រាជធានីភ្នំពេញ ៖ រដ្ឋបាលរាជធានីភ្នំពេញ បានបង្កើនការធ្វើទំនើបកម្មសេវាដឹកជញ្ជូនរថយន្តក្រុងសាធា រណៈឲ្យកាន់តែល្អប្រសើរ ដើម្បីទាក់ទាញប្រជាពលរដ្ឋក្នុងទីក្រុងឲ្យងាកមកប្រើប្រាស់សេវានេះបានកាន់តែច្រើន ដែលជាការជួយរំដោះការកកស្ទះចរាចរណ៍ តាមរយៈការកាត់បន្ថយការប្រើប្រាស់សេវាធ្វើដំណើរផ្ទាល់ខ្លួន ។
អាជ្ញាធររាជធានីភ្នំពេញ ចាប់ផ្តើមដាក់ឲ្យប្រើប្រាស់ជាផ្លូវការហើយនូវប្រព័ន្ធគ្រប់គ្រងប្រតិបត្តិការរថ យន្តក្រុង និង App សម្រាប់តាមដានចលនាបម្លាស់ទីរថយន្តក្រុង ដើម្បីតាមដានទីតាំងចលនាបម្លាស់ទីរថយន្តក្រុង រួមទាំងការផ្ដល់នូវព័ត៌មានអំពីទីតាំងជាក់ស្ដែងរបស់រថយន្តក្រុង ដែលបង្កលក្ខណៈងាយ
ស្រួលដល់អ្នកធ្វើដំណើរតាមសេវាដឹកជញ្ជូនសាធារណៈនេះ ។
លោក ឃួង ស្រេង អភិបាលរាជធានីភ្នំពេញមានប្រសាសន៍ថា ប្រព័ន្ធ Appតាមដានទីតាំងចលនាបម្លាស់ទីរថយន្តក្រុងនេះ នឹងកាន់តែទាក់ទាញប្រជាពលរដ្ឋឲ្យងាកមកប្រើប្រាស់សេវារថយន្តក្រុងរាជធានីភ្នំពេញបានកាន់តែច្រើន ។ លោកបញ្ជាក់ថា ការសម្រេចដាក់ឲ្យប្រើប្រាស់ប្រព័ន្ធទំនើបកម្មនៅលើរថយន្តក្រុងសាធារណៈរបស់រដ្ឋនេះ គឺបន្ទាប់ពីអ្នកប្រើប្រាស់សេវាដឹកជញ្ជូនសាធារណៈតាមរយៈរថយន្តក្រុង មានការលំបាកមិនដឹងពីដំណើរការរថយន្តក្រុងកំពុងឋិតនៅលើទីតាំងណា ក្រោយពេលរថយន្តក្រុងនោះចាកចេញពីចំណតដឹកអ្នកដំណើរ ហើយនៅពេលខ្លះនៅលើតម្រុយផ្លូវរត់ដូចគ្នា ។
សូមបញ្ជាក់ថា ក្នុងគម្រោងធ្វើឲ្យប្រសើរឡើងនូវសេវាដឹកជញ្ជូនសាធារណៈរថយន្តក្រុងនៅក្នុងរាជធានីភ្នំពេញ ដែលមានរយៈពេល៤ឆ្នាំ ចាប់ពីខែមករា ឆ្នាំ២០១៧ ដល់ខែធ្នូឆ្នាំ២០២០ រដ្ឋបាលរាជធានីភ្នំពេញ បានអនុញ្ញាតឲ្យរដ្ឋាករស្វយ័តដឹកជញ្ជូនសាធារណៈរថយន្តក្រុង(City Bus)រាជធានីភ្នំពេញនិងក្រុមជំនាញ
ការJICA ដាក់ឲ្យដំណើរការសេវាដឹកជញ្ជូនសាធារណៈជូនដល់ប្រជាពលរដ្ឋបានចំនួន១៣ខ្សែដោយ ប្រើប្រាស់រថយន្ត២៣៥គ្រឿង និងមានប្រជាពលរដ្ឋប្រើប្រាស់សេវាពី២៦.០០០នាក់ទៅ៣០.០០០នាក់ក្នុង១ថ្ងៃ ៕ (សម្រួលដោយ៖ ស្រីណា)
ចែករំលែកព័តមាននេះ