ខេត្តកោះកុង ៖ កាលពីថ្ងៃទី០២ ខែកក្កដា ឆ្នាំ២០១៩ មន្ទីររ៉ែ និងថាមពលខេត្តកោះកុង បានចេញលិខិតបិទ និងលុបក្រុមហ៊លុនចំនួន12 ដែលកំពុងធ្វើអាជីវកម្មបូមខ្សាច់ និងការធ្វើសិប្បកម្មធនធានរ៉ែ នៅក្នុងភូមិសាស្ត្រទឹកដីខេត្តកោះកុង ។ ប៉ុន្តែទន្ទឹមនឹងនេះ ក៏នៅមានក្រុមហ៊ុនចំនួន1 នៅតែបន្តសកម្មភាពបូមខ្សាច់អត់ច្បាប់ដដែល ។
យោងតាមលិខិត2ដាច់ដោយឡែកពីគ្នារបស់មន្ទីររ៉ែ និងថាមពលខេត្ត ចុះថ្ងៃទី០២ ខែកក្កដា ឆ្នាំ២០១៩ លិខិតទី១ បានកំណត់បិទការធ្វើអាជីវកម្មបូមខ្សាច់ នៅដងព្រែកស្រែអំបិល ស្រុកស្រែអំបិល និងព្រែកត្រពាំងរូង ស្រុកកោះកុង ចំនួន៤ ក្រុមហ៊ុន ទី១-លោក កក់ ផុង ២-លោក ឡេង អា៑ង ៣-លោក ជា សុផល ៤-លោកស្រី ឈីវ កៀក។ លិខិតទី២ បានកំណត់លុប អាជ្ញាប័ណ្ណសិប្បកម្មធនធានរ៉ែ នៅក្នុងភូមិសាស្ត្រខេត្តកោះកុង ចំនួន៨ ក្រុមហ៊ុនទី១- លោកលឹម សុខឃាង ២-លោក ជិ ទុន ៣-លោក ផាត់ ប៊ុនហ៊ួរ ៤-លោក ជិ ឈួង ៥-លោក ឡោ សុថុល ៦-លោក ជៀម សៀមឆាយ ៧-លោក ឡេង សូយទ្រី ៨-លោក ជា គឹមរ៉ុង ។
ហើយទន្ទឹមនឹងការបិទ និងលុប អាជ្ញាប័ណ្ណរបស់ក្រុមហ៊ុនទាំង១២ខាងលើ គេសង្កេតឃើញក្រុមហ៊ុនមួយឈ្មោះ ឡេង ជិន កំពុងបន្តការបូមខ្សាច់ដោយអត់ច្បាប់តែម្តង នៅក្នុងដងព្រែកស្រែអំបិល និងបើកទីតាំងលក់យ៉ាងអនាធិប្បតេយ្យ ។
តាមការបញ្ជាក់ពីមន្ត្រីរ៉ែថាមពលខេត្ត ឱ្យដឹងថា ការចុះបិទ និងលុប ការធ្វើអាជីវកម្ម និងអាជ្ញាប័ណ្ណរបស់ក្រុមហ៊ុនទាំង១២ខាងលើ ដោយយោងតាមគោលការណ៍ណែនាំពីក្រសួង រ៉ែ និងថាមពល និងចំណារឯកភាពរបស់លោកស្រីអភិបាលខេត្ត ។ ម្យ៉ាងទៀត កន្លងមក ក្រុមហ៊ុនទាំងនោះ មិនបានគោរពតាមលក្ខណៈបច្ចេកទេស និងគោលការណ៍ ដែលក្រសួងបានណែនាំ។
ចំណែកក្រុមហ៊ុនមួយឈ្មោះ ឡេង ជិន ដែលបានធ្វើអាជីវកម្មបូមខ្សាច់នាអំឡុងពេលកន្លងមក និងកំពុងបន្តសកម្មភាពបូមដោយល្មើសច្បាប់ពេលនេះ មន្ទីរបានចុះធ្វើកិច្ចសន្យា ហាមឃាត់ ហើយកាលពីថ្ងៃទី០៥ ខែកក្កដា ២០១៩ កន្លងទៅថ្មីៗនេះ និងបានរាយការណ៍ទៅក្រសួងរួចហើយដែរ ។
មន្ត្រីខាងលើបានបញ្ជាក់ទៀតថា នៅក្នុងស្រុកស្រែអំបិល មានតែក្រុមហ៊ុនមួយគត់ឈ្មោះសហគ្រាស លឹម បុក ខនស្ត្រាក់សិន មេធៀរៀល ដែលមានអាជ្ញាប័ណ្ណពីក្រសួងរ៉ែ និងថាមពល និងក្រសួងបរិស្ថាន អនុញ្ញាតិឱ្យធ្វើអាជីវកម្មខ្សាច់សមុទ្រ រហូតដល់ឆ្នាំ២០២០ ៕ (កែសម្រួលដោយ ៖ បុប្ផា)
ចែករំលែកព័តមាននេះ