ខេត្តស្វាយរៀង ៖ ប្រជាពលរដ្ឋអ្នកចិញ្ចឹមជ្រូកបានត្អូញត្អែរ និងមានក្តីកង្វល់ដោយឈ្មួញទុច្ចរិតលួចនាំជ្រូករស់ និងសាច់ជ្រូកវៀតណាមចូលមកលក់ក្នុងស្រុករមាសហែក ហើយដឹកសត្វគោក្របីយកទៅលក់នៅប្រទេសវៀតណាមវិញ តាមច្រករបៀងខ្សែដែក និងច្រករបៀងព្រៃគុយ ឃុំត្រស់ ធ្វើឲ្យមានការឆ្លងជំងឺដល់សត្វជ្រូកពួកគាត់ចិញ្ចឹមតាមផ្ទះ…
ខេត្តស្វាយរៀង ៖ ប្រជាពលរដ្ឋអ្នកចិញ្ចឹមជ្រូកបានត្អូញត្អែរ និងមានក្តីកង្វល់ដោយឈ្មួញទុច្ចរិតលួចនាំជ្រូករស់ និងសាច់ជ្រូកវៀតណាមចូលមកលក់ក្នុងស្រុករមាសហែក ហើយដឹកសត្វគោក្របីយកទៅលក់នៅប្រទេសវៀតណាមវិញ តាមច្រករបៀងខ្សែដែក និងច្រករបៀងព្រៃគុយ ឃុំត្រស់ ធ្វើឲ្យមានការឆ្លងជំងឺដល់សត្វជ្រូកពួកគាត់ចិញ្ចឹមតាមផ្ទះ ។
ប្រភពប្រជាពលរដ្ឋបានឲ្យដឹងទៀតថា សពថ្ងៃឈ្មួញដឹកជ្រូករស់ និងកូនជ្រូកវៀតណាមចូលតាមទូកមកឡើងនៅច្រករបៀង ព្រៃគុយ និងច្រករបៀងខ្សែដែក ឃុំត្រស់ ស្រុករមាសហែកនេះ ដោយពុំមានសមត្ថកិច្ចណាបង្ក្រាបឡើយ ជាក់ស្តែងនៅថ្ងៃទី៥ កក្កដានេះ គេឃើញឈ្មួញនាំជ្រូកវៀតណាមចូលមកតាមទូក ហើយមកឡើងកំពង់នៅភូមិព្រៃគុយ ឃុំត្រស់ រាប់សិបក្បាល ហើយមានក្រុមម៉ូតូមកដឹកចូលទៅឃុំត្រស់ ដាក់តាមផ្ទះ រួចធ្វើលិខិតបញ្ជាក់ពីមន្ត្រីជំនាញជាជ្រូកខ្មែរដឹកបន្តតាមរថយន្តទៅរាជធានីភ្នំពេញ ឬដាក់តាមឡត៌សត្តឃាដ សម្រាប់កាប់សាច់លក់តាមផ្សារក្នុងខេត្តស្វាយរៀង ។
បើតាមសមត្ថកិច្ចស្រុករមាសហែកបានឲ្យដឹងថា បញ្ហាឈ្មួញលួចនាំជ្រូកវៀតណាមចូលមក នេះ គឺពិបាកបង្ក្រាបដោយសារនៅភូមិបុស្ស ភូមិព្រៃគុយ ឃុំត្រស់ មានកសិដ្ឋានចិញ្ចឹមជ្រូករបស់ក្រុមហ៊ុនស៊ីភីចំនួន២៤រោង (២៤កន្លែង) ដូច្នេះពួកឈ្មួញទុច្ចរិតបន្លំយកទីតាំងភូមិសាស្ត្រឃុំត្រស់នេះ ដើម្បីចរាចរណ៍នាំជ្រូកវៀតណាមចូលមកបន្លំទើបពិបាកក្នុងការបង្ក្រាប ។ ម្យាងភូមិសាស្ត្រឃុំត្រស់នេះមានព្រៃ និងចម្ការអំពៅជាប់តំបន់ព្រំដែនមានស្ទឹងឈ្មួញអាចនាំជ្រូកចូលខុសពីច្រករបៀងកាត់តាមភូមិ អ្នកស្រុក ឬកាត់តាមព្រៃចម្ការ ។
ដោយនៅថ្ងៃទី៥ កក្កដា វេលាម៉ោង១១និង១០នាទីព្រឹក ប្រជាពលរដ្ឋបានប្រទះឃើញរថយន្ត១គ្រឿងដឹកជ្រូករស់ប្រមាណជា២០០ក្បាលឈប់នៅចំណុចផ្លូវឡើង ឃុំត្រស់ ស្រុករមាសហែក បន្ទាប់មកក៏ដឹកតាមផ្លូវជាតិលេខ១៣ ឆ្ពោះមកកាន់ផ្លូវជាតិលេខ១ ហើយបានឈប់ទម្លាក់ជ្រូកចំនួន៦០ក្បាល លើរថយន្តនៅដេប៉ូរបស់ឈ្មោះ គ្រូ មួន ស្ថិតនៅភូមិបាក់រនាស់សង្កាត់សង្ឃ័រ ក្រុងស្វាយរៀង រួចដឹកបន្តទៅតាមផ្លូវជាតិលេខ១ ឆ្ពោះទៅខេត្តព្រៃវែង ។
ទាក់ទិនករណីនេះដែរម្ចាស់ដេប៉ូជ្រូកបាក់រនាស់បានឲ្យដឹងថា ខ្លួនបានទិញជ្រូកចំនួន៦០ក្បាលពីឈ្មោះ វិឆដា បុគ្គលិកផ្នែកលក់របស់ក្រុមហ៊ុនស៊ីភី ក៏ប៉ុន្តែក្រុមហ៊ុនដឹកចេញមកពីទីណាក៏អ្នកស្រីមិនដឹងដែរ គឺដឹងថាគាត់ទិញពីក្រុមហ៊ុនតែប៉ណ្ណោះ ។ ទាក់ទិនករណីនេះដែរ លោកវិ ឆដា បុគ្គលិកផ្នែកលក់នៃក្រុមហ៊ុនស៊ីភី បានប្រាប់ឲ្យដឹងតាមទូរស័ព្ទថា ជ្រូកដែលដាក់នៅភូមិបាក់រនាស់នោះ គឺជាជ្រូកក្រុមហ៊ុនស៊ីភី ដឹកមកពីខេត្តកំពង់ចាម សរុប១៤៥ក្បាលគឺដាក់នៅស្វាយរៀង៦០ក្បាល យកទៅដាក់នៅខេត្តព្រៃវែង និងខេត្តកណ្តាល ។ ដោយដឹកមកតាមផ្លូវថ្ងៃក្តៅក៏ឈប់រថយន្តត្រង់ចំណុចឃុំត្រស់ ស្រុករមាសហែក ដើម្បីបាញ់ទឹកជ្រូកឲ្យត្រជាក់ និងសម្រាកទិញទឹក និងនុំចំណីហូបតែប៉ុណ្ណោះ គឺមិនបានចូលដឹកជ្រូកពីកសិដ្ឋានឃុំត្រស់ទេ ។
ចំពោះថា មានឈ្មួញនាំជ្រូកវៀតណាមចូលមកឃុំត្រស់នោះ គឺលោកមិនដឹងទេ រូបលោកគ្រាន់តែជាអ្នកផ្នែកស៊ែលឲ្យក្រុមហ៊ុមទេ បញ្ហារោងចិញ្ចឹមជ្រូកនៅឃុំត្រស់នោះ សូមឲ្យសួរទៅផ្នែកកសិដ្ឋានទើបគេដឹង ។ ពាក់ពន្ធ័ករណីនេះលោកប៉ែន ចន្ធី ប្រធានការិយាល័យផលិតកម្មនិងបសុព្យាបាលនៃមន្ទីរកសិកម្មខេត្តបានឲ្យដឹងថា ក្រុមហ៊ុនស៊ីភី ពិតជាមានកសិដ្ឋានចិញ្ចឹមជ្រូកនៅឃុំត្រស់ ស្រុករមាសហែក ចំនួន២៤រោង និងមានជ្រូកចិញ្ចឹមក្នុងកសិដ្ឋានប្រមាណ១ម៉ឺនក្បាល ហើយនៅអូស្មាច់ ភូមិតាស្អាង ឃុំកំពង់ចំឡងដ៏ ស្រុកស្វាយជ្រំ មួយកន្លែង ។ ជ្រូកដែលក្រុមហ៊ុនដឹកមកដាក់នៅភូមិបាក់រនាស់នេះ គឺជាជ្រូករបស់ក្រុមហ៊ុន ។ បើមានឈ្មួញលួចនាំជ្រូកវៀតណាមចូលតាមភូមិសាស្ត្រឃុំត្រស់នោះ លោក និងដាក់កម្លាំងឃ្លាំមើល ៕ កែសម្រួលដោយ ៖ សុឃាក់
ចែករំលែកព័តមាននេះ