ខេត្តកំពង់ធំ ៖ តាមសេចក្តីរាយការណ៍បឋមបានឲ្យដឹងថា ស្ត្រីម្នាក់ឲ្យកូនអង្គុយលេងជាមួយកូនទា ដល់ពេលគាត់ដើរទៅយកអង្ករមួយភ្លែត ស្រាប់តែមកវិញកូនបានលង់ទឹកស្លាប់បាត់ទៅហើយ ដែលករណីនេះបានកើតឡើងនៅវេលាម៉ោង០៩និង៤០នាទីព្រឹក ថ្ងៃទី០៦ ខែកក្កដានេះ នៅចំណុចស្រះទឹកក្រោយផ្ទះខ្លួនឯង ក្នុងភូមិចំបក់បញ្ញា ឃុំបន្ទាយស្ទោង ស្រុកស្ទោង ខេត្តកំពង់ធំ ។
សេចក្តីរាយការណ៍បានបន្តថា សពក្មេងខាងលើមានឈ្មោះ ជា មន្នី ភេទប្រុស អាយុ០៥ឆ្នាំ ។ បើតាមការបំភ្លឺពីម្តាយឈ្មោះ ឌូយ សុនា អាយុ៣៦ឆ្នាំ បានប្រាប់ថា ៖ ជារៀងរាល់ថ្ងៃគាត់តែងតែទៅដងទឹកពីស្រះ ហើយកូនគាត់ក៏លេងនៅមាត់ស្រះដែរ លុះដល់ព្រឹកថ្ងៃកើតហេតុ កូនគាត់បានចុះទៅក្នុងស្រះទឹកម្តងហើយ តែគាត់បានហៅមកផ្ទះវិញអោយវាអង្គុយលេងជាមួយនឹងកូនទាជិតកន្លែងគាត់បិទស្រានៅខាងក្រោយផ្ទះ បន្ទាប់មកគាត់បានដើរទៅយកអង្ករនៅក្រោមផ្ទះពេលត្រឡប់មកវិញ ស្រាប់តែបាត់កូន គាត់បានដើរទៅមើលក្នុងស្រះក៏ឃើញកូនអណ្តែតផ្កាប់មុខក្នុងស្រះ ភ្លាមៗនោះគាត់បានស្រង់មកអោយគេជួយធ្វើចលនា រលាក់ទឹកចេញ វានៅតែមិនដឹងខ្លួន ដោយមិនអស់ចិត្តក៏បានដឹកទៅមន្ទីរពេទ្យបង្អែកស្រុកស្ទោង តែគ្រូពេទ្យប្រាប់ថា ៖ ស្លាប់បាត់ហើយក៏នាំគ្នាដឹកសពយកមកផ្ទះវិញ ។
ពេលទទួលព័ត៌មាននេះភ្លាមកម្លាំងជំនាញស្រុក និងប៉ុស្តិ៍ ព្រមទាំងរដ្ឋអំណាចមូលដ្ឋានបានចូលរួមពិនិត្យសពមិនឃើញមានស្លាកស្នាមអ្វីឡើយ ទើបសន្និដ្ឋាន ស្លាប់ដោយសារលង់ទឹកស្រះពិតប្រាកដមែនក៏ប្រគល់សពឲ្យម្តាយធ្វើបុណ្យតាមប្រពៃណីតែម្តង ៕កែសម្រួលដោយ ៖ សុឃាក់
ចែករំលែកព័តមាននេះ