ខេត្តកំពត ៖ យោងតាមសេចក្តីរាយការណ៍បឋមពីអធិការនគរបាលក្រុងកំពតបានឲ្យដឹងថា កាលពីវេលាម៉ោង២១និង០០នាទីយប់ ថ្ងៃទី០៥ ខែកក្កដានេះ មានករណីគ្រោះថ្នាក់ចរាចរណ៍ កើតឡើងលើកំណាត់ផ្លូវជាតិលេខ៣ កំពត វាលរេញ ត្រង់ចំណុចមុខស្ថានីយប្រេងឥន្ទនៈមួយកន្លែង ស្ថិតក្នុងភូមិតាដឹប សង្កាត់អណ្តូងខ្មែរ ក្រុងកំពត ខេត្តកំពត បង្កឡើងដោយរថយន្តបីគ្រឿងបុកបន្តកន្ទុយគ្នា បណ្តាលឲ្យរថយន្តពីរគ្រឿងរងការខូចខាតធ្ងន់មួយគ្រឿង និងស្រាលមួយគ្រឿង ហើយមួយគ្រឿងទៀតបានបង្កើនល្បឿនរត់គេចខ្លួនបាត់មុនសមត្ថកិច្ចទៅដល់កន្លែងកើតហេតុ ។
ប្រភពបានបន្តថា មានរថយន្តបង្កមួយគ្រឿងមិនចាំម៉ាក និងសាវតាអ្នកបើកបរ ដោយបើកប៉ះរថយន្តរងគ្រោះ ហើយបានរត់គេចចេញពីកន្លែងកើតហេតុមុនសមត្ថកិច្ចទៅដល់ ដោយរថយន្តនេះ បើកបរក្នុងទិសដៅពីជើងទៅត្បូង លុះដល់ចំណុចកើតហេតុក៏បានកៀររថយន្តរងគ្រោះម៉ាកសាំយ៉ុង ពណ៌ស ពាក់ផ្លាកលេខកំពង់ឆ្នាំង 2A -0904 បើកបរដោយឈ្មោះ ម៉ម វ៉ាន់ ភេទប្រុស អាយុ៤២ឆ្នាំ នៅភូមិកំពូលមាស ឃុំឫស្សី ស្រុកខាងលិច ស្រុកកំពង់ត្រាច ខេត្តកំពត ។
ប្រភពដដែលបន្តថា នៅវេលាម៉ោង២២និង០០នាទី ថ្ងៃដដែលនៅពេលកម្លាំងសមត្ថកិច្ចកំពុងរៀបចំយករថយន្តរងគ្រោះចេញពីកន្លែងកើតហេតុ ក៏ស្រាប់តែមានរថយន្តមួយគ្រឿងទៀត ពណ៌ខៀវ ពាក់ផ្លាកលេខ 2AU – 7186 បើកបរដោយឈ្មោះ អ៊ុយ វ៉ង់ត្រឺឌី ភេទប្រុស អាយុ៣៣ឆ្នាំ នៅភូមិជ្រោយសំរោង ឃុំបារាយណ៍ ស្រុកដូនកែវ ខេត្តតាកែវ បើកក្នុងទិសដៅពីជើងទៅ ត្បូងបានបុកផ្លាកចរាចរណ៍នៅពីខាងស្តាំដៃ បណ្តាលឲ្យបាក់រួចអូសទៅបុកចំពីមុខរថយន្តរងគ្រោះម៉ាកសាំយ៉ុងនោះបន្ថែមទៀត បណ្តាលឲ្យអ្នកបើករថយន្តពណ៌ខៀវរងរបួសស្រាល ។ រថយន្តខូចខាតធ្ងន់មួយគ្រឿង ។ បន្ទាប់ពីកើតហេតុរថយន្តទាំងពីគ្រឿងត្រូវបាននាំទៅរក្សាទុកនៅអធិការដ្ឋាននគរបាលក្រុង ដើម្បីដោះស្រាយតាមផ្លូវច្បាប់នៅពេលក្រោយ ៕ កែសម្រួលដោយ ៖ សុឃាក់
ចែករំលែកព័តមាននេះ