ខេត្តក្រចេះ ៖ លំនៅឋាន២ខ្នងនិងតូបកាត់សក់មួយកន្លែង នៅក្នុងបរិវេណផ្សារស្នួល ត្រូវបានភ្លើងឆេះកាលពីវេលាម៉ោង២ទៀបភ្លឺឈានចូលថ្ងៃទី៣ កក្កដា តែសំណាងល្អ មិនបង្កគ្រោះថ្នាក់ដល់អាយុជីវិតមនុស្ស ។ នគរបាលមូលដ្ឋានក្នុងស្រុកស្នួលបានឱ្យដឹងថា មូលហេតុបង្កឱ្យមានគ្រោះអគ្គិភ័យនេះ គឺដោយ សារទុស្សេចរន្តអគ្គិសនីដែលឆេះចេញពីតូបកាត់សក់នោះ ។
ហេតុការណ៍អគ្គិភ័យទាំងយប់ មានកម្លាំងនគរបាលជាច្រើននាក់ ដឹកនាំផ្ទាល់ដោយលោកឧត្តមសេនីយ៍ទោ លន់ សុផាត ស្នងការនគរបាលខេត្ត ចុះជួយអន្តរាគមន៍បាញ់ទឹកពន្លត់ទប់ស្កាត់មិនឱ្យឆេះរាលដាលតូបផ្សារទេ ដោយបានប្រើប្រាស់រថយន្តពន្លត់ចំនួន៣គ្រឿង និងប្រើប្រាស់ទឹកអស់ជាង១០ឡាន ។
របាយការណ៍នគរបាលស្រុកស្នួលឱ្យដឹងថា ជនរងគ្រោះក្នុងគ្រោះអគ្គិភ័យ ១-ឈ្មោះស៊ូ ស្រីមុំ អាយុ៣៥ឆ្នាំ មានផ្ទះទំហំ៥ គុណ២០ម៉ែត្រ ធ្វើពីឈើប្រក់ស័ង្កសីឆេះទាំងស្រុង ។ ក្រៅពីនោះ ក៏នៅមានរបស់របរមានតម្លៃជាច្រើនទៀត សរុបខាង់បង់អស់ជិត៣ម៉ឺនដុល្លារ ទី២-ឈ្មោះសុខ គឹមហេង អាយុ៨៦ឆ្នាំ មានផ្ទះទំហំ៧.៥ គុណ៩មែត្រ ធ្វើថ្មក្រោមឈើលើប្រក់ស័ង្កសីត្រូវឆេះទាំងស្រុង ខូចខាតរបស់របរមានតម្លៃ និងលុយ ដែលទើបតែលក់ដីបានអស់ជាង១០ម៉ឺនដុល្លារ និងទី៣-តូបកាត់សក់ឈ្មោះ ស៊ូ ប៊ុនរ៉ី គឺត្រូវឆេះទាំងស្រុង។
សូមបញ្ជាក់ថា គ្រោះអគ្គិភ័យនេះ ជាមហន្តរាយលើកទី២ ដែលបានកើតមានឡើងទៅលើផ្ទះ និងតូបនៅផ្សារស្នួល។កាលពីដើមខែកុម្ភះឆ្នាំ២០១៧ កន្លងទៅ នៅតំបន់បរិវេណជុំវិញផ្សារស្នួល ក៏ធ្លាប់កើត មានគ្រោះអគ្គីភ័យបង្កជាមហន្តរាយធ្ងន់ធ្ងរម្តងរួចទៅហើយ ។ កាលណោះ បានបង្កឱ្យលំនៅឋានពលរដ្ឋនៅជាប់ៗគ្នាចំនួន៦ខ្នង សុទ្ធសឹងធ្វើពីឈើ បានរងការឆាបឆេះគ្មានសល់ ។ (សម្រួលដោយ៖ ស្រីណា)
ចែករំលែកព័តមាននេះ