ខេត្តកណ្តាល ៖ គួរឱ្យខ្លោចចិត្តណាស់ ស្ត្រីម្នាក់ដែលមានជំងឺសរសៃប្រសាទបានកាប់ជីដូនខ្លួនឯងដែលកំពុងបោសសំរាមនៅខាងមុខផ្ទះបណ្តាលឱ្យស្លាប់យ៉ាងអាណោចអាធ័ម កាលពីថ្ងៃទី២ ខែកក្កដាកន្លងទៅ វេលាម៉ោងប្រមាណ៥ល្ងាចនៅនឹងផ្ទះជនរងគ្រោះ ស្ថិតក្នុងភូមិព្រែកថ្មី ឃុំទឹកវិល ស្រុកស្អាង ។ ជនរងគ្រោះឈ្មោះ ឡាច ឡាវ អាយុ៨១ឆ្នាំ ចំណែកចៅស្រីដែលកាប់ជីដូនខ្លួនឯងនេះឈ្មោះ ហ៊ីម សុខមាន អាយុ២៧ឆ្នាំ ។ ឃាតករជាចៅស្រីបង្កើតនេះ ត្រូវបានកម្លាំងកងរាជអាវុធហត្ថខេត្តកណ្តាល សហការជាមួយកម្លាំងកងរាជអាវុធហត្ថលើផ្ទៃប្រទេស និងអាវុធហត្ថខេត្តកំពង់ធំចាប់បានហើយ នៅទឹកដីខេត្តកំពង់ធំ ។
នគរបាលស្រុកស្អាងបានឱ្យដឹងថា នាល្ងាចថ្ងៃនោះ ខណៈជនរងគ្រោះកំពុងបោសសំរាមនៅខាងមុខផ្ទះ ស្រាប់តែចៅស្រីរូបនេះដើរសំដៅជនរងគ្រោះ ហើយទាញកាំបិតពីក្នុងថង់ខ្មៅកាប់ជីដូនរហូតដល់ស្លាប់តែម្ដង ។ ក្រោយពេលកើតហេតុ ជនសង្ស័យបានបោះកាំបិតចោល រួចគេចខ្លួនបាត់ដែលសមត្ថកិច្ចកំពុងតាមចាប់ខ្លួន ។
ទោះជាយ៉ាងណា រហូតមកដល់យប់ថ្ងៃដដែល បើតាមមន្ត្រីកងរាជអាវុធហត្ថខេត្តកណ្តាល ប្រាប់ភ្នាក់ងារកោះសន្តិភាពថា ឃាតករជាចៅស្រីបង្កើតនេះ ត្រូវបានកម្លាំងកងរាជអាវុធហត្ថខេត្តកណ្តាល សហការជាមួយកម្លាំងកងរាជអាវុធហត្ថលើផ្ទៃប្រទេស និងអាវុធហត្ថខេត្តកំពង់ធំចាប់បានហើយ នៅទឹកដីខេត្ត កំពង់ធំ ៕ (សម្រួលដោយ៖ ស្រីណា)
ចែករំលែកព័តមាននេះ