រាជធានីភ្នំពេញ ៖ ដើម្បីអភិវឌ្ឍន៍វិស័យវារីវប្បកម្មនៅក្នុងប្រទេសកម្ពុជា ដែលជាវិស័យស្នូលសម្រាប់ជួយដល់កសិករនៅតាមដងទន្លេ សហភាពអឺរ៉ុប បានផ្ដល់ហិរញ្ញប្បទានដល់កម្ពុជានូវទំហំទឹកប្រាក់ប្រមាណ ៨៧ លានអឺរ៉ូ ដោយផ្ដោតទៅលើគម្រោងសំខាន់ចំនួន ០៣ ។ ហើយកាលពីថ្ងៃទី ០៣ ខែកក្កដា ២០១៩ កន្លងទៅនេះ អគ្គរដ្ឋទូតសហភាពអឺរ៉ុបប្រចាំកម្ពុជា លោក ចច អេហ្កា បានជួបជាមួយរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដើម្បីតាមដានគម្រោងដែលជាជំនួយរបស់ខ្លួននៅកម្ពុជា ។
បើយោងតាមសេចក្តីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ជំនួយឧបត្ថម្ភហិរញ្ញប្បទានឥតសំណងពីសហភាពអឺរ៉ុបមានចំនួន ៨៧លានអឺរ៉ូ សម្រាប់អនុវត្តគម្រោងរយ:ពេល ៦០ ខែ (២០១៩- ២០២៣) និងសហការអនុវត្តដោយអង្គការ FAO UNESCO និង UNIDO ដោយរដ្ឋបាលជលផលជាស្ថាប័នទទួលខុសត្រូវ ។ គម្រោងនេះមានគោលបំណងចំបងគឺគាំទ្រលើឆន្ទៈរបស់រាជរដ្ឋាភិបាល ដែលមានចេតនាចង់ធ្វើការអភិវឌ្ឍវិស័យជលផលឱ្យមាននិរន្តរភាព ធន់ទៅនឹងការប្រែប្រួលអាកាសធាតុ និងបរិយាប័នតាមរយ:ការអនុវត្តផែនការសកម្មភាពសំខាន់ៗចំនួន ៣ ។
សកម្មភាពសំខាន់ទាំង ៣ នោះរួមមាន ទី១. ការកែលម្អការដឹកនាំ ការគ្រប់គ្រងលើការអនុវត្តច្បាប់ និងបច្ចេកទេស ការគ្រប់គ្រងអភិរក្ស ត្រួតពិនិត្យ និងអង្កេតធនធានជលផលទាំងទឹកសាប និងសមុទ្រ ។ ទី២. ធ្វើការគាំទ្រដល់ការអភិវឌ្ឍសេដ្ឋកិច្ចគ្រួសារ និងសង្គមតាមរយ:ការពង្រឹង និងពង្រីកខ្សែចង្វាក់ផលិតកម្ម (ចិញ្ចឹម-កែច្នៃ) ដែលរួមចំណែកបង្កើតការងារ និងបង្កើនចំណូលគ្រួសារ និងទី៣. ធ្វើការកាត់បន្ថយគម្លាតសេដ្ឋកិច្ច និងសង្គមរវាងប្រជានេសាទ ជាមួយប្រជាពលរដ្ឋមិនមែនជាអ្នកនេសាទ ។
សេចក្តីប្រកាសរបស់ក្រសួងដដែលនេះបានឱ្យដឹងទៀតថា ការអនុវត្តផែនការសកម្មភាពសំខាន់ៗទាំង ៣ ខាងលើនឹងផ្តល់លទ្ធផលតាមការរំពឹងទុកដែលក្នុងនោះមានជាអាទិ៍ ពង្រឹងការអនុវត្តច្បាប់ បច្ចេកទេស ការគ្រប់គ្រងការនេសាទ ការកែច្នៃ ការការពារដែននេសាទ ការបង្កើតជម្រកត្រីពូជ ការបណ្តុះបណ្តាលសហគមន៍ និងផ្សព្វផ្សាយ ការផ្តល់សេវាកម្ម ការគ្រប់គ្រងមូលនិធិ ការកាត់បន្ថយការបាត់បង់ក្រោយពេលប្រមូលផល ការបង្កើនបរិមាណផលនេសាទក្នុងទីផ្សារ ធានាស្តង់ដារគុណភាព សុវត្ថិភាពទីផ្សារជាតិ-អន្តរជាតិ ការកសាងសមត្ថភាពមន្ត្រីជំនាញអំពីការត្រួតពិនិត្យគុណភាព និងអនាម័យ ។
ទន្ទឹមនឹងនេះ ផ្តល់ការគាំទ្រដល់វិស័យឯកជនក្នុងការវិនិយោគវារីវប្បកម្ម និងផ្តល់ហិរញ្ញវត្ថុដល់សហគ្រាសខ្នាតតូច និងមធ្យមដើម្បីលើកកម្ពស់ខ្សែច្រវាក់ផលិតកម្ម ។ ក្រៅពីនេះ គម្រោងក៏នឹងជួយគាំទ្រដល់សេវាទឹកស្អាត អនាម័យ និងការគ្រប់គ្រងកាកសំណល់ថាមពល និងការអប់រំនៅតំបន់ដីសើម និងតំបន់ឆ្នេរ គាំទ្រដល់ការអភិវឌ្ឍអេកូទេសចរណ៍ផងដែរ ។ ជារួមទាំងគោលបំណង និងលទ្ធផលដែលរំពឹងទុកនៃគម្រោងទាំងមូល នឹងចូលរួមចំណែកយ៉ាងសំខាន់ក្នុងការអនុវត្តច្បាប់ស្តីពី «វិធានការរដ្ឋម្ចាស់កំពង់ផែដើម្បីបង្ការទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាត» ដែលសេចក្តីព្រាងច្បាប់នេះទើបតែត្រូវបានរដ្ឋសភាអនុម័តកាលពីថ្ងៃទី ០១ ខែកក្កដាកន្លងមក ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសានស៍ថា គម្រោងនេះ នឹងអាចជួយអភិវឌ្ឍន៍វិស័យជលផល ដើម្បីជួយដល់ប្រជាពលរដ្ឋកម្ពុជា ដែលមានសក្ដានុពលក្នុងការអភិវឌ្ឍវារីវប្បកម្ម ។ លោកសង្ឃឹម និងជឿជាក់ថាគម្រោងនេះនឹងបង្កើតបាននូវធាតុចូលសំខាន់ៗតាមការរំពឹងទុក ហើយលទ្ធផលនេះ នឹងចូលរួមចំណែកយ៉ាងសំខាន់ក្នុងការអភិវឌ្ឍវិស័យជលផល ក៏ដូចជាអភិវឌ្ឍសេដ្ឋកិច្ចជាតិនាពេលអនាគត ។
លោកធ្លាប់បានលើកឡើងកន្លងមកផងដែរថា តាមយៈគម្រោងអភិវឌ្ឍន៍វារីវប្បកម្មនេះដែរ នឹងធ្វើឱ្យកម្ពុជា អាចកាត់បន្ថយនូវការនាំចូលផលិតផលវារីវប្បកម្មពីប្រទេសជិតខាងបានមួយចំណែកផងដែរ ខណៈបច្ចុប្បន្ន កម្ពុជាបាននាំចូលច្រើន ជាពិសេសពីប្រទេសវៀតណាម និងថៃ ។ លោកថា ៖ «រយៈពេលប្រមាណ ៥ ឆ្នាំនេះ ការនាំចូលត្រីពីក្រៅប្រទេស មកផ្គត់ផ្គង់ក្នុងស្រុកបានធ្លាក់ចុះជាបន្តបន្ទាប់ ជាក់ស្ដែងតួលេខនាំចូលកាលពីប៉ុន្មានឆ្នាំមុនមានរហូតដល់ជាង ៦ ម៉ឺនតោនក្នុងមួយឆ្នាំ និងបានធ្លាក់ចុះមកនៅ ៤ ម៉ឺនតោន ហើយឆ្នាំ ២០១៨ កន្លងទៅនេះ កម្ពុជានាំចូលត្រីតែប្រមាណជាង ២ ម៉ឺនតោនប៉ុន្មានប៉ុណ្ណោះ ហើយក្រសួងនឹងជំរុញដល់ការចិញ្ចឹមនៅតាមបណ្ដាខេត្តសក្ដានុពលមួយចំនួន ដើម្បីឈានទៅដល់ការផ្គត់ផ្គង់ឱ្យគ្រប់គ្រាន់ក្នុងស្រុក និងសម្រាប់ការនាំចេញទៅក្រៅប្រទេស» ។
គួរបញ្ជាក់ថា រហូតមកដល់ពេលនេះ ជំនួយដែលកម្ពុជាទទួលបានសម្រាប់អភិវឌ្ឍន៍វិស័យវារីវប្បកម្ម មិនតិចជាង ១៥០ លានដុល្លារអាមេរិកនោះទេ ក្នុងនោះក៏មានការចូលរួមពីអង្គការសហប្រជាជាតិបានជួយផ្ដល់ជាបច្ចេកទេសចិញ្ចឹម និងកែច្នៃផលិតផលត្រីដើម្បីផ្គត់ផ្គង់ក្នុងស្រុក និងសម្រាប់ការនាំចេញទៅកាន់ទីផ្សារអន្តរជាតិ ៕
ចែករំលែកព័តមាននេះ