភាពប្រឡាយ អូរ ត្រូវបានគេរំលោភយក វាបានធ្វើឲ្យផ្ទៃប្រឡាយ អូររួមតូច ដែលបានធ្វើឲ្យទឹកចាល់លិចហូតដល់ភូមិប្រជាពលរដ្ឋ ធ្វើឲ្យពួកគាត់ ដែលរស់នៅតាមតំបន់ទំនាបនានា ដូចជានៅភូមិ២ ភូមិ៤ សង្កាត់លេខ៤ ក្រុងព្រះសីហនុនោះ ស្រែកដង្ហោយរកអន្តរាគមន៍ពីអាជ្ញាធរ និងសមត្ថកិច្ចពាក់ព័ន្ធជួយដោះស្រាយបញ្ហាទឹកភ្លៀង និងទឹកកខ្វក់ជន់លិចលំនៅឋានពួកគាត់។ (សម្រួលដោយ៖ ស្រីណា)
ចែករំលែកព័តមាននេះ