សហរដ្ឋអាមេរិក ៖ ការរញ្ជួយដីខ្លាំងទី២មួយទៀត មានកម្លាំងដល់ទៅ៧,១រីស្ទ័រ កើតមាននៅភាគខាងត្បូងកាលីហ្វ័រនីញ៉ា កាលពីយប់ថ្ងៃទី៥ កក្កដា វេលាម៉ោង២០និង១៩នាទីម៉ោងក្នុងស្រុក។ នេះបើតាមវិទ្យាស្ថានភូគម្ភសាស្អ្រអាមេរិកUSGS។
ចំណុចកណ្ដាលរបស់វាស្ថិតនៅចម្ចាយ១៧គីឡូម៉ែត្រភាគឦសានទីក្រុងRIDGECREST ជាទីក្រុងមួយមានប្រជាជន២៨.០០០នាក់។ ពុំមានសេចក្ដីរាយការណ៍ពីជនរងគ្រោះឡើយ។ បណ្ដារូបភាពបង្ហាញផ្ទះមួយកំពុងមានភ្លើងឆាបឆេះ ហើយសំណាងណាស់ពុំមានជនរងគ្រោះណាម្នាក់ ព្រោះតែបណ្ដាវិធានការដែលបានចាត់ក្រោយការរញ្ជួយដីលើកទីមួយនៅតំបន់នោះដែរ។ ក្នុងទីក្រុងSAN BERNARDINOផ្ទះនានាមានការញ័ររង្គើ ផ្លូវថ្នល់ទាំងឡាយត្រូវប្រេះ ជញ្ជាំងខ្លះបាក់រួចមានតែមនុស្សម្នាក់រងរបួសស្រាល។
ការញ័ររង្គើមានរហូតដល់ទីក្រុងឡាស់វេហ្គាស់រដ្ឋនេវ៉ាដា ដែលនៅទីនោះពួកអ្នកទស្សនាការប្រកួតបាល់បោះមួយ បាននាំគ្នាចាកចេញពីកន្លែងប្រកួត។ អភិបាលរដ្ឋកាលីហ្វ័រនីញ៉ាលោកGAVIN NEWSONបានជម្រុញផែនការបន្ទាន់សម្រាប់រដ្ឋរបស់លោក។ មនុស្សម្នានាំគ្នាចាកចេញពីបណ្ដាអគារ ហើយនៅកន្លែងមួយចម្ងាយដល់២១០គីឡូម៉ែត្រពីទីក្រុងRIDGECREST អ្នកកាសែតម្នាក់របស់ទូរទស្សន៍NBC ត្រូវជម្លៀសចេញពីរោងភាពយន្តមួយនៅសាន់តាដឺម៉ូនីកា ជាកន្លែងដែលលោកស្ថិតនៅទីនោះ។
អ្នកកាសែតរូបនេះសរសេរថាមនុស្សម្នាសម្ងំនៅស្ងាត់ស្ងៀម ពេលអគារចាប់ញ័ររង្គើ ដែលកាន់តែខ្លាំងបន្តិចម្ដងៗ។ ពេលនោះពួកគេនាំគ្នារត់ទៅរកច្រកទ្វារចេញ។ ការរញ្ជួយដីនោះពិតជាគួរឲ្យខ្លាច។
ប្រជាជនរស់នៅក្នុងតំបន់ជិតចំណុចកណ្ដាលនៃការរញ្ជួយដីខ្លាំងដល់ទៅ២លើក ក្នុងរយៈពេលតែ២ថ្ងៃ នាថ្ងៃទី៦កក្កដារៀបរាប់ពីការភ័យខ្លាចរបស់ពួកគេ ក្រោយការរញ្ជួយដីខ្លាំងថ្មី។ ការរញ្ជួយដីកម្លាំង៧,១រីស្ទ័រកាលពីយប់ថ្ងៃទី៥កក្កដា ពិតជាខ្លាំងពុំធ្លាប់មានចាប់តាំងពី២០ឆ្នាំមកហើយក្នុងតំបន់នោះ៕ (កែសម្រួលដោយ ៖ បុប្ផា)
ចែករំលែកព័តមាននេះ