រាជធានីភ្នំពេញ ៖ មកទល់ពេលនេះ ព្រឹត្តិការណ៍ស៊ីហ្គេមដែលកម្ពុជាគ្រោងធ្វើនៅឆ្នាំ២០២៣ កាន់តែរំកិលមកដល់បន្តិចម្ដងៗហើយ ដោយសហព័ន្ធកីឡាកាយសម្ព័ន្ធ អះអាងថា ខ្លួនកំពុងពង្រឹងកម្លាំងគ្រប់គ្រាន់ផងដែរ ។ យ៉ាងណាមិញ…
រាជធានីភ្នំពេញ ៖ មកទល់ពេលនេះ ព្រឹត្តិការណ៍ស៊ីហ្គេមដែលកម្ពុជាគ្រោងធ្វើនៅឆ្នាំ២០២៣ កាន់តែរំកិលមកដល់បន្តិចម្ដងៗហើយ ដោយសហព័ន្ធកីឡាកាយសម្ព័ន្ធ អះអាងថា ខ្លួនកំពុងពង្រឹងកម្លាំងគ្រប់គ្រាន់ផងដែរ ។ យ៉ាងណាមិញ សហព័ន្ធបានអះអាងថា ខ្លួនត្រូវការបណ្ដុះបណ្ដាលធនធានថ្មីបម្រុងទុក និងស្នើឱ្យយុវវ័យចាប់អារម្មណ៍ចូលខ្លួនហ្វឹកហាត់ក្នុងជំនាញនេះឱ្យបានច្រើន ដោយសារជាក់ស្ដែង បើទោះជាសហព័ន្ធមានធនធានគ្រប់គ្រាន់ ក៏នៅត្រូវការធនធានថ្មីៗបន្តជំហាន។
យោងតាមការលើកឡើងរបស់លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជាបានអះអាងថា សហព័ន្ធទាំងមូល បានត្រៀមខ្លួនច្រើនណាស់មិនមែនស្ងាត់ទេ ដោយត្រូវពង្រឹងទាំងកីឡាករ និងក្រុមគ្រូបង្វឹក ។ លោក ថា សហព័ន្ធក្រៅពីបានបញ្ជូនកីឡាករមួយរូបទៅហ្វឹកហាត់ពង្រឹងសមត្ថភាពនៅប្រទេសចិន រយៈពេល៤ខែនាពេលកន្លងមក ក៏បានចេញទៅហ្វឹកហាត់នៅក្នុងប្រទេសជាដៃគូផ្សេងទៀតមិនសូវដាច់នោះផង ។ កីឡាកាយសម្ព័ន្ធ មិនបានធ្វេសប្រហែសសម្រាប់ព្រឹត្តិការណ៍ស៊ីហ្គេមនៅពេលខាងមុខ និងនៅស៊ីហ្គេមរបស់កម្ពុជានៅឆ្នាំ២០២៣នោះទេ គឺកាន់តែបានពង្រឹងសមត្ថភាពខ្លាំងឡើងដើម្បីកេរ្តិ៍ឈ្មោះ។
ជាក់ស្ដែង ការបញ្ជូនកីឡាករដែលមានសមត្ថភាពចូលរួមប្រកួតស៊ីហ្គេមមិនដែលដាច់ទេ ដើម្បីទៅដកស្រង់យកបទពិសោធន៍ពីការប្រកួតអន្តរជាតិ យកមកបណ្ដុះបណ្ដាលដល់កីឡាករនៅក្នុងប្រទេស ។ លោកថា នៅក្នុងព្រឹតិ្តការណ៍កីឡាជាតិ២លើកកន្លងមក សហព័ន្ធជម្រើសបានជើងខ្លាំងក្មេងៗកាន់តែច្រើន តែមិនទាន់ច្បាស់ថាពួកគេនឹងក្លាយជាទ័ពស្រួចសម្រាប់ការប្រកួតស៊ីហ្គេមក្នុងឆ្នាំ២០២៣របស់កម្ពុជានោះទេ តែមានន័យថា សហព័ន្ធមានការបម្រុងទុកច្បាស់លាស់ ។
លោកបន្តថា សហព័ន្ធកំពុងបង្កើនការហ្វឹកហាត់កីឡាករកីឡាការិនីក្មេងជារៀងរាល់ថ្ងៃ ដើម្បីឱ្យសមាសភាពកីឡាករទាំងនោះ អាចចូលប្រកួតបានកាន់តែល្អ ហើយអាចក្លាយជាធនធានពិតប្រាកដរបស់កម្ពុជាសម្រាប់ព្រឹត្តិការណ៍ស៊ីហ្គេមក្នុងឆ្នាំ២០២៣ ។ លោកថា កម្ពុជានឹងសម្រាំងយកកីឡាករឱ្យបានល្អពីការបង្វឹកប្រចាំថ្ងៃនៅក្នុងសហព័ន្ធដែលជ្រើសចេញពីព្រឹត្តិការណ៍កីឡាជាតិមុននេះ ដោយលោកប្រកាសថាសុទ្ធតែជាធនធានអ្នកប្រកួតដែលមានសមត្ថភាព និងជាជើងខ្លាំងរបស់កម្ពុជានៅពេលកម្ពុជាធ្វើជាម្ចាស់ផ្ទះ ។
បើទោះជាវិញ្ញាសាកាយសម្ព័ន្ធមិនមែនជាវិញ្ញាសាដើមរបស់កម្ពុជា តែលោកប្រកាសថាមិនបានធ្វេសប្រហែសក្នុងការបំប៉នអ្នកមានសមត្ថភាពដើម្បីដណ្ដើមយកមេដាយនៅឆ្នាំ២០២៣នោះទេ ដើម្បីកុំឱ្យបាក់មុខសហព័ន្ធ ក្នុងពេលកម្ពុជាធ្វើជាម្ចាស់ផ្ទះ ។ លោកប្រកាសត្រៀមបង្វឹកកីឡាករកីឡាការិនីកាយសម្ព័ន្ធច្រើននាក់ ដើម្បីឱ្យក្លាយជាធនធានរបស់កម្ពុជា ក្រោយពីការប្រកួតកីឡាជាតិមួយលើកទៀតត្រូវបានបញ្ចប់ ។ យ៉ាងណាមិញ លោកថា សហព័ន្ធកំពុងមានបញ្ហារឿងខ្វះធនធានក្មេងជាកម្លាំងស្នូលថ្មី ដោយសារតែពេលជ្រើសរើសម្ដងៗគឺមានយុវវ័យមិនច្រើនចូលរួម ហើយអ្នកចូលហ្វឹកហាត់ទៀតសោត ក៏តស៊ូបានតែមួយរយៈក៏បោះបង់វិញ ។ លោកស្នើឱ្យយុវវ័យយកចិត្តទុកដាក់ជាថ្មី ដោយមិនអាចគ្រាន់តែពឹងលើធនធានចាស់ ហើយធ្វើព្រងើយៗបានឡើយ។
ជាមួយគ្នានោះ លោកអគ្គលេខាធិការរូបនេះនៅតែបង្ហាញពីការរំពឹងថា កម្ពុជានឹងក្ដោបក្ដាប់មេដាយមាសសម្រាប់វិញ្ញាសាមួយចំនួនក្នុងការប្រកួតកាយសម្ព័ន្ធលើឆាកអន្តរជាតិនៅក្នុងព្រឹត្តិការណ៍នានា ដោយលោកបញ្ជាក់ថា បើទោះជាមិនបានមេដាយក្នុងពេលបញ្ជូនទៅប្រកួតនៅប្រទេសផ្សេង ក៏ពិតជាបាននៅពេលកម្ពុជាធ្វើជាម្ចាស់ផ្ទះស៊ីហ្គេមនោះដែរ ។ លោកថា កីឡាករ សំ រីម គឺជាសមាសភាពរបស់កម្ពុជា ដែលមានសមត្ថភាព ទើបកម្ពុជារមែងយកចិត្តទុកដាក់បញ្ជូនឱ្យទៅប្រកួតនិងហ្វឹកហាត់នៅកម្ពុជាជាប្រចាំដូចជាករណីបញ្ជូនឱ្យទៅហាត់នៅក្រៅប្រទេសគឺចិននៅក្នុងពេលនេះ។
លោកសង្ឃឹមថា កីឡាកររបស់កម្ពុជានឹងដណ្តើមបានមេដាយពីព្រឹត្តិការណ៍ប្រកួតកីឡាស៊ីហ្គេមនៅប្រទេសម៉ាឡេស៊ីជូនជាតិមាតុភូមិ ព្រោះរូបគេជាកីឡាករម្នាក់គត់ដែលសហព័ន្ធគ្រោងបញ្ជូនឲ្យចូលរួមប្រកួតលើវិញ្ញាសា Artistic ក្នុងព្រឹត្តិការណ៍នេះ ។ ក្នុងនោះ លោកឧកញ៉ា សុខ ហុង អនុប្រធានសហព័ន្ធកីឡាកាយសម្ព័ន្ធកម្ពុជា ក៏ធ្លាប់បើកវគ្គបំប៉នបច្ចេកទេស និងជំនាញគ្រូបង្វឹកផ្នែកកាយសម្ព័ន្ធ ដែលរៀបចំដោយអង្គការសាមគ្គីអូឡាំពិកអន្តរជាតិ និងគណៈកម្មាធិការជាតិអូឡាំពិកកម្ពុជាកន្លងមកផងដែរ ដែលសុទ្ធតែជាទិសដៅបណ្តុះធនធានគ្រូជំនាញ និងកីឡាករវ័យក្មេងដ៏សំខាន់ក្នុងការត្រៀមខ្លួនសម្រាប់ការប្រកួតស៊ីហ្គេមលើកទី៣២ ក្នុងឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ប្រភពពីខាងសហព័ន្ធបញ្ជាក់ថា កម្ពុជានឹងបណ្ដុះគ្រាប់ពូជកីឡាករកីឡាការិនីឱ្យបានល្អ ដោយក្នុងមួយថ្ងៃៗក៏បានចំណាយពេលបង្វឹកពួកគេឱ្យក្លាយជាធនធានល្អ និងប្រកបដោយសមត្ថភាពខ្ពស់ផងដែរ ដោយមិនមែនបណ្ដោយឱ្យសហព័ន្ធទាំងមូលមិនមានកីឡាករកីឡាការិនីដែលមានកម្រិតប្រកួតប្រជែងនៅក្នុងសហព័ន្ធនោះទេ ៕ (កែសម្រួលដោយ ៖ បុប្ផា)
ចែករំលែកព័តមាននេះ