រាជធានីភ្នំពេញ ៖ ដូចជាការគ្រោងទុកសម្តេចតេជោ ហ៊ុន សែន នាយករដ្ឋមន្ត្រីអញ្ជើញថ្លែងសន្ទរកថា ពីនយោបាយឈ្នះ-ឈ្នះ នៅក្នុងកិច្ចប្រជុំជាទៀតទាត់លើកទី៤១ នៃក្រុមប្រឹក្សាសិទ្ធិមនុស្សអង្គការសហប្រជាជាតិ នៅមន្ទីរអង្គការសហប្រជាជាតិ នៅទីក្រុងហ្សឺណែវ ។ សម្តេចតេជោបានលើកឡើងក្នុងកិច្ចប្រជុំនាថ្ងៃទី០៤ ខែកក្កដា ឆ្នាំ២០១៩យ៉ាងដូច្នេះថា« ហេតុផលដែលជំរុញឱ្យខ្ញុំដាក់ចេញនូវ «គោលនយោបាយឈ្នះ-ឈ្នះ» ដែលបាននាំមកជូនកម្ពុជានូវការ បញ្ចប់សង្គ្រាមទាំងស្រុង និងការទទួលបាននូវសុខសន្តិភាព ការបង្រួបបង្រួមជាតិ និងឯកភាពជាតិពេញលេញនៅក្នុងទូទាំងប្រទេសជាលើកដំបូងនៅចុងឆ្នាំ១៩៩៨ ក្នុងប្រវត្តិសាស្ត្រកម្ពុជាជាច្រើនទសវត្សរ៍ចុងក្រោយនេះ» ។
សម្តេចបញ្ជាក់ថា «ខ្ញុំសូមគូសបញ្ជាក់ថា នេះ គឺជាសន្តិភាពដែលសម្រេចបានមកដោយកម្ពុជាខ្លួនឯងផ្ទាល់ ដោយគ្មានការបង្ហូរឈាម គ្មានការប្រើអាវុធ ឬគ្រាប់រំសេវ សូម្បីតែមួយគ្រាប់ និងដោយគ្មានការបង្គាប់បញ្ហា ឬការជួយជ្រោមជ្រែងពីខាងក្រៅ ។ សម្តេចបន្ថែមថា ជាការពិត សន្តិភាពបានបើកឡើងនូវឱកាសសម្រាប់ការអភិវឌ្ឍលើគ្រប់វិស័យកម្ពុជា ដែលពីមុនត្រូវបានញាំញី និងបំផ្លិចបំផ្លាញដោយសង្គ្រាមរ៉ាំរ៉ៃ ការបែកបាក់ជាតិ ការបែងចែកទឹកដី និងអសន្តិសុខគ្រប់ទីកន្លែង ឥឡូវបានក្លាយជាប្រទេសដែលមានសន្តិភាពពេញលេញមានការបង្រួបបង្រួមជាតិ និងឯកភាពទឹកដីទាំងស្រុងមានសន្តិសុខរឹងមាំ និងក្លាយជាតំបន់ទេសចរណ៍ប្រកបដោយភាពទាក់ទាញមួយនៅក្នុងតំបន់ និងពិភពលោក ហើយមានប្រជាជនរស់នៅក្នុងសុខសន្តិភាពយ៉ាងសុខដុមរមនា ទាំងក្នុងគ្រួសារ ទាំងក្នុងសហគមន៍ និងទាំងក្នុងសង្គមជាតិទាំងមូល ។
ជាមួយគ្នានោះដែរប្រមុខរាជដ្ឋាភិបាលក៏បានលើកឡើងថា កម្ពុជាដែលពីមុនជាវាលពិឃាតគ្រប់ដណ្តប់ ដោយអំណាចផ្តាច់ការ និងឧក្រិដ្ឋកម្មគួរឱ្យរន្ធត់បំផុតនៃរបបប្រល័យពូជសាសន៍, ឥឡូវបានក្លាយជាទឹកដីនៃសេរីភាព ដែលមានការគោរពយ៉ាងខ្លាប់ខ្លួននូវគោលការណ៍នៃលទ្ធិប្រជាធិបតេយ្យសេរីពហុបក្ស តាមរយៈការរៀបចំនូវការបោះឆ្នោតយ៉ាងទៀងទាត់ដោយសេរី ត្រឹមត្រូវ និងយុត្តិធម៌ និងជារដ្ឋដែលគោរពគោលការណ៍ច្បាប់ដោយឥតងាករេ ហើយប្រជាជនគ្រប់ រូបមានសិទ្ធិស្មើភាពគ្នានៅចំពោះមុខច្បាប់ ។ សម្តេចបានគូសបញ្ជាក់ថា ៖« កម្ពុជា ដែលពីមុនត្រូវបានគេប្រមាថមើលងាយ ត្រូវបានគេហ៊ុមព័ទ្ធ និងឯកោទាំងខាងនយោបាយ និងសេដ្ឋកិច្ច តែឥឡូវ គឺជារដ្ឋឯករាជ្យមួយ ដែលមានអធិបតេយ្យ និងបូរណភាពទឹកដីពេញលេញ ហើយកំពុងពង្រីកការធ្វើសមាហរណកម្មខ្លួនយ៉ាងសកម្មទៅក្នុងរចនាសម្ព័ន្ធ និងនិម្មាបនកម្មនៃតំបន់ និងពិភពលោក ព្រមទាំងកំពុង បំពេញតួនាទីយ៉ាងសកម្ម ដោយស្មើភាព និងស្មើសិទ្ធិក្នុងរាល់កិច្ចការតំបន់ និងអន្តរជាតិ »។
សម្តេចបន្ថែមថា កម្ពុជាដែលពីមុនជាប្រទេសធ្លាប់ទទួលនូវកងកម្លាំងរក្សាសន្តិភាពរបស់អង្គការសហប្រជាជាតិ ឥឡូវបានក្លាយជាប្រទេសបញ្ជូនកងកម្លាំងរបស់ខ្លួនទៅចូលរួមក្នុងបេសកកម្មថែរក្សាសន្តិភាពរបស់អង្គការសហប្រជាជាតិនៅប្រទេសជាច្រើនលើពិភពលោក ។ កម្ពុជាដែលពីមុនជាប្រទេសអន់ថយបំផុតខាងផ្នែកសេដ្ឋកិច្ច ដោយភាពក្រីក្រ និងមានកង្វះខាតស្បៀងអាហារយ៉ាងធ្ងន់ធ្ងរ ឥឡូវ បានក្លាយជាប្រទេសមួយ នាំស្រវ- អង្ករចេញ ធានាបានយ៉ាងគត់មត់នូវសន្តិសុខស្បៀង លើសពីនេះទៀត បានឆ្លងកាត់ដោយ ជោគជ័យពីប្រទេសមានចំណូលទាបក្លាយ ជាប្រទេសមានចំណូលមធ្យមកម្រិតទាប ព្រមទាំងកំពុងប្រឹងប្រែង ដើម្បីក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ ២០៥០៕ កែសម្រួលដោយ ៖ សុឃាក់
ចែករំលែកព័តមាននេះ