ខេត្តព្រះសីហនុ ៖ ភ្លៀងធ្លាក់មួយមេធំ ចាប់តាំងពីយប់រហូតមកដល់ជិតថ្ងៃត្រង់ថ្ងៃទី៣ ខែកក្កដា ប្រៀបដូចកំហឹងព្រះភិរុណ ដែលមិនធ្លាប់មានបានធ្វើឲ្យតំបន់ទំនាបមួយចំនួនក្នុងក្រុងព្រះសីហនុ ដូចជាផ្នែក
ខ្លះនៅតាមផ្លូវឯករាជ្យ និងភូមិឋានខ្លះ បានជន់លិចដោយជំនន់ទឹកភ្លៀងយ៉ាងល្ហហ្ហេវ គឺគ្រប់ទឹកតែម្តង ។
កំហឹងព្រះភិរុណនាពេលនេះ ប្រៀបដូចចង់ដឹងថា តើកន្លងមកអាជ្ញាធរក្រុងព្រះសីហនុមានវិធានការរឿងប្រព័ន្ធលូបង្ហូរទឹកដែរឬអត់ ? គឺអត់មែន !
មន្ត្រីផ្នែកប្រព័ន្ធលូនិយាយថា ករណីជំនន់ទឹកភ្លៀងជន់លិចពេលមានភ្លៀងខ្លាំងបែបនេះ មិនមែនជាលើកទី១ទេនៅក្រុងព្រះសីហនុ ដោយសារតែទំហំអូរ ឬប្រឡាយដោះទឹកនានាបានរួមតូច តាមរយៈការសាងសង់ផ្ទះ ឬសំណង់ផ្សេងៗលើដីចំណីអូរ មិនមានច្បាប់អនុញ្ញាត ។ មានសំណង់ខ្លះទៀតសាងសង់គ្មានប្រព័ន្ធលូក្រោមដីដោយចាក់ដីលុបបិទផ្លូវទឹកហូរ ក្នុងនោះក៏មានសំរាមរសាត់អណ្តែតបិទមាត់លូខ្លះថែមទៀតផង ទើបធ្វើឲ្យចរន្តទឹកហូរមិនទាន់ នាំឲ្យមានការជន់លិចចំកណ្តាលក្រុង ។
មន្ត្រីដដែលនិយាយទៀតថា ករណីនេះរដ្ឋបាលខេត្តបានធ្វើការដោះស្រាយជាបន្តបន្ទាប់ដោយប្រើវិធានការបច្ចេកទេស កាយបើកផ្លូវទឹកហូរផង និងប្រើវិធានការផ្លូវច្បាប់ទៅលើអ្នករំលោភបំពានផង ដើម្បីដោះស្រាយនិងកាត់បន្ថយការជន់លិចពេលមានភ្លៀងខ្លាំង ដោយសង្ឃឹមថា ដំណើរការដោះស្រាយជំនន់ទឹកភ្លៀងរបស់ រដ្ឋបាលខេត្តនឹងទទួលបានលទ្ធផលជាវិជ្ជមាននៅពេលខាងមុខនេះ ។
ភ្ញៀងមួយមេធំដែលបានបង្អុរចុះដោយសារឥទ្ធិពលព្យុះមកពីឈូងសមុទ្រចិន បានធ្វើឲ្យជន់លិចផ្លូវមួយចំនួននៅក្នុងសង្កាត់លេខ៤ក្រុងព្រះសីហនុនោះ គេឃើញមានសំរាមមហាសំរាមអណ្តែតត្រៀបត្រាបង្ហាញថា ដោយសារទឹកដែលជន់លិចមិនដឹងហូរទៅណា ទាំងនេះបញ្ជាក់ថា អាជ្ញាធរក្រុងកន្លងមកមិនមានស្នាដៃទេ ។ ពេលនេះប្រៀបដូចលោកអភិបាលខេត្តថ្មី លោក គួច ចំរើន ចៀសមិនរួចទទួលថ្មបាក់ ។
កាលពីថ្ងៃទី២ ខែកក្កដា ក្រសួងធនធានទឹក និងឧតុនិយម បានចេញសេចក្តីជូនដំណឹងថាស្ថានភាពអាកាសធាតុនៅកម្ពុជា ចាប់ពីថ្ងៃទី២ដល់ថ្ងៃទី៨ ខែកក្កដា នឹងទទួលរងនូវឥទ្ធិពលប្រព័ន្ធសម្ពាធទាប អូសបន្លាយលើភាគខាងជើង ក្នុងទឹកដីប្រទេសថៃ ឡាវ និងវៀតណាម ដោយធ្វើឲ្យភ្លៀងធ្លាក់ច្រើន ។
ឥទ្ធិពលខ្យល់មូសុងនិរតីខ្លាំង និងឥទ្ធិពលហ្វឺន(Foehn) ដែលមានល្បឿនពី៧-១០ម៉ែត្រក្នុងមួយវិនាទី ក៏កំពុងកើតមាននៅភាគខាងក្រោមប្រទេសផងដែរ ដែលលក្ខណៈបែបនេះធ្វើឲ្យខេត្តនៅតំបន់មាត់សមុទ្រមានដូចជា ខេត្តកោះកុង ព្រះសីហនុ នឹងមានភ្លៀងធ្លាក់រាយប៉ាយជាបន្តបន្ទាប់ក្នុងកម្រិតពីបង្គួរទៅច្រើន ។ ឯខ្យល់លើផ្ទៃសមុទ្រ និងរលក មានកម្រិតខ្លាំង ៕
ចែករំលែកព័តមាននេះ