រាជធានីភ្នំពេញ ៖ ឧត្តមស្នងការអង្គការសហប្រជាជាតិ (UN) បានប្រកាសធ្វើកិច្ចសហប្រតិបត្តិការផ្នែកបច្ចេកទេសដល់រាជរដ្ឋាភិបាលកម្ពុជា បើសិនមានតម្រូវការ ។ ក្នុងជំនួបជាមួយសម្តេចតេជោ ហ៊ុន សែន នាយករដ្ឋមន្ត្រី កាលពីថ្ងៃទី៤ ខែកក្កដានេះ នៅក្នុងទីក្រុងហ្សឺណែវប្រទេសស្វីស ជំទាវ មីឆែល បាឆេឡេ (Michelle Machelet) ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបានលើកឡើងថា UN និងធ្វើកិច្ចសហប្រតិបត្តិការផ្នែកបច្ចេកទេស បើរាជដ្ឋាភិបាលមានតម្រូវការ ។
នេះបើយោងតាមបណ្តាញសង្គមហ្វេសប៊ុក សម្តេចតេជោ ។ បណ្តាញសង្គមសម្តេចតេជោបានចេញផ្សាយ កាលពីយប់ថ្ងៃទី៤ ខែកក្កដានេះ យ៉ាងដូច្នេះថា លោកស្រីឧត្តមស្នងការទទួលបន្ទុកសិទ្ធិមនុស្សបានស្វាគមន៍សម្ដេចតេជោនាយករដ្ឋមន្ដ្រីដែលសម្ដេចបានអញ្ជើញមកថ្លែងសុន្ទរកថា ក្នុងកិច្ចប្រជុំជាទៀងទាត់លើកទី៤១នៃក្រុមប្រឹក្សាសិទ្ធិមនុស្សអង្គការសហប្រជាជាតិនេះ ។ លោកស្រីបានគូសបញ្ជាក់ផងដែរថា ថ្ងៃទី៥ កក្កដានេះ របាយការណ៍នៅ ក្នុងការត្រួតពិនិត្យប្រចាំឆ្នាំនេះនឹងចេញនៅថ្ងៃនេះហើយ លោកជំទាវក៏បានមានប្រសា សន៍ ផងដែរថាលោកស្រីបានលឺថា ប្រទេសកម្ពុជាបានទទួលយកនៃអនុសាសន៍ជាច្រើនដែលបាន លើកឡើងកន្លងទៅនេះ ។
លោកស្រីក៏បានលើកឡើងថា លោកស្រីបានកត់សម្គាល់ថា ជាការល្អដែលយើងបានទទួល ហើយនឹងធ្វើការទៅលើរឿងនេះ ។ លោកស្រីក៏បានគូសបញ្ជាក់ថា ៖ «ការិយាល័យរបស់ខ្ញុំ ត្រៀមក្នុងការជួយដល់ប្រទេសកម្ពុជាជានិច្ច ជាពិសេសក្នុងការធ្វើរៀបចំ និងការពិនិត្យមើលឡើងវិញនៅពាក់កណ្ដាលអាណត្តិនៃរបាយការណ៍នេះ» ។ លោកបន្តថា កន្លងមកនេះពិតជាមានការរីកចម្រើនគ្រប់ផ្នែកទាំងអស់នៃប្រទេសកម្ពុជា ហើយក៏ថ្លែងអំណរគុណដល់សម្ដេចតេជោនាយករដ្ឋមន្ដ្រីដែលបានទទួលយកនូវអនុសាសន៍ជាច្រើននោះ ជាពិសេសនៅក្នុងអនុសាសន៍នោះនឹងឆ្លើយតបនឹងគាំទ្រដល់គោលដៅអភិវឌ្ឍន៍យុទ្ធសាស្ដ្រ ហើយជាពិសេសទៀត គឺការពង្រឹងនីតិរដ្ឋផងដែរ ។
លោកក៏បានគូសបញ្ជាក់ផងដែរថា លើសពីនេះទៀត គឺក៏បានត្រៀមដែលយើងហៅថា Ajenda នៅឆ្នាំ២០៣០ ឬមួយរបៀបវារៈឆ្នាំ២០៣០នេះ ហើយមិនត្រឹមប៉ុណ្ណោះលោកស្រីគូសបញ្ជាក់ថា លោកស្រីរំពឹងផ្ដល់ការគាំទ្រទៅរាល់ការខិតខំប្រឹងប្រែងរបស់រដ្ឋាភិបាលកម្ពុជាផងដែរ ។ នៅក្នុងជំនួបនោះសម្ដេចតេជោនាយករដ្ឋមន្ដ្រីបានលើកឡើងថា ឆ្នាំកន្លងទៅនេះយើងបានចុះកិច្ចព្រមព្រាងជាមួយគ្នាបន្ដអាណត្តិនៃការិយាល័យសិទ្ធិមនុស្សនៅប្រទេសកម្ពុជា រយៈពេល២ឆ្នាំ ។ សម្ដេចបានគូសបញ្ជាក់ថា ដើម្បីចៀសវាងការបារម្ភយើងចុះហត្ថលេខាទៅលើកិច្ចព្រមព្រាងនេះរៀងរាល់ពីរឆ្នាំម្ដង ដើម្បីកុំឲ្យមានកង្វល់ ។
សម្ដេចក៏បានគូសបញ្ជាក់ផងដែរថា «នៅពេលណាគេនិយាយអំពីសិទ្ធិមនុស្សនៅប្រទេសកម្ពុជាកាន់តែច្រើន សម្ដេចតែងតែស្វាគមន៍អំពីតម្រូវការសិទ្ធិមនុស្សជាមួយយើងតែម្ដង» ។ ពាក់ព័ន្ធនឹងការិយាល័យសិទ្ធិមនុស្សក៏ដូចជា ពាក់ព័ន្ធនឹងតំណាងរបស់អគ្គលេខាធិការនៃអង្គការសហប្រជាជាតិចំណុចនេះសម្ដេចបានគូសបញ្ជាក់ថា មានតែឯកឧត្តមអគ្គលេខាធិការនៃអង្គការសហប្រជាជាតិទេ ដែលមានសិទ្ធិក្នុងការជ្រើសរើសអ្នកណាជាតំណាង ដើម្បីធ្វើការងារជាមួយប្រទេសកម្ពុជាដែលកន្លងមកនេះប្រទេសកម្ពុជាបានទទួល៦នាក់មកហើយ ។
សម្តេចបន្តថា ជាធម្មតាជាទំនៀមទម្លាប់សម្ដេចតេជោមិនដែលបដិសេធ ឬច្រានចោលនៃការតែងតាំងនៃឯកអគ្គរាជទូត ឬការស្នើសុំតែងតាំងតំណាងរបស់អគ្គលេខាធិការនៃអង្គការសហប្រជាជាតិឡើយ» ។ មិនត្រឹមតែប៉ុណ្ណោះទេ សម្ដេចតេជោនាយករដ្ឋមន្ដ្រីក៏បានគូសបញ្ជាក់ដែរកន្លងមកនេះក៏មានការស្នើសុំដោយខាងអង្គការសហប្រជាជាតិ ក្នុងការតែងតាំងចៅក្រមស ម្រាប់ខ្មែរក្រហមប៉ុណ្ណោះដែរ គឺខាងកម្ពុជាមិនដែលបដិសេធការស្នើតែងតាំងនោះឡើយ ។ ចំពោះវេនទី៣ នៃការពិនិត្យមើលស្ថានភាពសិទ្ធិមនុស្សនេះ គឺប្រទេសកម្ពុជាបានធ្វើការងារចប់សព្វគ្រប់ហើយ ។ នៅក្នុងចំណោមប្រទេសចំនួន៧៣ដែលបានផ្តល់អនុសាសន៍ចំនួន៩៨ ដល់ប្រទេសកម្ពុជានោះរាជរដ្ឋាភិបាលទទួលយក១៧៣ រីឯ២៥ទៀតរាជរដ្ឋាភិបាលកម្ពុជាគ្រាន់តែធ្វើការកត់សម្គាល់តែប៉ុណ្ណោះ ។
ក្នុងឱកាសនោះដែរលោកស្រីឧត្តមស្នងការទទួលបន្ទុកសិទ្ធិមនុស្សក៏បានថ្លែងអំណរគុណសម្តេចតេជោនាយករដ្ឋមន្ត្រីដែលបានទទួលនូវអនុសាសន៍ពីបណ្តារដ្ឋជាសមាជិកនៃអង្គការសហប្រជាជាតិ ។ លោកស្រីបានគួសបញ្ជាក់ថា ៖« ឧត្តមស្នងការទទួលបន្ទុកសិទ្ធិមនុស្សត្រៀ មផ្តល់កិច្ចសហប្រតិបត្តិការបច្ចេកទេសដល់រាជរដ្ឋាភិបាល បើសិនមានតម្រូវការ ។ ការិយាល័យឧត្តមស្នងការសិទ្ធិមនុស្សនឹងផ្តល់នូវអ្វីដែលកម្ពុជាត្រូវការ ។ ចំណែកសម្តេចតេជោនាយករដ្ឋមន្ត្រីបានគូសបញ្ជាក់ថា កន្លងមកនេះសម្តេចបានធ្វើការងារជាច្រើន ដើម្បីជំរុញការអភិវឌ្ឍន៍ និងការពារលើបញ្ហាសិទ្ធិមនុស្សនៅកម្ពុជា ។ ដូចជាពេលថ្មីៗកន្លងទៅនេះ សម្តេចបានធ្វើសកម្មភាព ដើម្បីជួយដល់ស្ត្រីដែលមានក្តីក្តាំងដោយបានបង្កើតក្រុមមេធាវីត្រៀមជួយការពារក្តីជូនពួកគេដោយឥតគិតថ្លៃ ។
ជាការឆ្លើយតបលោកស្រីឧត្តមស្នងការបានបញ្ជាក់ថា លោកស្រីនឹងអញ្ជើញមកទស្សនកិច្ចនៅកម្ពុជា ក្នុងពេលវេលាសមស្របណាមួយ ។ លោកស្រីក៏ឆ្លៀតឱកាសនេះកោតសរសើរសម្តេចតេជោនាយករដ្ឋមន្ត្រីក៏ដូចជា ប្រទេសកម្ពុជាទាំងមូលលើការរីកចម្រើនផ្នែកសេដ្ឋកិច្ច ហើយលោកស្រីបានកត់សម្គាល់ ការរីកចម្រើនជាពិសេសធ្វើឱ្យប្រជាពលរដ្ឋមួយចំនួនធំបានចាកចេញពីភាពក្រីក្រនៅកម្ពុជា ។ ជាពិសេសទៀតទទួលស្គាល់ប្រទេសកម្ពុជាពិតជាមានការ រលំបាក់ក្រោយជួបវិបត្តិនៃភ្លើងសង្គ្រាម ៕ កែសម្រួលដោយ ៖ សុឃាក់
ចែករំលែកព័តមាននេះ